តើមានកត្តាអ្វីជំរុញឱ្យតម្លៃមាសហក់ឡើងជិតឈានដល់កម្រិតកំណត់ត្រាជាថ្មី?

តម្លៃនេះជិតហក់ឡើងដល់កម្រិតប្រវត្តិសាស្រ្តក្នុងតម្លៃ៣,៦០០ដុល្លារ ក្នុង១តម្លឹងកាលពីអំឡុងត្រីមាសទី៤ ឆ្នាំ២០២៤ កន្លងទៅ។ តើមានកត្តាអ្វីជំរុញឱ្យតម្លៃមាសហក់ឡើងជិតឈានដល់កម្រិតកំណត់ត្រាជាថ្មី?

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ភីភីលីង ស៊ីឃ្យួរីធី បានគូសបញ្ជាក់ប្រាប់សារព័ត៌មាន ខេមបូណូមីស ថា គិតត្រឹមរសៀលថ្ងៃទី១៣ ខែមីនា ឆ្នាំ២០២៥ ហាងឆេងមាសនៅលើទីផ្សារអន្តរជាតិមានតម្លៃ២,៩៣៧ដុល្លារក្នុង១អោន ខណៈនៅទីផ្សារកម្ពុជាអាចមានតម្លៃចន្លោះពី៣,៥៥០ដុល្លារទៅ៣,៥៧០ដុល្លារក្នុង១តម្លឹង។ អ្នកជំនាញរូបនេះអះអាងថា ការហក់ឡើងតម្លៃមាសជាថ្មីនេះត្រូវបានជំរុញដោយសារការកើនឡើងអតិផរណានៅសហរដ្ឋអាម៉េរិក ខណៈប្រាក់ដុល្លារកំពុងធ្លាក់ចុះ។ បញ្ហាសង្រ្គាមពាណិជ្ជកម្មរវាងអាម៉េរិកជាមួយប្រទេសចិន កាណាដា និងម៉ិកស៊ិក និងបញ្ហាសង្រ្គាមរវាងរុស្ស៊ី និងអ៊ុយក្រែនមិនទាន់ចប់ ក៏ជាកត្តារួមចំណែកផងដែរ។

បើតាមលោក ឡុង សំណាង ទោះបីស្ថានភាពនាពេលខាងមុខមិនមានកើតឡើងក៏ដោយ ក៏មាសនៅតែបន្តឡើងថ្លៃដែរ ដោយសារនៅពេលសេដ្ឋកិច្ចមានដំណើរការល្អ នោះការវិនិយោគមាសនឹងមានទំហំកាន់តែធំជាងមុន ព្រោះវត្ថុដ៏កម្រនេះ នៅតែមានតម្រូវការក្នុងការប្រើប្រាស់សម្រាប់ដាក់ធានា និងជាវត្ថុធាតុក្នុងគ្រឿងបង្គុំអេឡិចត្រូនិកជាដើម។

គួរបញ្ជាក់ថា តម្លៃហាងឆេងមាសបានហក់ឡើងដល់កម្រិតខ្ពស់បំផុតរហូតដល់៣,៦០០ដុល្លារក្នុង១តម្លឹង កាលពីចុងខែតុលា ឆ្នាំ២០២៤ ប៉ុន្តែតម្លៃមាសបានធ្លាក់ចុះវិញជាបន្តបន្ទាប់ ជាពិសេសនៅប៉ុន្មានថ្ងៃក្រោយការបោះឆ្នោតជ្រើសរើសប្រធានាធិបតីនៅសហរដ្ឋអាម៉េរិក៕

អត្ថបទ៖ បូ ដូឡា,រូបភាព ឯកសារ