អ្នកនាំពាក្យក្រសួងការបរទេស លោក កេត សោផាន់ បាននិយាយថា មន្ដ្រីសហភាពអឺរ៉ុបទាំងនោះនឹងជួបរដ្ឋមន្ដ្រីក្រសួងមហាផ្ទៃ លោក ស ខេង នៅព្រឹកថ្ងៃពុធ ខណៈដែលនឹងមានជំនួបជាមួយរដ្ឋមន្ដ្រីការបរទេស លោក ប្រាក់ សុខុន និងរដ្ឋមន្ដ្រីក្រសួងពាណិជ្ជកម្ម លោក ប៉ាន សូរស័ក្ដិ នាពេលរសៀលថ្ងៃដដែល។
លោក កេត សោផាន់ បាននិយាយដូច្នេះថា «ខ្ញុំមិនអាចវិនិច្ឆ័យមុនអំពីលទ្ធផលបានទេ។ សូមមកចូលរួមកិច្ចប្រជុំ។ ខ្ញុំនឹងធ្វើសន្និសីទមួយខ្លីបន្ទាប់ពីកិច្ចប្រជុំជាមួយឧបនាយករដ្ឋមន្ត្រីការបរទេសនៅរសៀលនេះ។»
បន្ទាប់ពីលើកឡើងពីការព្រួយបារម្ភអំពីលទ្ធិប្រជាធិបតេយ្យនិងសិទ្ធិមនុស្សនៅកម្ពុជា សហភាពអឺរ៉ុបបានប្រកាសកាលពីខែកុម្ភៈ ថា ខ្លួនចាប់ផ្តើមដំណើរការនីតិវិធីផ្អាកជាបណ្តោះអាសន្ននូវកម្មវិធីអនុគ្រោះពន្ធ EBA។
តើបានអានអត្ថបទនេះ ឬនៅ?
EBA គឺជាគំនិតផ្តួចផ្តើមរបស់សហគមន៍អឺរ៉ុបដើម្បីជួយបណ្តាប្រទេសក្រីក្រឲ្យនាំចូលទំនិញទៅទីផ្សារអឺរ៉ុបដោយមិនបាច់បង់ពន្ធ ហើយកម្មវិធីអនុគ្រោះពន្ធនេះអាចត្រូវបានដកចេញវិញ ក្នុងករណីមានការរំលោភបំពានសិទ្ធិមនុស្សធ្ងន់ធ្ងរ។ យោងតាមតួលេខផ្លូវការ ទំនិញដល់ទៅ ៤០ភាគរយនៃទំនិញទាំងអស់ ដែលនាំចេញពីកម្ពុជាទៅទីផ្សារអន្តរជាតិ គឺបាននាំចេញទៅកាន់ទីផ្សារសហគមន៍អឺរ៉ុប។
អង្គការ សមាគម សហជីព សហគមន៍ធុរកិច្ច នៅក្នុងសេចក្តីថ្លែងការណ៍កាលពីពេលថ្មីៗកន្លងទៅ បានសម្ដែងការព្រួយបារម្ភយ៉ាងខ្លាំងអំពីនីតិវិធីរបស់សហភាពអឺរ៉ុបដើម្បីដក EBA ពីកម្ពុជា។ សេចក្តីថ្លែងការណ៍ដែលមានចុះហត្ថលេខាពីអង្គការ សមាគម សហជីព និងសហគមន៍ ចំនួន៦៨ បាននិយាយថា ៖ «យើងមានការព្រួយបារម្ភយ៉ាងខ្លាំងលើការព្យួរប្រព័ន្ធអនុគ្រោះពន្ធ EBA ដែលនឹងជះផលអវិជ្ជមានដោយផ្ទាល់និងប្រយោលដល់ជីវភាពរស់នៅនិងសុខុមាលភាពរបស់ពលរដ្ឋ និងការអភិវឌ្ឍនៅកម្ពុជាទាំងមូល។»
អង្គការ សមាគម សហជីព សហគមន៍ ទាំងនេះ បានសម្ដែងការជឿជាក់ថា ស្ថានភាពអាក្រក់នេះអាចបញ្ជៀសបាន បើសិនជារដ្ឋាភិបាលប្រឹងប្រែងបំពេញកាតព្វកិច្ចរបស់ខ្លួនចំពោះប្រជាពលរដ្ឋ។
សម្តេច ហ៊ុន សែន នាយករដ្ឋមន្ត្រីកម្ពុជា ក្នុងពិធីសំណេះសំណាលជាមួយកម្មករនៅខេត្តពោធិ៍សាត់ នាព្រឹកថ្ងៃពុធនេះ បានមានប្រសាសន៍ថា សម្ដេចស្វាគមន៍ការមកដល់របស់គណ:ប្រតិភូអឺរ៉ុប ហើយប្រាប់កម្មករកុំឲ្យព្រួយបារម្ភ។
សម្តេច ហ៊ុន សែន បាននិយាយដូច្នេះថា «ឮសូរថា គេបញ្ជូននរណាមកដោះស្រាយរឿង EBA អើ! មកដោះទៅ ហ៊ុន សែន ដើរជួបកម្មករ នៅតែដើរជួបកម្មករ កសិករនៅតែកសិករ អ្នកណាធើអីធើហ្នុង រឿងអ្នកឯង ចូលទៅជំនុំជាមួយនរណា រឿងអ្នកហ្នុងទៅ តែរឿងសម្រេចចុងក្រោយ នាយករដ្ឋមន្រ្តី ហ៊ុន សែន តែម្តង អាហ្នឹងរឿងវាអ៊ីចឹង។»
សម្ដេច ហ៊ុន សែន មានប្រសាសន៍យ៉ាងដូច្នេះ ៖ «ហើយពូមកជួបថ្ងៃនេះ ពូបានផ្តាំជាមួយក្មួយៗនៅកោះកុង និងក្មួយៗនៅកន្លែងដទៃទៀត បើក្មួយនៅតែមានការងារធ្វើ មានប្រាក់ចំណូល ក្មួយៗកុំខ្វល់អាណានិយាយពីអី»៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
