ស្ថិតិពាណិជ្ជកម្មរបស់ក្រសួងពាណិជ្ជកម្ម បានបង្ហាញថា កម្ពុជា រកចំណូលបានប្រមាណ១២លានដុលា្លរពីការនាំចេញម្រេចទៅកាន់ទីផ្សារអន្តរជាតិ នៅក្នុងរយៈពេល៥ខែ ឆ្នាំ២០២៥ មានការធ្លាក់ចុះជាង៤៦% បើធៀបនឹងរយៈពេលដូចគ្នាកាលពីឆ្នាំមុន ដែលមានទំហំជិត២៣លានដុល្លារ។ ជុំវិញការធ្លាក់ចុះនេះ ត្រូវបានលោក ម៉ាក់ នី ប្រធានសហព័ន្ធម្រេច និងគ្រឿងទេសកម្ពុជា អះអាងថា គឺដោយសារកសិករមួយចំនួនបានផ្អាកការលក់ម្រេចទៅឱ្យឈ្មួញ ក្រោយតម្លៃម្រេចធ្លាក់ចុះខ្លាំងនៅចុងរដូវប្រមូលផលនេះ គួបផ្សំក្រុមហ៊ុននាំចេញមួយចំនួនបានផ្អាកការប្រមូលទិញម្រេចពីកសិករ ក្រោយវៀតណាម ដែលជាទីផ្សារម្រេចដ៏ធំមួយរបស់កម្ពុជា បានកាត់បន្ថយការនាំចេញម្រេចទៅកាន់ទីផ្សារអាម៉េរិក ដោយសារបញ្ហាពន្ធ។ បើតាមលោក ម៉ាក់ នី តម្លៃម្រេចបច្ចុប្បន្នបានធ្លាក់ចុះមកនៅត្រឹមប្រមាណ១ម៉ឺន៧ពាន់រៀលក្នុង១គីឡូក្រាម ខណៈកាលពីឆ្នាំមុនមានតម្លៃប្រមាណ២ម៉ឺន៥ពាន់រៀលក្នុង១គីឡូក្រាម។
ជាមួយគ្នានេះ លោក វន ដេវីត កសិករដាំម្រេចនៅខេត្តត្បូងឃ្មុំ បានឱ្យដឹងថា ការធ្លាក់ចុះនៃការនាំចេញនេះ គឺដោយសារឈ្មួញប្រមូលទិញម្រេចពីវៀតណាម ដើរប្រមូលទិញម្រេចមិនសូវបាន ដ្បិតថា ទិន្នផលម្រេចនៅកម្ពុជា មានការធ្លាក់ចុះនៅប៉ុន្មានឆ្នាំចុងក្រោយនេះ ដោយសារកសិករបោះបង់ការដាំដុះច្រើន គួបផ្សំឈ្មួញទាំងនោះទទួលដំណឹងថា កម្ពុជា អាចនាំចេញម្រេចទៅទីផ្សារចិន ដោយផ្ទាល់ បានជំរុញឱ្យពួកគេមួយចំនួនផ្អាកការចុះមកប្រមូលទិញ។ ប៉ុន្តែយ៉ាងណាចំពោះការនាំចេញម្រេចដោយផ្ទាល់ទៅទីផ្សារចិន កសិករដាំម្រេចរូបនេះ អះអាងថា ហាក់មិនសូវមានក្រុមហ៊ុនណាចុះមកប្រមូលទិញដើម្បីនាំចេញទៅចិន ឱ្យបានផុសផុល និងច្បាស់លាស់នៅឡើយទេ មកទល់ពេលនេះ។
បើតាមការវាយតម្លៃរបស់លោក ម៉ាក់ នី ទិន្នផលម្រេចកម្ពុជា នៅឆ្នាំ២០២៥ អាចទទួលបានក្នុងរង្វង់ប្រមាណ១ម៉ឺន២ពាន់តោន ទៅ១ម៉ឺន៣ពាន់តោន មានការកើនឡើងតិចតួចបើធៀបនឹងទិន្នផលដែលទទួលបានកាលពីឆ្នាំមុន។ បច្ចុប្បន្នមានកសិករមួយចំនួនបានចាប់ផ្តើមបង្កើនការដាំដុះដំណាំម្រេចថ្មីឡើងវិញ ដូច្នេះលោករំពឹងថា វានឹងអាចជំនួសឱ្យម្រេច ដែលបានងាប់ច្រើននាពេលកន្លងមក ដែលនឹងអាចធានាដល់និរន្តភាពនៃការផ្គត់ផ្គង់ម្រេចរបស់កម្ពុជា៕
