បើយោងតាមការចុះផ្សាយរបស់សារព័ត៌មាន the Edge នៅក្នុងវេទិកាដេញដោលជាសាធារណៈលើកដំបូងកាលពីថ្ងៃអង្គារ៍ សប្តាហ៍នេះ លោក ដូណាល់ ត្រាំ បេក្ខភាពប្រធានាធិបតីរបស់គណបក្សសាធារណរដ្ឋ និងអនុប្រធានាធិបតីគណបក្សប្រជាធិបតេយ្យ លោកស្រី កាម៉ាឡា ហារីស បានផ្ទុះសង្រ្គាមវោហារសព្ទយ៉ាងក្តៅគគុកជុំវិញបញ្ហាសេដ្ឋកិច្ច។
លោកស្រី ហារីស ដែលមានវ័យ៥៩ឆ្នាំ បានវាយប្រហារលើចេតនារបស់លោក ត្រាំ ដែលចង់ដាក់ចេញគោលនយោបាយសេដ្ឋកិច្ចសង្កត់លើបញ្ហាពន្ធលើទំនិញបរទេស ដោយលោកស្រីប្រដូចគោលនយោបាយនេះ ទៅនឹងការយកពន្ធពីប្រជាពលរដ្ឋថ្នាក់កណ្តាលរបស់អាម៉េរិក ហើយបានបង្វែរគោលនយោបាយនេះទៅជាគោលនយោបាយដែលមានលក្ខណៈសម្របសម្រួល ដើម្បីផ្តល់អត្ថប្រយោជន៍ជាពិសេសដល់ប្រជាពលរដ្ឋដែលមានចំណូលមធ្យម។
លោកស្រី ហារីស បានវាយបកថា ស្ថានភាពរញ៉េរញ៉ៃលើបញ្ហាពន្ធដែលបានដាក់ចេញដោយរដ្ឋបាលអាម៉េរិកក្រោមការដឹកនាំរបស់លោក ត្រាំ ពីឆ្នាំ២០១៧ ដល់ឆ្នាំ២០២១ បានធ្វើឲ្យរដ្ឋបាលអាម៉េរិកបច្ចុប្បន្នត្រូវដោះស្រាយបញ្ហាជាច្រើនរាប់តាំងពីបញ្ហាអត់ការងារធ្វើដ៏អាក្រក់បំផុត។ លោកស្រីបានបន្តថា មកដល់ពេលនេះរដ្ឋបាលបច្ចុប្បន្ននៅតែបន្តសម្អាតភាពរញ៉េរញ៉ៃនេះមិនទាន់ចប់នៅឡើយទេ។
ដោយឡែកលោក ត្រាំ ដែលមានវ័យ៧៨ឆ្នាំ បានរិះគន់លោកស្រី ហារីស ពីបញ្ហាអតិផរណា ជាពិសេស គឺនៅក្នុងរដ្ឋបាលលោក ចូ បៃដិន។ លោកបានលើកឡើងថា អតិផរណាបានក្លាយជាបញ្ហា និងកេរដំណែលនៃគ្រោះមហន្តរាយសម្រាប់ពលរដ្ឋអាម៉េរិកគ្រប់រូប។
អ្នកវិភាគយល់ឃើញថា សង្រ្គាមវោហារសព្ទនេះ គឺជាការប៉ះទង្គិចលើកទី១ ហើយអ្នកទាំងពីរនឹងបន្តជួបគ្នាដោយផ្ទាល់ និងប្រយោលបន្តទៀតនៅក្នុងរយៈពេល៨សប្តាហ៍ទៅមុខទៀត ទម្រាំដល់ពលរដ្ឋអាម៉េរិកត្រូវសម្រេចចិត្តតាមការបោះឆ្នោតនៅថ្ងៃទី៥ ខែវិច្ឆិកា។
នៅក្នុងយុទ្ធនាការឆ្ពោះទៅរកការបោះឆ្នោតនៅពេលក្រោយៗទៀត លោក ត្រាំ ត្រូវបានគេរំពឹងថា នឹងរិះគន់លោកស្រី ហារីស ពាក់ព័ន្ធនឹងការផ្លាស់ប្តូរគោលជំហរគោលនយោបាយរបស់ លោកស្រី ជាបន្តបន្ទាប់ ក៏ដូចជាសំណល់នៃបញ្ហាសេដ្ឋកិច្ចនៅក្នុងរដ្ឋបាលលោក ចូ បៃដិន ជាដើម ប៉ុន្តែលោកស្រី ហារីស នឹងវាយបកលើបញ្ហារើសអើងលើស្រ្តី និងជាតិសាសន៍ គោលនយោបាយអភិរក្សនិយម ដែលស្នើឱ្យពង្រីកអំណាចប្រតិបត្តិ និងការលុបបំបាត់បទប្បញ្ញត្តិបរិស្ថានជាដើម៕
ដោយៈ សរ សុជាតិ
