យ៉ាងណាមិញ ថ្មីៗនេះ ធនាគារកណ្ដាលចិន បានពន្យារពេលការដំឡើងប្រាក់កម្ចីគោលសម្រាប់រយៈពេលមធ្យម ខណៈដែលប្រទេសនេះកំពុងរក្សាអត្រាការប្រាក់ឱ្យនៅទ្រឹងបន្ដទៀត ដើម្បីធ្វើយ៉ាងណាបង្កើនលក្ខខណ្ឌហិរញ្ញវត្ថុឲ្យនៅធូររលុង ដើម្បីជួយដល់សេដ្ឋកិច្ច ដែលបាននិងកំពុងរងគ្រោះដោយជំងឺរាតត្បាតកូវីដ១៩។ នេះបើតាមការចេញផ្សាយរបស់ទីភ្នាក់ងាររ៉យទ័រ។
ធនាគារប្រជាជនចិន (PBOC) ដែលជាធនាគារកណ្ដាលរបស់ចិននោះ បានរក្សាអត្រាការប្រាក់សម្រាប់ប្រាក់កម្ចីរយៈពេលមធ្យម (MLF) ពេញមួយឆ្នាំ ដែលគ្របដណ្ដប់លើទំហំទឹកប្រាក់កម្ចីសរុបប្រហែល៧០ពាន់លានដុល្លារ នៃស្ថាប័នហិរញ្ញវត្ថុមួយចំនួន នៅក្នុងអត្រាការប្រាក់ ២,៧៥% ដោយគ្មានការប្រែប្រួលអ្វីឡើយពីប្រតិបត្តិការពីលើកមុន។
អត្ថបទគួរអាន
ធនាគារប្រជាជនចិន បាននិយាយនៅក្នុងសេចក្តីថ្លែងការណ៍តាមអ៊ិនធឺណិតថា ការចាក់បញ្ចូលសាច់ប្រាក់នេះ គឺដើម្បី«រក្សាសាច់ប្រាក់របស់ប្រព័ន្ធធនាគារឱ្យបានគ្រប់គ្រាន់» និង«បំពេញតម្រូវការស្ថាប័នហិរញ្ញវត្ថុឱ្យបានពេញលេញ»។
លោក ម៉ាកូ ស៊ុន (Marco Sun) ប្រធានអ្នកវិភាគទីផ្សារហិរញ្ញវត្ថុនៅធនាគារ MUFG (ប្រទេសចិន) បាននិយាយថា ការពន្យារនៃការដំឡើងអត្រាការប្រាក់នេះ គឺជាសញ្ញាមួយបង្ហាញថាធនាគារកណ្តាលរបស់ចិននឹងបន្តរក្សាជំហរគោលនយោបាយរូបិយវត្ថុដ៏ធូររលុងមួយ ដោយលោកកត់សម្គាល់ថាសេដ្ឋកិច្ចបាននិងកំពុងប្រឈមមុខនឹងបញ្ហាប្រឈមដ៏ធំនៅក្នុងឆ្នាំនេះ។
ការស្ទង់មតិរបស់ទីភ្នាក់ងាររ៉យទ័របានបង្ហាញថា GDP សម្រាប់ត្រីមាសទី៣របស់ប្រទេសចិន ទំនងជានឹងបង្ហាញពីបញ្ហាប្រឈមកាន់តែខ្លាំង ដែលប្រទេសនេះកំពុងប្រឈមមុខនឹងតម្រូវការក្នុងស្រុកចុះខ្សោយ និងការធ្លាក់ចុះកំណើនសេដ្ឋកិច្ចពិភពលោក។
សូមបញ្ជាក់ថា បើតាមការព្យាករថ្មីចុងក្រោយមួយរបស់ធនាគារអភិវឌ្ឍន៍អាស៊ី កំណើនផលិតផលក្នុងស្រុកសរុបពិតរបស់ប្រទេសចិន នឹងមានកំណើនយឺត មកនៅត្រឹម ៣,៣% នៅឆ្នាំ២០២២ បន្ទាប់ពីបានកើនឡើង៨,១% កាលពីឆ្នាំ២០២១៕
អត្ថបទ៖ សុខ ជា
