ទីភ្នាក់ងារព័ត៌មានរ៉យទ័របានរាយការណ៍កាលពីខែធ្នូថា រដ្ឋាភិបាលទីក្រុងប៉េកាំងបានកំណត់ថវិកាចំនួន ១៤០ ពាន់លានដុល្លារលើការឧបត្ថម្ភធនក្នុងការទិញឧបករណ៍ផលិតបន្ទះឈីបក្នុងស្រុក ហើយវាទំនងជានឹងផ្តល់អត្ថប្រយោជន៍ដល់ក្រុមហ៊ុនផលិតដូចជា ក្រុមហ៊ុនឯកទេសផ្នែកឧបករណ៍អេឡិចត្រូនិកតែមួយគត់របស់ប្រទេសចិន គឺក្រុមហ៊ុន (Shanghai Micro Electronics Equipment Group) (SMEE) ជាដើម។
ការចំណាយនេះគឺ ដើម្បីឆ្លើយតបទៅនឹងសហរដ្ឋអាមេរិក ដែលកំពុងបង្កើនសកម្មភាពកាន់តែរឹតបន្តឹងការនាំចេញនៃបច្ចេកវិទ្យាបន្ទះឈីបទំនើបៗរបស់ខ្លួន ដែលអាមេរិកមានការភ័យខ្លាចថា បន្ទះឈីបទាំងនោះអាចនឹងត្រូវបានប្រើប្រាស់នៅក្នុងបច្ចេកវិទ្យា AI ក្នុងវិស័យយោធាចិន។
អត្ថបទគួរអាន
យ៉ាងណាមិញ ដើម្បីបង្កើនផលិតកម្មនៃវិស័យបន្ទះឈីបដែលគេចាត់ទុកថា ជាផ្នែកមួយសំខាន់បំផុតក្នុងទសវត្សរ៍ទី២១នេះ នៃការប្រកួតប្រជែងផ្នែកបច្ចេកវិទ្យារវាងមហាអំណាចចិន និងសហរដ្ឋអាមេរិកនោះ រដ្ឋាភិបាលទីក្រុងប៉េកាំងបានជះលុយដ៏ច្រើនមហាសាលក្នុងការប្រកួតប្រជែងជាមួយប្រទេសលោកខាងលិច ប៉ុន្តែវាហាក់មិនមានប្រសិទ្ធភាពនោះឡើយ។
ជាក់ស្តែង បើតាមអ្នកឃ្លាំមើលបញ្ហានេះបានឱ្យដឹងថា ក្រុមហ៊ុនឯកទេសផ្នែកឧបករណ៍អេឡិចត្រូនិករបស់ចិន SMEE ក៏ដូចជាសហគ្រាសធុនតូច និងមធ្យមក្នុងស្រុកចិនភាគច្រើនលក់ទៅឱ្យក្រុមហ៊ុនផលិតបន្ទះសៀគ្វីក្នុងស្រុក ហើយផលប៉ះពាល់នៃការខ្វះខាតផលិតកម្មបន្ទះឈីបទំនើបៗបានធ្វើឱ្យចិនមានការលំបាកខ្លាំងណាស់ក្នុងការឈរជើងរឹងមាំដោយខ្លួនឯងសម្រាប់បច្ចេកវិទ្យាកម្រិតខ្ពស់ និងតម្លៃនៃការផ្លាស់ប្តូរខ្សែចង្វាក់ផ្គត់ផ្គង់ ព្រមទាំងកម្មករក្នុងវិស័យនេះតែម្តង ពោលគឺមិនដូចក្រុមហ៊ុផលិតបន្ទះឈីបតៃវ៉ាន់ (TSMC) និងក្រុមហ៊ុឈីបបស់កូរ៉េខាងត្បូ Samsung នោះទេ ដែលមានម្ចាស់ការលើខ្លួនឯង។
យោងតាម លោក Mark Li ដែលតាមដានវិស័យបន្ទះឈីបរបស់ប្រទេសចិននៅវិទ្យស្ថានស្រាវជ្រាវ Bernstein បាននិយាយថា៖ «ការខ្វះខាតនៃផលិតកម្មបន្ទះឈីបទំនើបៗនេះហើយបានរារាំងដល់ការស្រាវជ្រាវនិងអភិវឌ្ឍន៍ (R&D) ដើម្បីប្រែខ្លួនឱ្យក្លាយជាក្រុមហ៊ុនផលិតកម្មមួយដ៏ធំ ដែលឈរដោយខ្លួនឯងបាន»។
