លោក Lavaron Sangsnit អគ្គនាយកនៃអគ្គនាយកដ្ឋានចំណូលថៃ ដែលត្រូវបានស្រង់សម្ដីមកចុះផ្សាយដោយសារព័ត៌មានបាងកកប៉ុស្ដិ៍បាននិយាយថា គណៈរដ្ឋមន្ត្រីថៃបានអនុម័តលើសេចក្តីព្រាងច្បាប់នេះ ក្រោយពីវាត្រូវបានផ្តួចផ្តើមចងក្រង ឡើងដោយសមាជិកនៃអង្គការសម្រាប់កិច្ចសហប្រតិបត្តិការ និងអភិវឌ្ឍន៍សេដ្ឋកិច្ច ដែលហៅកាត់ថា OECD។
សេចក្តីព្រាងច្បាប់នេះបានឆ្លងផុតដំណាក់កាលពិភាក្សាលើកដំបូងនៅក្នុងសភាតំណាងរាស្រ្តថៃរួចហើយ ប៉ុន្តែទម្រាំច្បាប់នេះឆ្លងកាត់ស្ថាប័ននិតិបញ្ញត្តិថៃរហូតដល់បីដំណាក់កាល ហើយពង្រាងច្បាប់នេះត្រូវបានគេរំពឹងថា នឹងចូលជាធរមាននៅឆ្នាំ ២០២៤ខាងមុខ។
នៅក្រោមគោលការណ៍នៃអង្គការសម្រាប់កិច្ចសហប្រតិបត្តិការ និងអភិវឌ្ឍន៍សេដ្ឋកិច្ច បន្ទាប់ពីពង្រាងច្បាប់នេះត្រូវបានផ្តល់សច្ចាប័ន ប្រទេសហត្ថលេខីនានានឹងចែករំលែកព័ត៌មានអំពីគណនីប្រាក់បញ្ញើរបស់បុគ្គលម្នាក់ៗក្នុងចំណោមប្រទេសរវាងគ្នាទៅវិញទៅមក។
អត្ថបទគួរអាន
សម្រាប់ប្រទេសថៃ នៅពេលដែលច្បាប់នេះចូលជាធរមាន ប្រជាជនថៃ ដែលមានគណនីបញ្ញើក្នុងប្រទេសហត្ថលេខីទាំងនេះ នឹងមានព័ត៌មានគណនីធនាគាររបស់ពួកគេផ្ញើទៅអគ្គនាយកដ្ឋានចំណូលថៃ ដើម្បីពិនិត្យទាក់ទងនឹងការបង់ពន្ធ។
ការអនុវត្តដូចគ្នានេះក៏នឹងត្រូវអនុវត្តចំពោះជនបរទេសមកពីប្រទេសហត្ថលេខី ដែលមានគណនីប្រាក់បញ្ញើនៅប្រទេសថៃផងដែរ។
លោក Lavaron បាននិយាយថា អគ្គនាយកដ្ឋាននឹងពិភាក្សាជាមួយភ្នាក់ងារក្នុងស្រុកអំពីរបៀបរៀបចំសម្រាប់ការអនុវត្តច្បាប់នេះ។
លោកបាននិយាយថា លោកជឿជាក់លើកិច្ចសហប្រតិបត្តិការជាមួយប្រទេសដែលជាសមាជិកនៃអង្គការ OECD ហើយក៏រំពឹងថា ច្បាប់នេះនឹងត្រូវបានពង្រីកដើម្បីគ្របដណ្តប់ទ្រព្យសម្បត្តិផ្សេងទៀត ខណៈដែលអង្គការ OECD បានកំពុងជំរុញឱ្យមានកំណែទម្រង់ប្រព័ន្ធពន្ធជាសកលផងដែរ។
