តើថៃ អាចប្រឈមនឹងបញ្ហាអ្វីខ្លះ បើបន្តពន្យារពេលក្នុងការដោះលែងទាហានកម្ពុជា ទាំង១៨រូប?

លោកបណ្ឌិត គិន ភា អ្នកជំនាញវិទ្យាសាស្រ្តនយោបាយ កត់សម្គាល់ឃើញថា ភាគីថៃ​ហាក់មិនមានសុច្ឆន្ទៈ​ក្នុងការគោរពកិច្ចព្រៀមព្រៀងសន្តិភាពនៅឡើយទេ មកទល់ពេលនេះ ពោលគឺថៃ មិនបានបង្ហាញសញ្ញាច្បាស់លាស់ណាមួយក្នុងការដោះលែងទាហានកម្ពុជា ទាំង១៨រូបនោះទេ ព្រមទាំងលើកឡើងនូវសំណើយ៉ាងហួសប្រមាណដាក់មកឱ្យកម្ពុជា។ សម្រាប់អ្នកជំនាញរូបនេះ ប្រសិនបើថៃ នៅតែបន្តគេចវេះមិនព្រមប្រគល់ទាហានទាំង១៨រូបមកឱ្យកម្ពុជា វិញទេនោះ ថៃនឹងបាត់បង់ទំនុកចិត្តពីសហគមន៍អន្តរជាតិ ពិសេសសហរដ្ឋអាម៉េរិក ដែលខិតខំបង្កើតឱ្យមានកិច្ចព្រមព្រៀងសន្តិភាពកម្ពុជា-ថៃឡើង ហើយប្រៀបដូចជាថៃ បានបំបាក់មុខប្រធានាធិបតីលោក ដូណាល់ ត្រាំ ផងដែរ ដូច្នេះអាចនឹងធ្វើឱ្យថៃរងឥទ្ធិពលអវិជ្ជមានណាមួយពីសហរដ្ឋអាម៉េរិក។

ជាមួយគ្នានេះ លោក សេក សុជាតិ អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ យល់ឃើញថា ការមិនព្រមដោះលែងទាហានកម្ពុជា ទាំង១៨រូបមកឱ្យកម្ពុជាវិញពីសំណាក់យោធាថៃ ក៏ដោយសារតែនាយករដ្ឋមន្រ្តីថៃ មិនមានអំណាចគ្រប់គ្រាន់លើកិច្ចការងារនេះ ព្រោះជាអំណាចរបស់យោធាថៃ ស្របពេលដែលថៃ មានចេតនាមិនចង់ទទួលយកកិច្ចព្រមព្រៀងសន្តិភាព ដែលមេដឹកនាំអាម៉េរិក និងអាស៊ានចង់ឃើញកម្ពុជា និងថៃ អនុវត្តបានយ៉ាងពេញលេញ។ បើតាមអ្នកជំនាញរូបនេះ កម្ពុជាគួរពិភាក្សាគ្នាជាមួយភាគីថៃ ឱ្យមានការកំណត់ពេលវេលាច្បាស់លាស់ក្នុងរយៈពេលខ្លីណាមួយក្នុងការបញ្ជូនទាហានទាំង១៨នាក់មកឱ្យកម្ពុជាវិញ ហើយក្នុងករណីភាគីថៃ នៅតែបន្តគេចវេះមិនព្រមដោះស្រាយកម្ពុជា ត្រូវស្នើទៅកាន់មេដឹកនាំសហរដ្ឋអាម៉េរិក និងអាស៊ាន ដើម្បីឱ្យពិភពលោកមើលឃើញអំពីទង្វើរបស់ថៃ ដែលមិនគោរពកិច្ចព្រមព្រៀងសន្តិភាព និងអំណាចរបស់មេដឹកនាំអាម៉េរិក។

ដោយឡែក លោក អំ សំអាត នាយកប្រតិបត្តិអង្គការសិទ្ធិមនុស្សលីកាដូ យល់ឃើញថា ទោះបីជាភាគីថៃ​ព្យាយាមលើក​ហេតុផលជាច្រើន ដើម្បីគេចវេះមិនព្រមដោះលែងទាហានទាំង១៨រូបមកឱ្យកម្ពុជាវិញយ៉ាងណាក្តី ប៉ុន្តែថៃ មិនអាចបន្តគេចវេះបែបនេះបានយូរទៀតនោះទេ ពោលគឺថៃ ត្រូវតែដោះលែងជាបន្ទាន់ និងគ្មានលក្ខខណ្ឌ ស្របទៅតាមលក្ខខណ្ឌដែលបានកំណត់នៅក្នុងកិច្ចព្រមព្រៀងសន្តិភាព បើមិនដូច្នេះទេថៃនឹងត្រូវរងសម្ពាធពីសហរដ្ឋអាម៉េរិក និងសហគមន៍អន្តរជាតិ ដែលបានដឹងលឺលើបញ្ហានេះ តួយ៉ាងសហរដ្ឋអាម៉េរិកថ្មីៗនេះ ក៏បានទទូចម្តងហើយម្តងទៀតឱ្យថៃ ដោះស្រាយបញ្ហានេះជាមួយកម្ពុជាឱ្យបានលឿនផងដែរ។

គួរជម្រាបថា នាយករដ្ឋមន្រ្តីថៃ លោក អានុទីន ឆាន់វីរៈគុល បានបញ្ជាក់ថា ថៃ បានត្រៀមខ្លួនរួចរាល់ហើយ ដើម្បីបញ្ជូនទាហានកម្ពុជា ទាំង១៨នាក់ ដែលកំពុងស្ថិតក្រោមការគ្រប់គ្រងរបស់ថៃ ឱ្យត្រឡប់មកកម្ពុជាវិញ នៅពេលដែលមានការពិនិត្យសុខភាពលើពួកគេរួចរាល់ ដើម្បីធានាបាននូវតម្លាភាព និងការប្រព្រឹត្តដោយមនុស្សធម៌ តែយ៉ាងណានាយករដ្ឋមន្រ្តីថៃ រូបនេះ មិនបានបញ្ជាក់អំពីពេលវេលាជាក់លាក់នោះទេ។ គិតត្រឹមថ្ងៃទី២៩ ខែតុលា ឆ្នាំ២០២៥ មានរយៈពេល៩២ថ្ងៃហើយ ដែលវីរៈកងទ័ពកម្ពុជា ចំនួន១៨រូបត្រូវបានចាប់ខ្លួន និងដាក់ឱ្យស្ថិតក្រោមការឃុំគ្រងរបស់យោធាថៃ៕

អត្ថបទ សោម ស្រីពេជ្រ​