យោងតាមអ្នកជំនាញ បានឱ្យដឹងថា ការធ្វើដុល្លារូបនីយកម្មនៅក្នុងសេដ្ឋកិច្ចវៀតណាម បានធ្លាក់ចុះយ៉ាងគំហុក ពោលគឺកាលពីមុនឆ្នាំ២០១០មានដល់កម្រិតដល់ទៅ ២០% ប៉ុន្ដែក្រោយពីនោះមានធ្លាក់មកនៅត្រឹម ១០% ប៉ុណ្ណោះ។
ជាមួយនឹងគោលនយោបាយរបស់រដ្ឋាភិបាលក្នុងការគ្រប់គ្រងអតិផរណា និងស្ថិរភាពអត្រាប្តូរប្រាក់នោះ អត្រាការប្រាក់នៃដាក់ប្រាក់បញ្ញើជាលុយដុង គឺតែងតែខ្ពស់ជាងការប្រាក់បញ្ញើជាប្រាក់ដុល្លារ ដែលបានជំរុញឱ្យមនុស្សត្រូវប្តូរលុយពីដុល្លារ ទៅជាលុយដុង ដើម្បីយកទៅដាក់នៅធនាគារ។ បច្ចុប្បន្ន អត្រាការប្រាក់ចំពោះការដាក់ប្រាក់បញ្ញើជាប្រាក់ដុល្លារ គឺ ០% ខណៈអត្រាការប្រាក់បញ្ញើលុយដុង គឺមានពី ៨% ដល់ ១០% ឯណោះក្នុង១ឆ្នាំ។
យ៉ាងណាមិញអ្នកជំនាញលើកឡើងថា បើទោះបីជាទទួលជោគជ័យយ៉ាងណាក៏ដោយ ប៉ុន្តែវៀតណាមនៅតែត្រូវការបន្តមានគោលនយោបាយគ្រប់គ្រងទីផ្សារ ដោយសារតែទីផ្សារនៅតែជាកត្តាជះឥទ្ធិពលដល់គោលដៅនៃការកំណត់ដុល្លារូបនីយកម្មនៅក្នុងសេដ្ឋកិច្ច។
សេដ្ឋវិទូលោក Do Duy Cuong បាននិយាយថា ការបង្កើនដុល្លារូបនីយកម្ម នឹងធ្វើឱ្យទីផ្សារប្តូរប្រាក់បរទេសគ្មានស្ថិរភាព ដែលបណ្តាលឱ្យមានឱនភាពពាណិជ្ជកម្ម និងអតិផរណាកើនឡើង ព្រមទាំងប៉ះពាល់អវិជ្ជមានដល់ទំនុកចិត្តក្នុងរូបិយបណ្ណជាតិ។ ជាមួយគ្នានោះ ទុនបម្រុងអន្តរជាតិក៏នឹងត្រូវកាត់បន្ថយផងដែរ។
អត្ថបទគួរអាន
លោកបន្តថា វាចាំបាច់ណាស់ក្នុងការបន្តស្ថិរភាពតម្លៃប្រាក់ដុង និងប្រើប្រាស់ឧបករណ៍គោលនយោបាយរូបិយវត្ថុ ដើម្បីជះឥទ្ធិពលដល់ស្ថានភាពទីផ្សារ ដូច្នេះវានឹងធ្វើឱ្យប្រាក់ដុង ទាក់ទាញជាងប្រាក់ដុល្លារ។ យ៉ាងណាមិញ គោលនយោបាយអត្រាការប្រាក់ត្រូវតែមានគោលដៅបង្កើត និងរក្សាអត្រាការប្រាក់វិជ្ជមាននៅចន្លោះរវាងការដាក់ប្រាក់បញ្ញើជាលុយដុង និងលុយដុល្លារ។
ក្រៅពីប្រាក់ដុល្លារដែលគ្រប់គ្រងបានល្អប្រសើរហើយនោះ មាសក៏ត្រូវបានរឹតត្បិតនៅក្នុងប្រទេសវៀតណាមផងដែរ នៅក្រោមច្បាប់ស្តីការគ្រប់គ្រងអាជីវកម្មមាស។ ជាការពិត មាសលែងជាមធ្យោបាយទូទាត់ទៀតហើយ ហើយតម្រូវការពិតប្រាកដនោះ គឺជាគ្រឿងអលង្កា អំណោយ ឬទ្រព្យសំណាងអ្វីមួយ។
លោក Do Minh Phu ប្រធានក្រុមហ៊ុន DOJI បាននិយាយថា មុនឆ្នាំ២០១២ តម្លៃមាសបានបន្តផ្លាស់ប្តូរមិនទៀងទាត់ ដែលបង្កផលប៉ះពាល់ដ៏អាក្រក់ចំពោះសេដ្ឋកិច្ច។ ប៉ុន្តែចាប់តាំងពីធនាគារកណ្តាលវៀតណាមអនុវត្តច្បាប់នេះមក ទីផ្សារមាសត្រូវបានគ្រប់គ្រងយ៉ាងមានប្រសិទ្ធភាព ដោយស្ដង់ដារច្បាប់ដែលបានកំណត់។
ក្រុមអ្នកជំនាញបាននិយាយថា មាស និងទីផ្សារប្តូរប្រាក់បរទេស គឺមានស្ថិរភាព ជាង១០ឆ្នាំមកហើយ ដែលធ្វើឱ្យវៀតណាមមានសកម្មភាពរស់រវើក ទោះក្នុងភាពមិនច្បាស់លាស់នៃទីផ្សារសាកលដែលកំពុងមានវិបត្តិក៏ដោយ៕
អត្ថបទ ៖ នៅ សំភី
