តាមរយៈការចូលក្នុងផ្សារមូលបត្រនេះដែរ ក្រុមហ៊ុននឹងអាចជួយជំរុញ និងចែកចាយព័ត៌មានដល់ប្រជាពលរដ្ឋឱ្យមានការយល់ដឹងអំពីការទិញ-លក់ផ្សារភាគហ៊ុននេះផងដែរ។ ជាក់ស្តែងក្រុមហ៊ុនលីលីហ្វូត បានត្រៀមខ្លូនរួចជាស្រេច ដោយគម្រោងចូលរួមបោះផ្សាយលក់មូលបត្រដំបូងនេះ ក្រុមហ៊ុន លីលីហ្វូត គ្រោងបោះផ្សាយលក់ភាគហ៊ុនប្រមាណចំនួន១០% នៃភាគហ៊ុនសរុប។
ជំទាវឧកញ៉ា កែវ មុំ ប្រធានក្រុមប្រឹក្សាភិបាលក្រុមហ៊ុនផលិតនំស្រួយលីលី បានបញ្ជាក់ប្រាប់ខេមបូណូមីសថា ក្រុមហ៊ុន លីលីហ្វូត មានគោលបំណងក្នុងការចូលរួមក្នុងទីផ្សារមូលបត្រនេះជាយូរណាស់មកហើយ តាំងពីរាជរដ្ឋាភិបាលបានបង្កើតផ្សារមូលបត្រដំបូងមកម្លេះ ប៉ុន្តែដោយសារមានផលលំបាកមួយចំនួនទើបមិនទាន់អាចចូលរួមបាន។ បើតាម ជំទាវឧកញ៉ា កែវ មុំ នៅរយៈពេលប៉ុន្មានឆ្នាំដែលទីផ្សារមូលបត្របានបង្កើតឡើង អ្នកដែលចូលរួមក្នុងទីផ្សារមូលបត្រ ក៏ដូចជាអ្នកទិញ-លក់ មូលបត្រនេះ ហាក់នៅមានកម្រិតនៅឡើយ។ ដូចនេះ ប្រសិនបើ ក្រុមហ៊ុន លីលីហ្វូត អាចចូលក្នុងទីផ្សារមូលបត្រ វាគឺជាឱកាសមួយដែលក្រុមហ៊ុន លីលីហ្វូត អាចជួយជំរុញ និងចែកចាយព័ត៌មានដល់ប្រជាពលរដ្ឋឱ្យមានការយល់ដឹងអំពីការទិញ-លក់ទីផ្សារមូលបត្រនេះផងដែរ។
អត្ថបទគួរអាន
ឧកញ៉ា កែវ មុំ អះអាងថា ក្រុមហ៊ុន លីលីហ្វូត មានគោលជំហរយ៉ាងមុតម៉ាំក្នុងការចូលខ្លួនក្នុងទីផ្សារមូលបត្រ ដោយក្រុមហ៊ុនបានត្រៀមខ្លួនរួចរាល់ជាស្រេច ដូចជាគណនេយ្យភាព ស្តង់ដារគុណភាព សុវត្ថិភាព ក៏ដូចជាស្តង់ដារផ្សេងៗទៀត និងគម្រោងផែនការអភិវឌ្ឍន៍ក្រុមហ៊ុន លីលីហ្វូតឱ្យកាន់តែរីកធំបន្ថែមទៀតផងដែរ។ តាមគម្រោងក្រុមហ៊ុន លីលីហ្វូត អាចនឹងបោះផ្សាយលក់មូលបត្រកម្មសិទ្ធិលើកដំបូងរបស់ខ្លួននៅ ឆ្នាំ២០២៣ ខណៈចំនួនភាគហ៊ុនដែលគ្រោងបោះផ្សាយក្នុងជំហ៊ានដំបូងប្រមាណ ១០% នៃចំនួនភាគហ៊ុនសរុបរបស់ក្រុមហ៊ុន និងមើលជាក់ស្តែងទៅលើការបោះផ្សាយលក់មូលបត្រកម្មសិទ្ធិដំបូងសិន ប្រសិនជាមានការដំណើរការរលូន និងជោគជ័យនោះ និងមានការបន្តការពង្រើកការបោះផ្សាយបន្ថែមផងដែរ។
បើតាម ឯកឧត្តម ស៊ូ សុជាតិ ប្រភិរាជរដ្ឋាភិបាលទទួលបន្ទុក ជាអគ្គនាយកនៃនិយ័តករមូលបត្រកម្ពុជាបានឱ្យដឹងថា ក្រៅតែពីក្រុមហ៊ុនរបស់ជំទាវឧកញ៉ា កែវ មុំ ក៏មានក្រុមហ៊ុន ម៉េងលី ជេ. គួច អេឌ្យូខេសិនរបស់អ្នកឧកញ៉ា គួច ម៉េងលី ក៏មានផែនការនឹងបោះផ្សាយលក់មូលបត្រនៅឆ្នាំក្រោយនេះដែរ។ ឯកឧត្តម ស៊ូ សុជាតិ បញ្ជាក់បន្ថែមថា ការឈានជើងចូលរបស់ក្រុមហ៊ុនទាំងពីរ នៅក្នុងផ្សារហ៊ុនកម្ពុជា គឺជាសញ្ញាវិជ្ជមានមួយដែលបង្ហាញថា ជាដំណាក់កាលមួយ ដែលក្រុមហ៊ុនចាប់ផ្តើមការកំរើកខ្លួននូវការរួចរាល់តែម្តង សម្រាប់ការឈានជើងចូលទីផ្សារមូលបត្រ។ បើតាមឯកឧត្តម ស៊ូ សុជាតិ ក្រុមហ៊ុនទាំងពីរអាចនឹងចូលរួមបោះផ្សាយមូលបត្រនេះនៅក្នុងឆមាសទី១ ឆ្នាំ២០២៣។
គួរបញ្ជាក់ថា បច្ចុប្បន្នផ្សារមូលបត្រកម្ពុជា ទទួលបានក្រុមហ៊ុនចុះបញ្ជីសរុបចំនួន១៦ក្រុមហ៊ុន។ ក្នុងនោះ ៩ក្រុមហ៊ុនចុះបញ្ជីលក់ភាគហ៊ុន និង៧ក្រុមហ៊ុនចុះបញ្ជីលក់សញ្ញាបណ្ណ ឬបណ្ណបំណុល៕
