មានទំហំប្រមាណ ២៩% នៃ GDP សកលលោក កិច្ចព្រមព្រៀង RCEP បានហត្ថលេខារួចរាល់ហើយ កាលពីចុងសប្តាហ៍កន្លងទៅនេះ
ក្រោយពីចុះហត្ថលេខាលើកិច្ចព្រមព្រៀងនេះ ប្រទេសថៃ រំពឹងនឹងទទួលបានការជំរុញសេដ្ឋកិច្ច ជាពិសេសការនាំចេញ និងវិស័យទេសចរណ៍បន្ថែមទៀត ដោយកិច្ចព្រមព្រៀងនេះ នឹងបង្កើតប្លុកពាណិជ្ជកម្មសេរី ធំជាងគេបង្អស់លើសកលលោក ដែលមាន GDP សរុប ២៦ទ្រីលានដុល្លារអាមេរិក ស្មើនឹងប្រមាណ ២៩% នៃ GDP សកលលោក ហើយក៏មានប្រជាជនសរុបជាង ២ពាន់ ២រយលាននាក់ផងដែរ។
វិស័យឯកជននៅក្នុងប្រទេសថៃ បានលើកឡើងថា អត្ថប្រយោជន៍សំខាន់ជាងគេរបស់ កិច្ចព្រមព្រៀង RCEP នេះគឺការបង្កើតតំបន់នីយកម្ម ដោយជោគជ័យ ដែលអាចនឹងជំនួស សាកលភាវូបនីយកម្ម នៅពេលណាមួយ ដែលមានជម្លោះ និងសម្ពាធពីសង្គ្រាមពាណិជ្ជកម្មសកល ឬវិបត្តិមេរោគឆ្លងជាដើម។
អត្ថបទទាក់ទង!
លើសពីនេះ កិច្ចព្រមព្រៀងមួយនេះ ក៏ត្រូវបានគេរំពឹងថា នឹងជួយឲ្យ ប្រទេសថៃអាចបង្កើនទំនាក់ទំនងអន្តរជាតិ ជំរុញកំណើនវិស័យដឹកជញ្ជូន ជំរុញឲ្យការគ្រប់គ្រងហិរញ្ញវត្ថុ និងការវិនិយោគនៅក្រៅប្រទេស ក៏ដូចជាពង្រឹងវិស័យទេសចរណ៍ និងវិស័យកសិកម្មជាដើម។
ដោយសារតែថៃមានសក្តានុពលនៃការប្រកួតប្រជែងខ្ពស់ ថៃក៏រំពឹងនឹងទទួលបានការវិនិយោគពី បណ្តាប្រទេសមិនមែនក្នុងតំបន់អាស៊ាន ចូលមកវិនិយោគនៅក្នុងគ្រឿងបន្លាស់យានយន្ត គីមីឥន្ធនៈ វិស័យទេសចរណ៍ កសិកម្ម ម្ហូបអាហារ និងឧស្សាហកម្មលក់រាយជាដើម។
យ៉ាងណាក៏ដោយ ផលប្រយោជន៍ធំៗ សម្រាប់ GDP របស់ថៃ ពុំសូវមានច្រើននោះទេ ដោយសារតែ ការនាំចេញរបស់ថៃ ទៅកាន់បណ្តាប្រទេសក្នុងកិច្ចព្រមព្រៀង RCEPនេះ គឺទទួលបានការលើកទឹកចិត្តពន្ធពិសេសរួចទៅហើយ នៅក្នុងកិច្ចព្រមព្រៀងទ្វេភាគី។
ដោយឡែកយើងក្រឡេកមកមើលអំពី អត្ថប្រយោជន៍ ដែលប្រទេសវៀតណាម ទទួលបានវិញ គឺថា វៀតណាម រំពឹងបង្កើនការនាំចេញទំនិញកាន់តែច្រើនបន្ថែមទៀត ជាពិសេសគឺ ទំនិញមានគុណភាពខ្ពស់ បើទោះបីជាមានការប្រកួតប្រជែងខ្លាំងក៏ដោយ។
រដ្ឋមន្រ្តីក្រសួងឧស្សាហកម្ម និងពាណិជ្ជកម្មវៀតណាម បានគូសបញ្ជាក់ថា ទោះបីជាមានការកាត់ផ្តាច់ខ្សែចង្វាក់ផ្គត់ផ្គង់ដោយសារតែវិបត្តិមេរោគកូវីដ១៩ ក៏ដោយ កិច្ចព្រមព្រៀង RCEPនេះ នឹងជំរុញឲ្យមានការធ្វើសមាហរណកម្មសេដ្ឋកិច្ចនៅក្នុងតំបន់។
វិស័យឯកជនវៀតណាម បានលើកឡើងដែរថា ប្រទេសវៀតណាម នឹងទទួលបានអត្ថប្រយោជន៍ច្រើនជាងគេបង្អស់ ដោយសារតែ បណ្តាប្រទេសដែលបានចុះហត្ថលេខា គឺមានតម្រូវការមុខទំនិញសំខាន់ៗជាច្រើន ដែលវៀតណាមនាំចេញ ដូចជាផលិតផលកសិកម្ម និងជលផលជាច្រើនប្រភេទ។
សភាពាណិជ្ជកម្ម និងឧស្សាហកម្មវៀតណាម បានពន្យល់ដែរថា មុនពេលកិច្ចព្រមព្រៀងចូលជាធរមាន វៀតណាម បាននាំចូលវត្ថុធាតុដើមជាច្រើនមកពីប្រទេសចិន និងកូរ៉េខាងត្បូង ដោយពុំទទួលបានការអនុគ្រោះពន្ធនោះទេ ក៏ប៉ុន្តែក្រោយពីមានកិច្ចព្រមព្រៀងនេះ ចុះហត្ថលេខារួចរាល់ជាផ្លូវការនោះ វៀតណាម នឹងទទួលបានការអនុគ្រោះពន្ធពិសេសពីប្រទេសចិន កូរ៉េខាងត្បូង និងបណ្តាប្រទេសដទៃទៀត នៅក្នុងកិច្ចព្រមព្រៀងនេះ។
ទោះយ៉ាងណា វៀតណាម នៅតែត្រូវប្រឈមមុខនឹងបញ្ហាជាច្រើន ជាពិសេសគឺការប្រកួតប្រជែងនៅលើទីផ្សារអន្តរជាតិ ទាំងការនាំចេញត្រូវប្រកួតជាមួយមុខទំនិញចិន ហើយការនាំចូលផលិតផល មកក្នុងស្រុក ក៏ត្រូវប្រកួតជាមួយទំនិញចិនផងដែរ។
គួរជម្រាបដែរថា កិច្ចព្រមព្រៀងពាណិជ្ជកម្ម RCEP ត្រូវបានចាប់ផ្តើមចរចាតាំងពីឆ្នាំ ២០១៣ មក ដែលត្រូវបានចុះហត្ថលេខាដោយ សមាជិកអាស៊ាន ១០ប្រទេស រួមជាមួយប្រទេសអូស្រ្តាលី ប្រទេសចិន ប្រទេសជប៉ុន ប្រទេសកូរ៉េខាងត្បូង និងប្រទេស នូវែលសេឡង់ ហើយរំពឹងនឹងចូលជាធរមាន នៅពាក់កណ្តាលឆ្នាំ ២០២១ខាងមុខ។
កិច្ចព្រមព្រៀង ភាពជាដៃគូសេដ្ឋកិច្ចគ្រប់ជ្រុងជ្រោយតំបន់ ឬហៅកាត់ថា RCEP ត្រូវបានគេមើលឃើញថា គឺជាកិច្ចព្រមព្រៀងថ្នាក់តំបន់ដ៏ធំជាងគេបំផុតមួយរបស់ពិភពលោក ដែលមានប្រទេសចំនួន១៥ ក្នុងតំបន់អាស៊ីប៉ាស៊ីហ្វិកចូលរួម ដែលមានទំហំប្រមាណ២៩% នៃទំហំផលិតផលក្នុងស្រុកសរុប (GDP) របស់សកលោក៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
