បច្ចេកវិទ្យាថ្មី Metaverse គឺជាពិភពនិមិត្តមួយ ដែលអាចឱ្យមនុស្សមើលឃើញ និយាយឆ្លើយឆ្លងគ្នាបានតាមរយៈឧបករណ៍វែនតា VR ដោយមិនចាំបាច់ត្រូវជួបគ្នាផ្ទាល់។
ទីផ្សារ Metaverse សាកល កំពុងស្ថិតនៅលើផ្លូវមួយក្នុងការឈានដល់ទឹកប្រាក់ជិត៧៥ពាន់លានដុល្លារ នៅឆ្នាំ២០២៦ កើនឡើង ៥ដងឯណោះ។ នេះបើតាមការប៉ាន់ស្មានរបស់ក្រុមហ៊ុនស្រាវជ្រាវទីផ្សារអាមេរិក IDC សម្រាប់ពិភពនិមិត្ត (VR) និង ពិភពពិត (AR)។
សូមជម្រាបថា AR គឺជាបច្ចេកវិទ្យាដែលយើងត្រូវការស្មាតហ្វូនដើម្បីប្រើប្រាស់ នៅក្នុងនោះយើងអាចមើលឃើញនូវរូបភាពពិតៗ ដែលយើងមើលឃើញនឹងភ្នែកធម្មតា និងឃើញរូបភាពប្រឌិតដែលត្រូវបានអភិវឌ្ឍន៍ដោយកម្មវិធី Appរបស់ទូរស័ព្ទ។ ចំណែកឯ VR វិញគឺវាប្លែកពី AR បន្ដិចត្រង់ថា វានឹងនាំយើងទៅពិភពនិមិត្តសុទ្ធសាធតែម្តង មិនមានលាយជាមួយពិភពពិតខាងក្រៅដូចជា AR នោះទេ ហើយដើម្បីប្រើប្រាស់ VR បាន គឺយើងត្រូវចំណាយលុយបន្ថែមខាងក្រៅ ដូចជាការទិញវ៉ែនតា VR ជាដើម។
អត្ថបទគួរអាន
បើតាមក្រុមហ៊ុន IDC ឱ្យដឹងទៀតថា ឧបករណ៍សម្រាប់បម្រើឱ្យគម្រោង Metaverse ជាពិសេសគឺវែនតា 3D ដែលបង្ហាញចេញដោយក្រុមហ៊ុន Meta កាលពីខែមុននោះ គឺដើរតួនាទីដ៏សំខាន់បំផុតក្នុងពិភពនិមិត្តនេះ។
យោងតាមចំណាត់ថ្នាក់របស់ Nikkei និងក្រុមហ៊ុនស្ទង់មតិ Cyber Creative Institute បានបង្ហាញថា ក្រុមហ៊ុនកូរ៉េ LG Electronic បានបញ្ជូនពាក្យស្នើសុំប៉ាតង់ច្រើនជាងគេបំផុត ចាប់តាំងពីឆ្នាំ២០១៦មក ឡើងពីចំណាត់ថ្នាក់លេខ១១ កាលពីឆ្នាំ២០១៥។ បន្ទាប់មក គឺក្រុមហ៊ុន Samsung ស្ថិតនៅលេខរៀងទី២ នោះក៏ដោយសារតែបន្ទះអេក្រង់ និងបន្ទះឈីប គឺជាភាពខ្លាំងក្លាមួយរបស់ក្រុមហ៊ុនកូរ៉េខាងត្បូង។
ចំណែកក្រុមហ៊ុនយក្សចិន Huawei បានឡើងមកលេខរៀងទី៤ ដែលបានដាក់ស្នើសុំប៉ាតង់ច្រើនបំផុតទាក់ទងនឹងបច្ចេកវិទ្យាដំណើរការរូបភាព និងអេក្រង់ ខណៈពីមុនមក ក្រុមហ៊ុនយក្សចិននេះមិនធ្លាប់ជាប់ក្នុងបញ្ជីក្រុមហ៊ុនចំនួន២០ ដែលស្ថិតក្នុងកំពូលតារាងនេះឡើយ។
ក្រុមហ៊ុនអាមេរិក Meta ស្ថិតនៅលេខរៀងទី៣ និងក្រុមហ៊ុន Microsoft លេខរៀងទី៥ ព្រមទាំង Intel និង Apple ស្ថិតក្នុងកំពូលតារាង ១០ក្រុមហ៊ុន ខណៈ Sony ជាក្រុមហ៊ុនជប៉ុនតែមួយប៉ុណ្ណោះ ស្ថិតនៅលេខរៀងទី៦៕
