WHO មិនទាន់គាំទ្រឲ្យមាន«លិខិតឆ្លងដែនវ៉ាក់សាំង»សម្រាប់ការធ្វើដំណើរឡើយ

ប្រទេសជាច្រើនបានជ្រើសយកវិធានការណ៍នេះ ដើម្បីស្តារស្ថានការណ៍សេដ្ឋកិច្ច និងជាពិសេសទៅលើវិស័យទេសចរណ៍។

ប៉ុន្តែសំណួរសួរថា ហេតុអ្វីបានជា អង្គការសុខភាពពិភពលោកមិនគាំទ្រឲ្យមានចំណាត់ការនេះ?

មានមូលហេតុមួយចំនួន ដែលចំណាត់ខាងលើនេះ មិនគួរត្រូវបានយកមកប្រើប្រាស់នៅឡើយ សម្រាប់ការធ្វើដំណើរឆ្លងប្រទេស។ អះអាងដោយអ្នកជំនាញនៃ WHO លោកវេជ្ជបណ្ឌិត Michael Ryan បានដាក់ការព្រួយបារម្ភលើប្រសិទ្ធិភាពនៃវ៉ាក់សាំងកូវីដ-១៩។ គេនៅមិនទាន់ដឹងនៅឡើយទេថា តើវ៉ាក់សាំងនឹងចាប់ផ្តើមបង្ហាញពីប្រសិទ្ធិភាពនៅរយៈពេលប៉ុន្មាន ក្រោយពីការចាក់ ហើយទិន្នន័យទាំងនោះនៅកំពុងត្រូវបានគេប្រមូលពីតាមប្រទេសនានា ដែលបានផ្តើមកម្មវិធីចាក់វ៉ាក់សាំងនៅឡើយ។ លោកបានបន្ថែមថា មិនប្រាកដថា អ្នកដែលបានចាក់វ៉ាក់សាំងរួចសុទ្ធតែធានាបានថា នឹងមិនឆ្លង ឫមិនចម្លងកូវីដ-១៩នោះទេ អ្វីៗត្រូវទាមទារសុក្រិតភាព ហើយយើងនឹងធ្វើវាតាមដំណាក់កាល។

ម៉្យាងវិញទៀត អ្នកជំនាញអង្គការសុខភាពពិភពលោក បានពន្យល់ទៀតថា វ៉ាក់សាំងកូវីដ១៩ នៅមិនទាន់ផ្គត់ផ្គង់ទៅគ្រប់ប្រទេស និងគ្រប់ពលរដ្ឋទូទៅទាំងអស់ទេ។ នៅមានប្រទេសខ្លះ ពុំទាន់មានវ៉ាក់សាំងនៅឡើយ ហើយប្រទេសដែលមានវ៉ាក់សាំងទៀតសោត ក៏ចំនួននៃវ៉ាក់សាំងពុំទាន់អាចបំពេញតម្រូវការបាននៅឡើយ ដោយហេតុថា ចំនួនវ៉ាក់សាំងនៅមានកំណត់។

អ្នកជំនាញរូបនេះ សង្កត់ធ្ងន់ថា វាអាចបណ្តាលឲ្យមានភាព អយុត្តិធម៌ និងវិសមភាព ចំពោះពលរដ្ឋដែលមិនអាចទទួលបានវ៉ាក់សាំង ដោយហេតុផលណាមួយ ដូចជាអ្នកមានជំងឺប្រចាំកាយ ដែលមិនអាចចាក់វ៉ាក់សាំងបាន ឬអ្នកប្រតិកម្មនឹងវ៉ាក់សាំងជាដើម។

សូមបញ្ជាក់ថា កន្លងមកមានប្រទេសនៅក្នុងសហភាពអ៉ឺរ៉ុប និងមួយចំនួនទៀតនៅតំបន់អាស៊ីរួមទាំងចិនផង បានដាចេញ និងកំពុងស្នើ ឡើងនូវវិធានការលិខិតឆ្លងដែនវ៉ាក់សាំង ឬវិញ្ញាបនបត្របញ្ជាក់ពីការបានចាក់វ៉ាក់សាំងកូវីដ-១៩ ក្នុងគោលដៅដើម្បីស្តារសេដ្ឋកិច្ចប្រទេសរបស់ខ្លួន៕