លោក Nattha Kahapana នាយកគ្រប់គ្រងនៃក្រុមហ៊ុនប្រឹក្សាអចលនទ្រព្យ Knight Frank Thailand បាននិយាយថា ទីផ្សារអចលនទ្រព្យនៅភូកេតកំពុងមានការកើនឡើងនៃតម្រូវការយ៉ាងខ្លាំង ដែលជំរុញដោយអ្នកវិនិយោគអចលនទ្រព្យចិន ខណៈដែលអ្នកទិញអចលនទ្រព្យ ដែលជាជនជាតិរុស្ស៊ីវិញក៏មានការកើនឡើងផងដែរ។
លោកបានអះអាងថា ជនជាតិរុស្ស៊ីកំពុងទិញអចលនទ្រព្យនៅភូកេតដើម្បីរស់នៅ។ ពួកគេមានបំណងទិញភ្លាមៗ ហើយចូលមករស់នៅភ្លាមៗ ប៉ុន្តែអ្នកវិនិយោគចិនកាន់តែច្រើនត្រូវបានគេរំពឹងថា នឹងនាំគ្នាទិញអចលនទ្រព្យនៅទីនោះកាន់តែច្រើនផងដែរ ដើម្បីត្រៀមទទួលការមកដល់របស់ភ្ញៀវទេសចរជនជាតិចិន នៅក្នុងអំឡុងរយៈពេល ពី ៧ ទៅ ៨ ខែ ខាងមុខទៀត។
អាជ្ញាធរទេសចរថៃថ្មីៗនេះ ក៏បានដំឡើងគោលដៅទទួលទេសចរជនជាតិចិនកាន់តែច្រើនជាងមុនផងដែរ ដោយពីមុនធ្លាប់មានរំពឹងថា នឹងទទួលបានប្រមាណ ៥លាននាក់ ប៉ុន្ដែ ឥឡូវរំពឹងថា នឹងទទួលបាន៦ ទៅ៧លាននាក់នៅឆ្នាំនេះ ខណៈភ្ញៀវទេសចរចិន ២៥ម៉ឺននាក់ត្រូវបានគេរំពឹងថា នឹងទៅកម្សាន្ដនៅប្រទេសថៃ នៅក្នុងខែមេសាខាងមុខនេះ។
អត្ថបទគួរអាន
លោកបានបន្តទៀតថា ប្រជាជនរុស្ស៊ីចាប់អារម្មណ៍ទិញវីឡា ដែលមានអាងហែលទឹក ប៉ុន្ដែអ្នកវិនិយោគចិនវិញចូលចិត្តអចលនទ្រព្យគ្រប់ប្រភេទ រួមមានខុនដូ វីឡា ហាងទំនិញ និងសូម្បីតែចម្ការទុរេន។
លោកបញ្ជាក់ថា “ ពួកគេចង់ជួល ឫទិញខុនដូ និងវីឡាឲ្យភ្ញៀវទេសចរចិន ហើយនាំពួកគេទៅលេងចម្ការទុរេនដែលពួកគេទិញនៅប្រទេសថៃ “ ។
មកដល់ពេលនេះត្រឹមផ្ទះល្វែងសម្រាប់លក់ទំនិញនៅភូកេតដែលមានត្រឹមតែ ៣ទៅ៥ជាន់ ដែលពីមុនគេអាច ទិញត្រឹមតែ តម្លៃ ១៤ លានបាត ឫប្រមាណជា ៤០ ម៉ឺនដុល្លារ នៅពេលនេះគេអាចលក់វាបានដល់ទៅ ៥០ លានបាត ពោលគឺដល់ទៅ ១លាន៤សែនដុល្លារឯណោះ។
ក្រៅពីភូកេត ចិន និង រុស្ស៊ី គឺជាជនជាតិពីរដែលកំពុងតែក្លាយជាអតិថិជនដ៏សំខាន់សម្រាប់ ទីផ្សារអចលនទ្រព្យនៅប្រទេសថៃ ។
កាលពីឆ្នាំ២០២២ កន្លងទៅថ្មីៗនេះ មានអគារខុនដូរសរុបរហូតដល់ទៅជាង ១ម៉ឺន១ពាន់យូនីត ត្រូវបានលក់ចេញទៅឲ្យជនបរទេស ដោយមានតម្លៃសរុបរហូតដល់ទៅជាង ១ពាន់៧រយលានដុល្លារ ហើយអតិថិជនសំខាន់គឺចិន និង រុស្ស៊ី។
ជនជាតិចិនបានទិញខុនដូនៅថៃមានរហូតដល់ទៅជាង៥ពាន់៧រយយូនីត ពោលគឺនៅក្នុងតួលេខមួយដ៏ច្រើនលើសលុបបំផុត ជាមួយនឹងសាច់ប្រាក់សរុប ប្រមាណជា ៨៥០លានដុល្លារ បន្ទាប់មក គឺរុស្ស៊ីដែលមានត្រឹមតែ ៨១៣ យូនីត ជាមួយនឹងតម្លៃប្រមាណជាជាង ៧៨ លាន ដុល្លារ៕
