តើមានហេតុផលអ្វីខ្លះ ដែលធ្វើឲ្យការនាំចូលឧស្ម័នធម្មជាតិរាវពីអាមេរិកទៅចិនមានការធ្លាក់ចុះ?
ការនាំចូលឧស្ម័នរាវរបស់ចិនពីសហរដ្ឋអាមេរិកបានធ្លាក់ចុះ ៩៥% នៅចន្លោះខែកុម្ភៈ និងខែមេសាឆ្នាំនេះ បើធៀបនឹងរយៈពេលដូចគ្នាក្នុងឆ្នាំ ២០២១។ ប៉ុន្តែការនាំចូលឧស្ម័នរាវរបស់ចិនពីប្រទេសរុស្ស៊ីបានកើនឡើង ៥០% ។ នេះបើយោងតាមទិន្នន័យគយចិនដែលដកស្រង់ដោយ The Wall Street Journal ។
ក្រុមអ្នកវាយតម្លៃពីផលប៉ះពាល់បរិស្ថាន (EIA) បាននិយាយកាលពីខែមុនថា វាជាការផ្លាស់ប្តូរធំមួយរបស់ទីក្រុងប៉េកាំងក្នុងការកាត់បន្ថយការនាំចូលឧស្ម័នរាវពីសហរដ្ឋអាមេរិក ខណៈទីក្រុងវ៉ាស៊ីនតោនគឺជាអ្នកផ្គត់ផ្គង់ដ៏ធំបំផុតនៃបរិមាណឧស្ម័នធម្មជាតិរាវ ទៅកាន់ប្រទេសចិនកាលពីឆ្នាំមុន។ រហូតមកដល់ពេលនេះ សហរដ្ឋអាមេរិកបានបញ្ជូនឧស្ម័នធ្មជាតិរាវម្តងម្កាលប៉ុណ្ណោះទៅកាន់ប្រទេសចិន ខណៈការនាំចេញភាគច្រើនបានដឹកជញ្ជូនទៅកាន់អឺរ៉ុប ដែលមានបរិមាណកើនឡើងកាន់តែច្រើនសម្រាប់ការផ្គត់ផ្គង់នៅក្នុងប្លុកនេះ។
តម្រូវការប្រើប្រាស់ថាមពលធ្លាក់ចុះដោយសារវិធានបិទខ្ទប់នៃកូវីដ១៩ របស់ទីក្រុងប៉េកាំង រួមទាំងតម្លៃឧស្ម័នខ្ពស់របស់សហរដ្ឋអាមេរិកនៅឆ្នាំនេះ ចិនបានកាត់បន្ថយការនាំចូលឧស្ម័នពីសហរដ្ឋអាមេរិកស្ទើរទាំងស្រុង ហើយងាកទៅរកការទិញឧស្ម័នក្នុងតម្លៃទាបពីរុស្ស៊ីវិញ បើទោះបីជាលោកខាងលិចព្យាយាមហ៊ុមព័ទ្ធថាមពលរបស់ទីក្រុងម៉ូស្គូក៏ដោយ។
តាំងពី សហភាពអឺរ៉ុបប្រកាសកាត់ផ្ដាច់ឈប់នាំចូលប្រេងពីរុស្ស៊ីមក ទីក្រុងម៉ូស្គូកាន់តែពឹងផ្អែកខ្លាំងឡើងៗទៅលើចិន ទាំងការលក់ប្រេង និងហ្គាសតែម្ដង ពិសេសគឺរុស្ស៊ីលក់ឲ្យចិននៅក្នុងតម្លៃទាបមែនទែន។
អត្ថបទគួរអាន
យោងតាមទិន្នន័យពីនាយកដ្ឋានថាមពលសហរដ្ឋអាមេរិកបានបង្ហាញកាលពីសប្តាហ៍មុនថា នៅក្នុងខែមេសា ឆ្នាំ ២០២២ ប្រទេសចំនួនប្រាំនៅអឺរ៉ុបរួមមាន បារាំង អេស្ប៉ាញ ចក្រភពអង់គ្លេស ហូឡង់ និងប៉ូឡូញ ទទួលបានការផ្គត់ផ្គង់ឧស្ម័នរាវពីអាមេរិកចំនួនសរុបជាង ៥៤%។
សហភាពអឺរ៉ុប និង ចក្រភពអង់គ្លេស ទទួលបានការផ្គត់ផ្គង់ក្នុងកម្រិតខ្ពស់បំផុត កាលពីខែមេសា ហើយតម្លៃឧស្ម័ននៅអឺរ៉ុបហាក់ខ្ពស់ជាងនៅអាស៊ី កំពុងទាក់ទាញអ្នកផ្គត់ផ្គង់ឧស្ម័នក្នុងការរៀបចំទិសដៅ ដើម្បីដឹកជញ្ជូនទៅកាន់អឺរ៉ុបកាន់តែច្រើនថែមទៀត ហើយភាគច្រើននៃអ្នកផ្គត់ផ្គងទាំងនោះ គឺមកពីសហរដ្ឋអាមេរិក។
ការលុកលុយរបស់រុស្ស៊ីលើអ៊ុយក្រែន និង ការសម្រេចចិត្តរបស់អឺរ៉ុបក្នុងការកាត់ផ្តាច់ការនាំចូលថាមពលរបស់រុស្ស៊ីកំពុងផ្លាស់ប្តូរលំហូរតម្លៃថាមពលសកល ខណៈការកើនឡើងតម្លៃនេះមិនមែនត្រឹមតែសម្រាប់ផលិតផលប្រេងប៉ុណ្ណោះទេ គឺវារួមទាំងឧស្ម័នផងដែរ៕
None
