ហេតុអ្វីបានជាតម្លៃទ្រព្យសកម្មអចលនទ្រព្យផ្នែកពាណិជ្ជកម្មនៅអាស៊ីធ្លាក់ចុះ?

របាយការណ៍ប្រចាំខែវិច្ឆិកា របស់ក្រុមហ៊ុនគ្រប់គ្រងទ្រព្យសកម្មជាអចលនទ្រព្យពាណិជ្ជកម្ម និងវិនិយោគ ដែលគេស្គាល់ថា JLL បានបង្ហាញថា សកម្មភាពវិនិយោគអចលនទ្រព្យពាណិជ្ជកម្មនៅក្នុងតំបន់អាស៊ីប៉ាស៊ីហ្វិក បានធ្លាក់ចុះ២២ភាគរយ នៅក្នុងអំឡុងចាប់ពីខែកក្កដា ដល់ខែកញ្ញា ឆ្នាំ២០២៣។

ទិន្នន័យដែលបង្ហាញដោយសារព័ត៌មាន Nikkei បានឲ្យដឹងថា ស្ថានភាពនៃតម្លៃទ្រព្យសកម្មជាអចលនទ្រព្យនៅក្នុងតំបន់អាស៊ីប៉ាស៊ីហ្វិក បានធ្លាក់ចុះប្រមាណជា៣៧ភាគរយ បើធៀបនឹងត្រីមាសទីបីនៃឆ្នាំ២០២២ ពោលគឺធ្លាក់ចុះ៦ត្រីមាសជាប់ៗគ្នា ចំណែកអំណាចទិញយកទ្រព្យសកម្មនៅអាស៊ីប៉ាស៊ីហ្វិកដោយវិនិយោគិនសកលបានឈានដល់កម្រិតទាបបំផុតពោល គឺត្រឹម៦ភាគរយ។

លោក បេនចាមិន ចូវ (Benjamin Chow)ប្រធានផ្នែកស្រាវជ្រាវទ្រព្យសកម្មអាស៊ី បាននិយាយថា បញ្ហាអត្រាការប្រាក់កាន់តែខ្ពស់នៅក្នុងរយៈពេលយូរ ដែលលេចឡើងនាពេលថ្មីៗនេះបានបញ្ឈប់ក្តីសង្ឃឹមនៃការងើបឡើងវិញមុនកាលកំណត់។ លោកបានបន្តថា ការធ្លាក់ចុះនូវតម្លៃទ្រព្យសកម្មផ្នែកពាណិជ្ជកម្មនៅអាស៊ីប៉ាស៊ីហ្វិក បានធ្វើឱ្យពិភពលោកកាន់តែយឺតយ៉ាវក្នុងការរកឃើញតម្លៃនៃកំណើនជាថ្មី ប៉ុន្តែទស្សនវិស័យនៅត្រីមាសទីបីកាន់តែអាប់អួរ។

នៅត្រីមាសទី៣ឆ្នាំនេះ ប្រទេសកូរ៉េខាងត្បូង បានកត់ត្រាប្រតិបត្តិការលើផ្នែកសេវាកម្មនេះ មានតម្លៃត្រឹម៤ពាន់២រយលានដុល្លារ ធ្លាក់ចុះ៣៥ភាគរយ ស្របពេលដែល ទំហំការវិនិយោគអចលនទ្រព្យពាណិជ្ជកម្មនៅសិង្ហបុរីបានធ្លាក់ចុះ១១ភាគរយ ដោយមានទំហំប្រមាណជា២ ពាន់លានដុល្លារនៅក្នុងអំឡុងពេលដូចគ្នានេះ។

ពាក់ព័ន្ធនឹងស្ថានភាពនេះ លោក ហេនរី ជិន ( Henry Chin) ប្រធានផ្នែកស្រាវជ្រាវប្រចាំតំបន់អាស៊ីប៉ាស៊ីហ្វិកនៅក្រុមហ៊ុន CBRE បាននិយាយថា ការស្ទុះងើបឡើងវិញនៃសកម្មភាពវិនិយោគលើទ្រព្យសកម្មជាអចលនទ្រព្យមិនរំពឹងទុកថា មានស្ថានភាពប្រសើរឡើងឡើយរហូតដល់ពាក់កណ្តាលឆ្នាំ២០២៤ ខាងមុខ៕

ដោយៈ សរ សុជាតិ