កាលពីឆ្នាំមុន ប្រទេសឥណ្ឌូនេស៊ី បានហាមមិនឱ្យមានការលក់ទូរសព្ទ iPhone 16 នៅក្នុងប្រទេសខ្លួន ក្រោមហេតុផលក្រុមហ៊ុន Apple មិនបានបំពេញតាមលក្ខខណ្ឌ ដែលតម្រូវឱ្យទូរសព្ទស្មាតហ្វូនដែលដាក់លក់នៅក្នុងទីផ្សារឥណ្ឌូនេស៊ី ត្រូវតែមានរោងចក្រ ឬប្រើប្រាស់វត្ថុធាតុដើមក្នុងស្រុកឱ្យបានយ៉ាងហោចណាស់៣៥%។
រដ្ឋមន្ត្រីវិនិយោគរបស់ឥណ្ឌូនេស៊ីលោក អាហ្គូស ហ្គូមីវ៉ាង កាតាសាស្ម៊ីតា (Agus Gumiwang Kartasasmita) បាននិយាយថា ក្រុមហ៊ុន Apple បានសម្រេចកិច្ចព្រមព្រៀងមួយ ដើម្បីសាងសង់រោងចក្រផលិតឧបករណ៍តាមដានអ៊ែរថេក (Airtag) របស់ខ្លួននៅលើកោះបាតាម របស់ប្រទេសឥណ្ឌូនេស៊ី ជិតប្រទេសសិង្ហបុរី ប៉ុន្តែរោងចក្រនោះមិនរាប់បញ្ចូលជាផ្នែក នៃការផលិតទូរសព្ទ iPhone ក្នុងស្រុកនោះទេ។ បើតាមការបញ្ជាក់របស់រដ្ឋមន្ត្រីវិនិយោគរបស់ឥណ្ឌូនេស៊ីរូបនេះ រោងចក្រនេះមានតម្លៃ១ពាន់លានដុល្លារ ដោយគ្រោងនឹងចាប់ផ្តើមដំណើរការនៅឆ្នាំក្រោយ។
លោក អាហ្គូស ដែលបានជួបប្រជុំរយៈពេលពីរថ្ងៃជាមួយអនុប្រធានកិច្ចការរដ្ឋាភិបាលពិភពលោករបស់ក្រុមហ៊ុន Apple គឺលោក នីក អាម៉ាន់ (Nick Ammann) បាននិយាយថា ក្រុមហ៊ុន Apple បានស្នើសុំការវិនិយោគប្រកបដោយភាពច្នៃប្រឌិត ប៉ុន្តែត្រូវបានឥណ្ឌូនេស៊ីបដិសេធ។
សូមរំលឹកថា ក្រុមហ៊ុន Apple គ្មានកន្លែងផលិតនៅក្នុងប្រទេសឥណ្ឌូនេស៊ី ដែលមានចំនួនប្រជាជនសរុបប្រមាណ២៨០លាននាក់នោះទេ ប៉ុន្តែចាប់តាំងពីឆ្នាំ២០១៨ ក្រុមហ៊ុននេះបានបង្កើតសាលាអភិវឌ្ឍន៍កម្មវិធីមួយនៅក្នុងប្រទេសនេះ៕
អត្ថបទ៖ សុខ មង្គល
