ថ្លែងនៅក្នុងពិធីបិទសន្និបាតលើកទី៤២ «បូកសរុបសមិទ្ធផលសុខាភិបាល រយៈពេល ៥ឆ្នាំ ឆ្នាំ២០១៨-២០២២ និងទិសដៅឆ្នាំ២០២៣ និងឆ្នាំបន្ត» នៅថ្ងៃទី៧ ខែមីនា ឆ្នាំ២០២៣ សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា បានគូសបញ្ជាក់ថា សម្ដេចបានអនុម័តរួចហើយក្នុងការសម្រេចផ្ទេរវ៉ាក់សាំង ១៥លានដូសទៅចិនវិញ។ យ៉ាងណាក៏ដោយ សម្ដេចក៏បានបញ្ជាក់ផងដែរពីមូលហេតុដែលរាជរដ្ឋាភិបាលកម្ពុជា សម្រេចផ្ទេរវ៉ាក់សាំងទៅឲ្យប្រទេសចិនវិញ ដោយសម្ដេចបានអះអាងថា នៅពេលនេះកម្ពុជា មានវ៉ាក់សាំងគ្រប់គ្រាន់ ហើយចំនួនចាក់វ៉ាក់សាំងរបស់ប្រជាពលរដ្ឋ ក៏មានការថយចុះផងដែរ។ ដូច្នេះ សម្ដេចសម្រេចផ្ទេរវ៉ាក់សាំងនេះ ទៅឲ្យមិត្តចិនវិញ ពីព្រោះថាបើសិនជាទុកវ៉ាក់សាំងរយៈពេលយូរវាអាចនឹងហួសសុពលភាព។ ម្យ៉ាងវិញទៀត សម្ដេចចង់ឲ្យប្រទេសចិន យកវ៉ាក់សាំងទាំង ១៥លានដូសនោះ ទៅចែកជូនដល់បណ្ដាប្រទេសដទៃដែលកំពុងខ្វះខាត និងមានតម្រូវការវ៉ាក់សាំង ផងដែរ។ ខណៈបច្ចុប្បន្ន កម្ពុជា នៅសល់វ៉ាក់សាំងកូវីដ១៩ ក្នុងស្ដុកប្រមាណ ៦លានដូស នៅឡើយ។
អត្ថបទគួរអាន
សូមបញ្ជាក់ថា ចាប់តាំងពីមានការឆ្លងរីករាលដាលជំងឺកូវីដ-១៩ ក្រៅតែពីវ៉ាក់សាំងដែលទទួលបានពីជំនួយយន្ដការកូវ៉ាក់របស់អង្គការសុខភាពពិភពលោក ចិនគឺជាប្រទេសទី១ ដែលបានផ្ដល់ជំនួយវ៉ាក់សាំងបង្ការជំងឺកូវីដ-១៩ មកដល់កម្ពុជា។ បន្ទាប់ពីប្រទេសចិន ក៏មានប្រទេសអ្នកមានធំៗ ចំនួន៣ទៀត បានផ្ដល់និងកំពុងផ្ដល់វ៉ាក់សាំងឲ្យកម្ពុជា ជាបន្ដបន្ទាប់ ផងដែរ ដូចជា ជប៉ុន អាមេរិក និងអង់គ្លេស។ គិតត្រឹមថ្ងៃទី៧ ខែមីនា ឆ្នាំ២០២៣ កំណើនអត្រាចាក់វ៉ាក់សាំងកូវីដ-១៩ នៅកម្ពុជា សម្រេចបានជាង ៩៥% ហើយ នៃចំនួនប្រជាជនសរុប ១៦លាននាក់។ នេះបើយោងតាមរបាយការណ៍របស់ក្រសួងសុខាភិបាល៕
