ទីភ្នាក់ងារថាមពលអន្តរជាតិ (IEA) បានប៉ាន់ប្រមាណថា សមត្ថភាពបង្កើតថាមពលកកើតឡើងវិញថ្មីរហូតដល់ ៤០៤ ជីហ្កាវ៉ាត់ទៀត ត្រូវបានបន្ថែមនៅឆ្នាំ២០២២ ដែលប្រហែលបានកើនឡើង ៤០% ទៀត ពីលើបរិមាណដែលទទួលបាននៅក្នុងឆ្នាំ២០២១។
ប្រទេសចិនគឺជាអ្នកមានចំណែកដ៏ធំបំផុតនៃការបង្កើនថាមពលកកើតឡើងវិញកាលពីឆ្នាំមុនដោយបានបន្ថែមប្រហែល ១៨០ ជីហ្កាវ៉ាត់ ដែលវាលើសចំនួនសរុបប្រចាំឆ្នាំរបស់ប្រទេសជប៉ុនក្នុងការផលិតថាមពលនេះទាំងស្រុងតែម្ដង ហើយប្រសិនបើគិតក្នុងរយៈពេល ៣ ឆ្នាំចុងក្រោយ ចាប់ពីឆ្នាំ២០២០មក គឺថាចិនបានបង្កើនថាមពលនេះ ប្រហែល ៤៦០ ជីហ្កាវ៉ាត់។
ទឡ្ហីករណ៍ដែលនាំឱ្យពេញចិត្តចំពោះថាមពលកកើតជាថ្មីនេះ គឺផ្តោតលើកត្តាមួយចំនួនដូចជាការកាត់បន្ថយការបំភាយកាបូនឌីអុកស៊ីតជាដើម ហើយការលុកលុយរបស់រុស្ស៊ីទៅលើអ៊ុយក្រែនក៏បង្កើនការយល់ដឹងពីសន្តិសុខថាមពល ដោយបង្ខំឱ្យប្រទេសបស្ចិមលោក និងជប៉ុនគិតគូរពីការជៀសវាងការពឹងផ្អែករបស់ពួកគេទៅលើប្រេង និងឧស្ម័នធម្មជាតិរបស់រុស្ស៊ីផងដែរ។
ប៉ុន្តែមកដល់ពេលនេះ ប្រទេសជប៉ុននៅតែទិញឥន្ធនៈហ្វូស៊ីលដ៏ច្រើនសន្ធឹកសន្ធាប់ពីប្រទេស រុស្ស៊ីនៅឡើយ សូម្បីតែការលុកលុយទៅលើអ៊ុយក្រែនបានអូសបន្លាយពេលអស់មួយឆ្នាំទៅហើយក៏ដោយ។
អត្ថបទគួរអាន
គ្រាន់តែពេលថ្មីៗនេះ ជប៉ុនបានបង្កើនថាមពលកកើតឡើងវិញឱ្យលើសពី ២០% នៃការផ្គត់ផ្គង់អគ្គិសនីសរុបរបស់ខ្លួន ខណៈដែលឧស្ម័ន និងធ្យូងថ្មនៅតែមានបរិមាណច្រើនជាងថាមពលនេះ។
ចំណែកសហភាពអឺរ៉ុបវិញបានបន្ថែមថាមពលរហូតដល់ ៦២ GW នៅក្នុងសមត្ថភាពនៃថាមពលកកើតឡើងវិញកាលពីឆ្នាំមុន ខណៈដែលប្លុកនេះបានព្យាយាមកាត់បន្ថយការពឹងផ្អែករបស់ពួកគេទៅលើឥន្ធនៈហ្វូស៊ីលរបស់រុស្ស៊ី។
សហភាពអឺរ៉ុបបានផលិតថាមពលអគ្គិសនីរបស់ខ្លួនកាន់តែច្រើនឡើងៗចេញពី ថាមពលខ្យល់បក់ និងពន្លឺព្រះអាទិត្យជាជាងចេញពីឧស្ម័នធម្មជាតិរ៉ាវកាលពីឆ្នាំមុន ដោយកើនឡើងពីកម្រិត២០%ទៅ ២២%។ នេះបើយោងតាមក្រុមអ្នកវិភាគអង់គ្លេស Ember។ ទោះជាការផលិតធ្យូងថ្មបានហក់ឡើងភ្លាមៗបន្ទាប់ពីការលុកលុយលើអ៊ុយក្រែនភ្លាមៗក៏ដោយ ប៉ុន្តែវាបានធ្លាក់ចុះទៅវិញ ៦% សម្រាប់រយៈពេល ៤ ខែចុងក្រោយនៃឆ្នាំ២០២២ បើធៀបនឹងពេលដូចគ្នាកាលពីឆ្នាំ២០២១៕
អត្ថបទ ៖ សុខ ជា
