ឯកឧត្តម ស៊ាង ថៃ រដ្ឋលេខាធិការ និង ជាអ្នកនាំពាក្យក្រសួងពាណិជ្ជកម្មបានអះអាងប្រាប់ខេមបូណូមីស ថា បរិមាណស្បៀងមិនបានចោទជាបញ្ហានោះទេ ពោលគឺកម្ពុជាមានស្បៀងគ្រប់គ្រាន់សម្រាប់ផ្គត់ផ្គង់តម្រូវការប្រើប្រាស់សម្រាប់ប្រជាពលរដ្ឋក្នុងអំឡុងពេលនៃការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅរយៈពេល១៤ថ្ងៃនេះ។ ប៉ុន្តែអ្វីដែលជាបញ្ហាចោទនៅពេលនេះ គឺការដឹកជញ្ជូនទំនិញ ដោយសារបច្ចុប្បន្នមានការរឹតបន្តឹងខ្លាំង។
ឯកឧត្តមបានបញ្ជាក់ប្រាប់សារព័ត៌មានខេមបូណូមីសយ៉ាងដូច្នេះថា៖«បញ្ហាស្បៀងអាហារ ត្រីសាច់នៅក្នុងប្រទេសកម្ពុជាមានគ្រប់គ្រាន់សម្រាប់បម្រើតម្រូវការរបស់ប្រជាជនយើង តែបញ្ហាដែលត្រូវដោះស្រាយ គឺធ្វើយ៉ាងណាឲ្យទំនិញទាំងនោះបានទៅដល់ដៃប្រជាពលរដ្ឋដោយរលូនក្នុងពេលបិទខ្ទប់នេះ»។
អ្នកនាំពាក្យរូបនេះបានបន្តទៀតថា ក្រសួងពាណិជ្ជកម្មបាន និងកំពុងរៀបចំបែបបទផ្សេងៗក្នុងការស្នើសុំកិច្ចអន្តរាគមន៍ពីអាជ្ញាធរដែនដី ដើម្បីដឹកទំនិញពីតាមខេត្តចូលមករាជធានីភ្នំពេញ ជាពិសេសសហការជាមួយក្រុមហ៊ុនធំៗមួយចំនួន ដើម្បីដឹកទំនិញចល័តលក់នៅតាមតំបន់ ដែលមានប្រជាជនរស់នៅច្រើន។
អត្ថបទគួរអាន
ជាក់ស្តែង ក្រសួងពាណិជ្ជកម្ម បានសហការជាមួយក្រុមហ៊ុនហ្គ្រីនត្រេដ និងសហព័ន្ធស្រូវអង្ករកម្ពុជា ដើម្បីជួយសម្រូលក្នុងការលក់អង្ករ និងគ្រឿងឧបភោគបរិភោគជូនប្រជាពលរដ្ឋក្នុងតម្លៃសមរម្យ ក៏ដូចជាបញ្ចុះតម្លៃជាដើម។ បើតាមសហព័ន្ធស្រូវអង្ករកម្ពុជា មកទល់ពេលនេះ ក្រុមហ៊ុនជាសមាជិកយ៉ាងតិច៧ហើយ ដែលបានលក់អង្ករបញ្ចុះតម្លៃជូនពលរដ្ឋ ដែលស្ថិតនៅក្នុងតំបន់បិទខ្ទប់។ ក្រុមហ៊ុនទាំងនោះ បានលក់បញ្ចុះតម្លៃពី១ម៉ឺនរៀល ទៅ២ម៉ឺនរៀលនៃតម្លៃគោលអង្ករ១បាវ ទម្ងន់៥០គីឡូក្រាម។
ក្រោយពីរាជរដ្ឋាភិបាលកម្ពុជាដាក់ចេញវិធានការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅរយៈពេល១៤ថ្ងៃ គេសង្កេតឃើញថា មានក្រុមអាជីវករឆ្លៀតឱកាសមួយចំនួន បានលក់ទំនិញឡើងថ្លៃមួយគុណនឹងពីរ បន្ទាប់ពីឃើញពលរដ្ឋសម្រុកនាំគ្នាទៅទិញទំនិញដើម្បីស្តុកទុកក្នុងអំឡុងពេលពួកគេជាប់បម្រាមហាមមិនឲ្យចេញក្រៅផ្ទះ។
ភ្លាមៗនោះ រដ្ឋបាលរាជធានីភ្នំពេញបានស្នើឲ្យអាជីវករទាំងអស់កុំតម្លើងថ្លៃទំនិញ និងបានដាក់ចេញវិធានការណ៍ក្តៅដោយព្រមានដាក់ពិន័យដល់អាជីវករណា ដែលលក់ទំនិញឡើងថ្លៃខ្ពស់ខុសពីតម្លៃទីផ្សារខ្លាំងផងដែរ។ ជាមួយគ្នានេះក្រសួងពាណិជ្ជកម្មបានបង្កើតក្រុមការងារចំពោះកិច្ចគ្រប់គ្រង និងតាមដានតម្លៃទំនិញនៅលើទីផ្សារ ដើម្បីជួយសម្រួលការផ្គត់ផ្គង់ចំណីអាហារឲ្យបានទាន់ពេល និងដោះស្រាយសំណូមពររបស់ពលរដ្ឋជាដើម។
អ្នកនាំពាក្យក្រសួងពាណិជ្ជកម្ម ឯកឧត្តម ស៊ាង ថៃ បានបញ្ជាក់អះអាងថា ក្រោយក្រុមការងារចំពោះកិច្ចចុះសិក្សាស្រាវពីតម្លៃទំនិញនៅតាមផ្សារចំនួន៣០ក្នុងរាជធានីភ្នំពេញ និងខេត្តកណ្តាលបានបង្ហាញថា តម្លៃទំនិញរួមមានសាច់ជ្រូក សាច់មាន់ សាច់គោ ពងមាន់ ពងទា និងគ្រឿងឧបភោគបរិភោគមានការឡើងថ្លៃតិចតួចប៉ុណ្ណោះ៕
ចុច Like Facebook Page របស់ខេមបូណូមីស និងចូលរួមក្នុង Telegram ដើម្បីទទួលបានព័ត៌មានថ្មីៗលឿនរហ័សមុនគេ: https://t.me/cambonomist
None
