ប្រទេសកម្ពុជាបានបំបែកកំណត់ត្រាពិភពលោក (Guinness World Record) ក្នុងការបត់បេះដូងក្រដាសបានចំនួនជាង ៣,៩លានបេះដូង ដែលកំណត់ត្រាចាស់បានទៅលើប្រទេស អង់គ្លេស កាលពីឆ្នាំ ២០១៩ ជាមួយនឹងការបត់បានជាង ៥ ម៉ឺនបេះដូងក្រដាស។
ការបំបែកកំណត់ត្រាឯតទគ្គកម្មបត់ក្រដាសបេះដូង មានវត្តមាន ក្រោមយុទ្ធនាការ #BeyondTheGames ដែលមានពាក្យស្លោក «បេះដូងលោតក្នុងចង្វាក់តែមួយ» ក្នុងន័យគាំទ្រ លើកទឹកចិត្ត និងបង្ហាញក្ដីស្រឡាញ់ដល់កីឡាករ គ្រូបង្វឹក និងអ្នកគាំទ្រ ក្នុងព្រឹត្តិការណ៍កីឡាអាស៊ីអាគ្នេយ៍ (SEA Game) និងកីឡាប៉ារ៉ាហ្គេមឆ្នាំ២០២៣ ដែលព្រះរាជាណាចក្រកម្ពុជានឹងធ្វើជាម្ចាស់ផ្ទះក្នុងពេលដ៏ខ្លីខាងមុខនេះ។
ដោយឡែក ក្រុមហ៊ុន Smart Axiata គឺជាម្ចាស់ជំនួយមួយ ក្នុងចំណោមម្ចាស់ជំនួយទាំង ៥ ដែលបានផ្តល់ការ បរិច្ចាគជាទឹកប្រាក់ចំនួន ៥០០រៀល ចំពោះរាល់បេះដូងក្រដាសដែលបានបត់ រហូតដល់ ១ លានបេះដូង។ មិនតែប៉ុណ្ណោះ ប្រតិបត្តិករទូរស័ព្ទចល័តមួយនេះ ក៏បានចូលរួមយ៉ាងពេញទំហឹងក្នុងការចូលរួមផ្សព្វផ្សាយពីរបៀបបត់ ការចូលរួមបត់ផ្ទាល់ពីបុគ្គលិកក្រុមហ៊ុន និងការដាក់បេះដូងដែលបត់រួចចូលក្នុងហឹបយុទ្ធនាការនៅគ្រប់បណ្តា Smart Shop នៅទូទាំងព្រះរាជាណាចក្រកម្ពុជា។
លោក Ziad Shatara នាយកប្រតិបត្តិនៃក្រុមហ៊ុនSmart Axiata ក៏បានចូលរួមអបអរសាទរនូវសមិទ្ធិផលដ៏ អស្ចារ្យមួយនេះផងដែរ៖ «ក្រុមហ៊ុន SMART សូមចូលរួមអបអរសាទរដែលប្រទេសកម្ពុជាទទួលជោគជ័យជា ខ្លាំងក្នុងការបំបែកកំណត់ត្រា Guinness World Record ក្នុងការបត់បេះដូងក្រដាសច្រើនបំផុតក្នុងពិភពលោក លើសពីការរំពឹងទុក។ យើងពិតជាមានកិត្តិយសក្រៃលែង ដែលបានគាំទ្រ និងនិងចូលរួមចំណែកជាម្ចាស់ឧបត្ថមក្នុងព្រឹត្តិការណ៍ប្រវត្តិសាស្រ្តដ៏ពិសេសមួយនេះ ដែលបណ្តុះស្មារតីសាមគ្គីរួបរួមគ្នាសម្រាប់ប្រជាជនកម្ពុជាផងដែរ។»
ជាក់ស្តែង ក្រុមហ៊ុន Smart Axiata តែងតែបង្ហាញនូវការប្តេជ្ញាចិត្តក្នុងការចូលរួមចំណែកបង្រួបបង្រួមសង្គម ក្នុងគោលបំណងគាំទ្រការអភិវឌ្ឍសង្គមខ្មែរ និងបណ្តុះទេពកោសល្យជំនាន់ក្រោយ តាមរយៈការចូលរួមចំណែកក្នុងការងារសង្គមក្នុងវិស័យផ្សេងៗជាអចិន្ត្រៃយ៍។ ជាក់ស្តែង ក្រុមហ៊ុន Smart Axiata បានចូលរួមឧបត្ថម្ភការរៀបចំកីឡាជាតិកម្ពុជា ចាប់តាំងពីកីឡាជាតិលើកទី ១ នៅក្នុងឆ្នាំ ២០១៦ ដែលទទួលបានឱកាសពីគណៈកម្មាធិការជាតិអូឡាំពិកកម្ពុជា បានចូលរួមជាម្ចាស់ ឧបត្ថម្ភធំក្នុងព្រឹត្តិការណ៍ជាតិនេះផងដែរ។
