ការអំពាវនាវដូចនេះ ធ្វើឡើងទំនងដោយសារតែ រដូវរងាក៏ខិតចូលមកដល់ កង្វះខាតស្បៀអាហារជាពិសេសបន្លែ ដែលត្រូវលិចលង់ដោយសារទឹកជំនន់ និង នៅចំពោះមុខនូវភាពមិនប្រាកដប្រជា នៃវិបត្តិកូវីដ១៩ដែលកំពុងរាតត្បាតសារជាថ្មីក្នុងប្រទេសចិន។ នេះបើតាមការចុះផ្សាយដោយសារព័ត៌មានអន្តរជាតិធំៗជាច្រើន។
ការអំពាវនាវរបស់រដ្ឋអំណាចចិនថា ឲ្យពលរដ្ឋត្រៀមសម្ភារៈសំខាន់ៗស្តុកទុក បានធ្វើឲ្យមានការយល់ច្រឡំខ្លះ ដែលបង្កឲ្យប្រជាជនចិន និងពិសេសអ្នករស់នៅក្នុងក្រុងប៉េកាំង បានសម្រុកទៅទិញបន្លែផ្លែឈើ និង ស្បៀងអាហារផ្សេងៗទៀត ដូចជា អង្ករ ស្ពៃ និង ម្សៅធ្វើនំទៅវិញ។ រីឯពលរដ្ឋចិនខ្លះទៀត បាននាំគ្នាទិញប្រេងឆា ទិញអង្ករ ស្តុកទុកយ៉ាងច្រើនផងដែរ។ ប្រការនេះហើយ បានធ្វើឲ្យគណៈរដ្ឋមន្ត្រីចិន បានចេញមកប្រកាសភ្លាមៗ នៅយប់ថ្ងៃពុធ ដោយបានធានាថា រដ្ឋាភិបាលចិននឹងធានាការផ្គត់ផ្គង់សម្ភារៈចាំបាច់ប្រចាំថ្ងៃ រួមទាំងសាច់ និង បន្លែឲ្យបាន ព្រមទាំងរក្សាស្ថិរភាពតម្លៃផងដែរ។
យ៉ាងណាមិញ ក៏នៅតែមានពលរដ្ឋចិនមួយចំនួនយល់ថា ពួកគេមិនចាំបាច់ទិញស្បៀងច្រើនហួសពីតម្រូវការពេកនោះទេ ដោយហេតុថា វាជារឿងធម្មតាទៅហើយ ដែលរដ្ឋាភិបាលតែងប្រាប់ឲ្យពលរដ្ឋត្រៀម ខ្លួនជារៀងរាល់រដូវរងាខិតចូលមកដល់។
យ៉ាងណាក៏ដោយចុះ ក៏នៅមានពលរដ្ឋផ្សេងទៀតប្រញាប់ប្រញ៉ាល់ តម្រង់ជួរយ៉ាងវែងនៅមុខផ្សារទំនើប ដើម្បីទិញស្បៀងអាហារទុកក្នុងចំនួនដ៏ច្រើន ដែលទំនងមកពីពួកគេបារម្ភពីភាពមិនប្រាកដប្រជានៃជំងឺកូវីដ១៩ ដែលកំពុងរាលដាលក្នុងប្រទេស ដែលរដ្ឋអំណាចចិនកំពុងយកចិត្តទុកដាក់លើបញ្ហានេះយ៉ាងខ្លាំង។
អត្ថបទគួរអាន
ប្រទេសចិននៅថ្ងៃពុធទី០៣វិច្ឆិកា បានរាយការណ៍ពីចំនួនឆ្លងកូវីដ១៩ក្នុងសហគមន៍ ប្រចាំថ្ងៃច្រើនបំផុតមិនធ្លាប់មានក្នុងរយៈពេល៣ខែចុងក្រោយ ពោលគឺមានដល់ ៩៣ករណី ក្នុងនោះរកឃើញក្នុងរដ្ឋធានីប៉េកាំង ៩ករណីផងដែរ។
មួយវិញទៀត ការផ្គត់ផ្គង់បន្លែកំពុងជួបនឹងកង្វះខាត ដោយសារទឹកជំនន់កាលពីខែមុនក្នុងប្រទេសចិន ដែលបានបំផ្លាញដំណាំអស់មួយភាគធំ។ បញ្ហានេះ កំពុងធ្វើឲ្យគេបារម្ភថា វានឹងជះឥទ្ធិពលដល់តម្លៃទំនិញលើទីផ្សារបន្ថែមទៀត ស្របពេលដែលពលរដ្ឋចិនសម្រុកទិញទំនិញ ក្នុងចំនួនច្រើនបែបនេះខណៈតម្លៃទំនិញ ពិសេសស្បៀងអាហារកំពុងឡើងថ្លៃស្រាប់។ សូមជម្រាបថា កាលពីខែមុន ស្បៀងអាហារចាំបាច់ចំនួន២៨មុខនៅចិន បានឡើងថ្លៃ ១៦% បើប្រៀបទៅនឹងខែមុន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
