ទោះយ៉ាងណា ទាំងនេះ ជាសន្ទស្សន៍មួយទាបណាស់ បើគេធៀបនឹងប្រទេសក្បាលម៉ាស៊ីនសេដ្ឋកិច្ចនានា ខណៈដែលបច្ចុប្បន្នប្រទេសទាំងនោះ ជួបប្រទះអតិផរណាខ្ពស់បំផុតមិនធ្លាប់មានពីមុនមក។ នេះបើតាមការចុះផ្សាយរបស់សារព័ត៌មានចិន South China Morning Post។
យោងតាមទិន្នន័យរបស់ការិយាល័យស្ថិតិជាតិចិនដែលបានចេញផ្សាយកាលពីថ្ងៃព្រហស្បតិ៍បានបង្ហាញថា អតិផរណារបស់ប្រទេសចិននៅតែស្ថិតក្នុងកម្រិតមធ្យមកាលពីខែធ្នូឆ្នាំមុន ជាមួយនឹងសន្ទស្សន៍តម្លៃទំនិញប្រើប្រាស់ កើនឡើងពី១,៦%កាលពីខែវិច្ឆិកា ដល់ទៅ ១,៨%នៅខែធ្នូ ឆ្នាំ២០២២។
អត្ថបទគួរអាន
សម្រាប់ឆ្នាំ២០២២ អតិផរណានៅក្នុងប្រទេសចិនមានកម្រិត ២% ដែលវាស្ថិតក្រោមកម្រិតដែលធ្លាប់បានគ្រោងទុកថា នឹងមាននៅក្នុងរង្វង់ប្រហែល៣%។ ចំណែកសន្ទស្សន៍តម្លៃអ្នកផលិតបានធ្លាក់ចុះ០,៧%នៅក្នុងខែធ្នូ បើធៀបទៅនឹងរយៈពេលដូចគ្នាកាលពីឆ្នាំមុន បន្ទាប់ពីធ្លាក់ចុះអស់១,៣%នៅក្នុងខែវិច្ឆិកា។ នៅពេញមួយឆ្នាំ២០២២ សន្ទស្សន៍តម្លៃអ្នកផលិតរបស់ចិនបានកើនឡើង៤,១%។ ទាំនេះជាសញ្ញាមួយបញ្ជាក់ថា ការសម្របខ្លួនរស់នៅជាមួយជំងឺកូវីដ១៩ របស់ប្រជាជនចិនកំពុងចាប់ផ្តើមដាក់សម្ពាធលើតម្លៃនៃផលិតផលហើយ។ សេដ្ឋវិទូក្នុងស្រុកអះអាងថា អតិផរណានៅប្រទេសចិនមិនអាចមានទំហំធំដូចប្រទេសមួយចំនួន ដែលខ្លះមានដល់ទៅជិត២ខ្ទង់នោះទេ បើទោះបីជាចិនទើបតែបើកប្រទេសឡើងវិញ ដែលជំរុញឱ្យមានតម្រូវការប្រើប្រាស់ច្រើនក៏ដោយ។ ទោះយ៉ាងណាអាជ្ញាធរចិនកំពុងយកចិត្តទុកដាក់ ចាត់វិធានការការពារមេរោគឆ្លង ដើម្បីធានាឲ្យបាននូវការអភិវឌ្ឍសេដ្ឋកិច្ច ប្រកបដោយស្ថិរភាព។
សូមជម្រាបផងដែរថា កាលពីខែធ្នូតម្លៃម្ហូបអាហារនៅក្នុងប្រទេសចិនបានកើនឡើង ៤,៨% ធៀបនឹងកំណើន ៣,៧% នៅក្នុងខែវិច្ឆិកា ខណៈដែលតម្លៃទំនិញមិនមែនម្ហូបអាហារបានកើនឡើង ១,១%ប៉ុណ្ណោះ កាលពីខែធ្នូ ធៀបទៅនឹងរយៈពេលដូចគ្នាកាលពីឆ្នាំមុន។ សន្ទស្សន៍តម្លៃទំនិញប្រើប្រាស់នេះ គឺនៅមានស្ថិរភាព និងស្ថិតនៅកម្រិតទាបនៅឡើយ ហើយសេដ្ឋកិច្ចចិននៅតែដំណើរការទៅមុខ ជាមួយនឹងសក្តានុពលរបស់វា ដូចនេះអតិផរណាមិនមែនជាឧបសគ្គរបស់រដ្ឋាភិបាលក្រុងប៉េកាំង ក្នុងការបន្ដបន្ធូរបន្ថយគោលនយោបាយរូបិយវត្ថុ នៅឆ្នាំនេះឡើយ៕
អត្ថបទ ៖ សារៀម លក្ខិណា
