ទោះយ៉ាងណា របាយការណ៍ខែធ្នូដដែលបានបង្ហាញថា ទីផ្សារការងារនៅអាមេរិក នៅតែមានភាពតូចចង្អៀត ខណៈដែលថ្មីៗនេះ ក៏មានការរាយការណ៍ពីក្រុមហ៊ុនគ្រាក់ៗរបស់អាមេរិកជាច្រើន បានបង្ហាញពីផែនការកាត់បន្ថយការងារបុគ្គលិកជាបន្ដបន្ទាប់ផងដែរ។
របាយការណ៍ដែលចេញផ្សាយដោយ នាយកដ្ឋានពលកម្មកាលពីថ្ងៃព្រហស្បតិ៍ទី១២ ខែមករា បានបង្ហាញឱ្យឃើញថា តម្លៃម្ហូបអាហារនៅអាមេរិកមានកំណើនតិចតួចខ្លាំងបំផុត បើគិតពីខែមីនាឆ្នាំ២០២១មក។ ប៉ុន្តែសម្រាប់ថ្លៃជួល និងតម្លៃឧបករណ៍ប្រើប្រាស់ប្រចាំថ្ងៃវិញ នៅតែមានខ្ពស់ខ្លាំងដដែល។
អ្នកជំនាញជឿថា ការថមថយនូវកម្រិតអតិផរណាបែបនេះ អាចអនុញ្ញាតឱ្យធនាគារកណ្តាលពន្យាពេលការបន្តដំឡើងអត្រាការប្រាក់គោលសម្រាប់ខែក្រោយ។ គួរជម្រាបថា ធនាគារកណ្តាលរបស់សហរដ្ឋអាមេរិកបានចាប់ផ្តើមដំឡើងអត្រាការប្រាក់គោល ក្នុងល្បឿនដ៏លឿនបំផុតមិនធ្លាប់ជួបប្រទះ ចាប់តាំងពីទសវត្សរ៍ឆ្នាំ១៩៨០មកម្លេះ។
មន្ត្រីជំនាញរបស់ធនាគារកណ្ដាលសហរដ្ឋអាមេរិកមានទស្សនៈវិជ្ជមាន ចំពោះការធ្លាក់ចុះនៃអត្រាអតិផរណានេះ ដោយលោកមើលឃើញថាពីភាពដែលអាចទៅរួច នៃការដំឡើងអត្រាការប្រាក់គោលក្នុងរង្វង់ត្រឹមតែ ០,២៥%ប៉ុណ្ណោះនៅថ្ងៃខាងមុខ។
អត្ថបទគួរអាន
របាយការណ៍ដដែលបានបង្ហាញផងដងដែរថា សន្ទស្សន៍តម្លៃទំនិញប្រើប្រាស់ បានធ្លាក់ចុះ ០,១% កាលពីខែធ្នូឆ្នាំ២០២២ ដែលវាជាការធ្លាក់ចុះលើកដំបូងរាប់ចាប់តាំងពីខែឧសភាឆ្នាំ២០២០ ជាពេលដែលមានការរាតត្បាតនៃជំងឺកូវីដ១៩នៅអាមេរិក។
ក្រឡេកមកមើលការព្យាករណ៍របស់សេដ្ឋវិទូក៏មិនខុសគ្នាដែរ ដោយមិនរាប់បញ្ចូលម្ហូបអាហារ ថ្លែកន្លែងស្នាក់ និងថ្លៃថាមពល តម្លៃទំនិញជារួមបានធ្លាក់ចុះទាបជាងការរំពឹងទុកក្នុងរយៈពេល៣ខែជាប់ៗគ្នា ដែលការធ្លាក់ចុះនេះ បង្ហាញពីការគ្រប់គ្រងបានល្អ ជាក្តីសង្ឃឹមថា អាមេរិកអាចជៀសផុតពីវិបត្តិសេដ្ឋកិច្ចនៅឆ្នាំ២០២៣នេះ។
ជាក់ស្តែង តម្លៃសាំងនៅខែធ្នូកន្លងទៅ បានធ្លាក់ចុះប្រមាណ៩,៤% ចំណែកតម្លៃម្ហូបអាហារបានកើនឡើង ០,៣% បើធៀបនឹងកំណើនរង្វង់០,៥% កាលពីខែមុនៗ។ ដោយឡែកតម្លៃគ្រឿងម្ហូបអាហារ កើនឡើង ០,២%ប៉ុណ្ណោះ ដែលនេះក៏ជាតម្លៃទាបបំផុត បើគិតចាប់ពីខែមីនាឆ្នាំ២០២១មក ក្នុងនោះ តម្លៃបន្លែ ផ្លែឈើ ទឹកដោះគោគឺសុទ្ធសឹងតែបានធ្លាក់ចុះ។
ប្រធានាធិបតីអាមេរិក លោកចូ បៃដិន បាននិយាយថា ទំនោរធ្លាក់ចុះនៃអតិផរណានេះ បានកាត់បន្ថយសម្ពាធមួយភាគធំសម្រាប់ប្រជាជនអាមេរិក ហើយនេះក៏ជាភស្តុតាងបញ្ចាក់ផងដែរថា វិធានការដោះស្រាយ របស់រដ្ឋាភិបាលក្រុងវ៉ាស៊ីនតោនកំពុងទទួលបានផលហើយ។ ម៉្យាងវិញទៀត អត្រាការប្រាក់កម្ចីកាន់តែខ្ពស់ តម្រូវការកាន់តែទាប ស្របពេលដែលខ្សែចង្វាក់ផ្គត់ផ្គង់មានភាពល្អប្រសើរ ក៏ជាដើមចមដែលធ្វើឲ្យតម្លៃនៃផលិតផលធ្លាក់ចុះផងដែរ។
សូមបញ្ចាក់ផងដែរថា កាលពីឆ្នាំ២០២២ធនាគារកណ្តាលអាមេរិក បានដំឡើងអត្រាការប្រាក់គោលដល់ទៅចន្លោះពី ៤,២៥%ទៅ៤,៥០%ឯណោះ។ វាជាកម្រិតខ្ពស់បំផុតគិតចាប់ពីចុងឆ្នាំ២០០៧។ បើគិតពីពេលនេះ ទៅចុងឆ្នាំ២០២៣ គេរំពឹងថា អាមេរិកនឹងដំឡើងអត្រាការប្រាក់គោល ឲ្យបានយ៉ាងហោចណាស់ ០,៧៥%បន្ថែមទៀត៕
អត្ថបទ ៖ សារៀម លក្ខិណា
