អង់គ្លេសនឹងមាននាយករដ្ឋមន្ត្រីថ្មី ដែលជាអ្នកទីបីហើយក្នុងពេលមិនដល់២ខែផង។ លោក Rishi Sunak ក្នុងវ័យ៤២ឆ្នាំ នឹងត្រូវចូលគាល់មហាក្សត្រអង់គ្លេស ស្តេច ឆាល ដើម្បីបង្កើតរដ្ឋាភិបាលថ្មី មានលោកជានាយករដ្ឋមន្ត្រី។ អតីតរដ្ឋមន្ត្រីហិរញ្ញវត្ថុរូបនេះ នឹងចូលខ្លួនមកដោះស្រាយបញ្ហាជាច្រើន ពិសេសអស្ថិរភាពទាំងនយោបាយ និងសេដ្ឋកិច្ចនៅអង់គ្លេស ក្នុងគ្រាមួយដែលសេដ្ឋកិច្ចប្រទេសត្រូវបានគេចាត់ទុកថាមានស្ថានការណ៍អាក្រក់បំផុតមួយក្នុងប្រវត្តិសាស្ត្រ។ លោកនឹងមកជំនួសតំណែងលោកស្រី Liz Truss ដែលអង្គុយក្នុងកៅអីនាយករដ្ឋមន្ត្រីបាន ត្រឹមតែ ៤៤ថ្ងៃប៉ុណ្ណោះ មុនពេលលោកស្រីលាលែងពីតំណែង។
បុរសដែលមានទឹកចិត្តដ៏ក្លៀវក្លានេះ ប្រាប់សមាជិកសភាកាលពីថ្ងៃចន្ទថា បច្ចុប្បន្នអង់គ្លេសប្រឈមមុខនឹងវិបត្តិដែលមានស្រាប់ដដែលមិនទាន់ដោះស្រាយបាន ហើយគេត្រូវតែរួបរួមគ្នា បើមិនដូច្នេះនឹងត្រូវស្លាប់ទាំងអស់គ្នា។ លោក Sunak អះអាងថា លោកនឹងចូលមកប្រឈមមុខនឹងការលំបាកផ្នែកសេដ្ឋកិច្ចដ៏ខ្លាំងក្លាក្នុងប្រវត្តិសាស្ត្រសម័យទំនើបនេះមុនគេ ព្រោះប្រជាជនអង់គ្លេសត្រូវការស្ថិរភាព និងឯកភាព ហើយលោកនឹងធ្វើឱ្យវាជាអាទិភាពបំផុត ដើម្បីនាំគណបក្ស និងប្រទេសអង់គ្លេសរួមគ្នាឡើងវិញ។
ចំណាត់ការដំបូងរបស់ អតីតរដ្ឋមន្ត្រីហិរញ្ញវត្ថុរូបនេះពេលក្លាយជានាយករដ្ឋមន្ត្រីត្រូវបានគេរំពឹងថា ជាការកាត់បន្ថយចំណាយដ៏ច្រើនក្រែលរបស់រដ្ឋាភិបាល។ ក្រៅពីនោះ លោក Sunnak បាននិយាយជាសាធារណៈតិចតួចណាស់អំពីរបៀបដែលលោកគ្រប់គ្រងប្រទេស និងរបៀបលោកនឹងដោះស្រាយវិបត្តិសេដ្ឋកិច្ច និងនយោបាយជាច្រើន។ នេះគេប្រហែលត្រូវរង់ចាំរហូតដល់លោកចូលកាន់តំណែងជាផ្លូវការសិន។
អត្ថបទគួរអាន
ក្រៅពីបញ្ហាសេដ្ឋកិច្ច លោក Sunnak ក៏នឹងត្រូវខិតខំប្រឹងប្រែងរៀបចំគណបក្សនយោបាយដ៏លេចធ្លោរបស់ចក្រភពអង់គ្លេស គឺបក្សអភិរក្សនិយម ឱ្យរួមគ្នាឡើងវិញដែរ បន្ទាប់ពីសមាជិកខ្លះបានចោទប្រកាន់មិនពេញចិត្តរូបលោក ដោយចោទថា លោកក្បត់ជាតិកាលពីដើមឆ្នាំ២០២២នេះ គ្រាដែលលោក Sunak បានលាលែងពីគណៈរដ្ឋមន្ត្រីក្រោមការដឹកនាំរបស់អតីតនាយករដ្ឋមន្ត្រី Boris Johnson ហើយលោកក៏ជាកត្តាមួយបណ្តាលលោក Johnson លាលែងពីដំណែងដែរ។
គួរជម្រាបថា លោក Rishi Sunak នឹងក្លាយជានាយករដ្ឋមន្ត្រីមិនមែនស្បែកសដំបូងគេរបស់អង់គ្លេស ដោយរូបលោកមានដើមកំណើតឥណ្ឌា ជាកូនរបស់គ្រួសារអន្តោប្រវេសន៍មកដល់ទឹកដីអង់គ្លេសនៅឆ្នាំ១៩៦០។ ចូលប្រឡូកក្នុងឆាកនយោបាយតាំងពីឆ្នាំ ២០១៥ ដោយបានក្លាយជាតំណាងរាស្ត្រអង្គុយក្នុងសភា បានក្លាយជារដ្ឋមន្ត្រីក្រសួងហិរញ្ញវត្ថុរបស់រដ្ឋាភិបាលលោកបូរីស ចនសុន នៅឆ្នាំ២០២០ ក្នុងវ័យមិនទាន់៤០ឆ្នាំស្រួលបួលផង តែក៏ជារដ្ឋមន្ត្រីដំបូងគេម្នាក់ដែលលាលែងចេញពីរដ្ឋាភិបាលដដែលនោះ នៅខែកក្កដា ២០២២ ពោលគឺថ្ងៃមុនការលាលែងពីតំណែងនាយករដ្ឋមន្ត្រីរបស់លោកបូរីសចនសុន។
ដោយមានឈាមជ័រជាជនជាតិឥណ្ឌានេះ នាយករដ្ឋមន្រ្តីឥណ្ឌា និរិន្រ្ទា ម៉ូឌី បានអបអរសាទរលោក Sunak ដោយចាត់ទុកអនាគតនាយករដ្ឋមន្រ្តីអង់គ្លេសរូបនេះថា ជាស្ពានពង្រឹងទំនាក់ទំនងរវាងប្រជាជនឥណ្ឌា និងអង់គ្លេស ខណៈប្រទេសទាំងពីរកំពុងផ្លាស់ប្តូរពីទំនាក់ទំនងបែបប្រវត្តិសាស្រ្តទៅជាដៃគូតាមបែបយុទ្ធសាស្រ្តសម័យទំនើបវិញ៕
