កូរ៉េខាងជើងបាញ់សាកល្បងមីស៊ីលជាលើកទី៨ក្នុងឆ្នាំនេះ ស្របពេលមានសង្គ្រាមដ៏ក្តៅគគុកនៅអ៊ុយក្រែន

ក្រៅតែពីសេចក្តីរាយការណ៍ពីឆ្មាំសមុទ្ររបស់ជប៉ុន យោធាកូរ៉េខាងត្បូង ក៏បានរាយការណ៍ស្រដៀងគ្នាថា ទីក្រុងព្យុងយ៉ាងបានបាញ់មីស៊ីលមួយគ្រាប់ពិតមែន តែគេមិនអាចកំណត់បានថាជាប្រភេទអ្វីនោះទេ គេត្រឹមអាចដឹងបានថា វាបានបាញ់ឆ្ពោះទៅកាន់តំបន់សមុទ្រភាគខាងកើតនៃប្រទេស។

ការធ្វើតេស្ដអាវុធរបស់កូរ៉េខាងជើងកាលពីថ្ងៃអាទិត្យ ធ្វើឡើងនៅសល់ពេលមិនដល់២សប្ដាហ៍ទៀតនោះទេ មុនការបោះឆ្នោតប្រធានាធិបតី កូរ៉េខាងត្បូង ចូលមកដល់នៅថ្ងៃទី៩ខែមីនាខាងមុខនេះ ខណៈដែលក្តីបារម្ភកំពុងកើតមានឡើងថា ទីក្រុងព្យុងយ៉ាងនឹងឆ្លៀតឱកាសអភិវឌ្ឍមីស៊ីលរបស់ខ្លួន ស្របពេលសហគមន៍អន្តរជាតិកំពុងផ្តោតលើសង្រ្គាមរវាងរុស្ស៊ី និងអ៊ុយក្រែន។

នេះជាការបាញ់លើកដំបូងក្នុងខែកុម្ភៈនេះ និងជាលើកទី៨ហើយសម្រាប់ការសាកល្បងមីស៊ីលកូរ៉េខាងជើងគិតតាំងពីដើមខែមករាមក ខណៈដែលការសាកល្បងចុងក្រោយគឺនៅថ្ងៃទី ៣០ ខែមករា នៅពេលដែលរបបផ្តាច់ការមួយនេះបានបាញ់មីស៊ីលផ្លោងរយៈចម្ងាយឆ្ងាយឈ្មោះ Hwasong-12 រួមទាំងមីស៊ីលលឿនជាងសំឡេង និងមីស៊ីលបាលីស្ទិកចម្ងាយមធ្យមផងដែរ ដែលជាការសាកល្បងដ៏ធំបំផុត ចាប់តាំងពីឆ្នាំ ២០១៧មក។

ជាមួយនឹងការបាញ់មីស៊ីលញឹកញាប់បែបនេះ ទីក្រុងសេអ៊ូល និងតូក្យូសង្ស័យថា ទីក្រុងព្យុងយ៉ាង ទំនងជាចង់ធ្វើសកម្មភាពបង្ករឿងជាថ្មីទៀត។ កាលពីខែមុន កូរ៉េខាងជើង ក៏អះអាងពីលទ្ធភាពបញ្ចប់ឱសានវាទលែងបាញ់មីស៊ីលបាលីស្ទិកចម្ងាយឆ្ងាយ និងការសាកល្បងនុយក្លេអ៊ែរផងដែរ។

ស្របពេលសង្គ្រាមនៅអ៊ុយក្រែនកំពុងតែឆាបឆេះ ប្រព័ន្ធផ្សព្វផ្សាយរដ្ឋរបស់កូរ៉េខាងជើង KCNA បានរាយការណ៍កាលពីថ្ងៃសៅរ៍ថា ប្រធានាធិបតីចិន ស៊ី ជីនពីង បានផ្ញើរសារសង្កត់ធ្ងន់ទៅកាន់មេដឹកនាំកូរ៉េខាងជើងគីម ជុងអ៊ុន អំពីសារសំខាន់នៃកិច្ចសហប្រតិបត្តិការរវាងប្រទេសទាំងពីរ។ 

KCNA រាយការណ៍ថា នៅក្នុងសារមួយទៅកាន់លោកគីម ជុងអ៊ុន, លោក ស៊ី ជីនពីង បាននិយាយថា ប្រទេសចិនបានត្រៀមខ្លួនជាស្រេចដើម្បីធ្វើការរួមជាមួយនឹងភាគីកូរ៉េខាងជើង ដើម្បីអភិវឌ្ឍស្ថិរភាពទំនាក់ទំនងមិត្តភាព និងកិច្ចសហប្រតិបត្តិការរវាងចិន និងកូរ៉េខាងជើង ក្រោមស្ថានភាពថ្មីមួយ។ យ៉ាងណាមិញសារព័ត៌មានរដ្ឋកូរ៉េខាងជើង KCNA មិនបានបញ្ជាក់លំអិតពីអត្ថន័យនេះពាក្យ ស្ថានភាពថ្មីមួយ ដែលចិនផ្ញើរសារទៅកាន់កូរ៉េខាងជើងនោះទេ៕