ថ្នាក់ដឹកនាំកំពង់ផែស្វយ័តភ្នំពេញអះអាងថា នៅចរាចរណ៍ទំននិញចេញចូលកំពង់ផែនៅរយៈពេល ៩ខែមកនេះ មានភាពវិជ្ជមាន ប៉ុន្ដែ វាហាក់ននៅមានកម្រិតនៅឡើយបើធៀបនឹងឆ្នាំមុន ដោយសារតែការថមថយចុះនៃការបញ្ជាទិញទំនិញក្នុងវិស័យកាត់ដេរពីកម្ពុជា។
យោងតាមសេចក្ដីប្រកាសព័ត៌មានរបស់កំពង់ផែស្វយ័តភ្នំពេញ បានបង្ហាញថា នៅរយៈពេល ៩ខែ ឆ្នាំ២០២២ បរិមាណកុងតឺន័រឆ្លងកាត់កំពង់ផែនេះមានជិត ៣៣ម៉ឺនកុងតឺន័រ កើនឡើងជាង ២៨ភាគរយ បើធៀបនឹងរយៈពេលដូចគ្នានៅឆ្នាំ២០២១។
លោក ហ៊ឺ ប៉ាវី ប្រតិភូរាជរដ្ឋាភិបាល ទទួលបន្ទុកជាប្រធានអគ្គនាយកកំពង់ផែស្វយ័តភ្នំពេញ បានកត់សម្គាល់ឃើញថា ចរាចរណ៍នាវាដឹកទំនិញចេញ-ចូល កំពងផែស្វយ័តភ្នំពេញ នៅតែដំណើរការជាធម្មតា និងរក្សាបាននូវកំណើនវិជ្ជមាន ប៉ុន្ដែបើប្រៀបនឹងរយៈពេល ដូចគ្នានៅឆ្នាំ២០២១ កំណើននេះ ហាក់នៅមានកម្រិតនៅឡើយ។ នៅមានកម្រិត ក៏ដោយសារតែ បច្ចុប្បន្ន ការបញ្ជាទិញផលិតផលកាត់ដេរ សម្លៀកបំពាក់ និងស្បែកជើង ពីសហគមន៍អឺរ៉ុប និងសហរដ្ឋអាមេរិក ហាក់មានការថយចុះបន្តិចធៀបនឹងឆ្នាំ២០២១។
អត្ថបទគួរអាន
ដ្បិតសកម្មភាពនាវាដឹកទំនិញចេញ-ចូលដំណើរការធម្មតា ក៏ពិតមែន តែបញ្ហាសង្រ្គាមរវាងរុស្សីនិងអ៊ុយក្រែន នៅតែជះឥទ្ធិពលមួយចំនួនដល់វិស័យដឹកជញ្ជូននៅកម្ពុជា ពិសេសការកាត់បន្ថយការបញ្ជាទិញផលិតផលកាត់ដេរ សម្លៀកបំពាក់ និងស្បែកជើង ពីសហគមន៍អឺរ៉ុបតែម្ដង។ ក៏ប៉ុន្តែ បើទោះជាបែបនេះក្ដី លោក ហ៊ឺ ប៉ាវី នៅតែបង្ហាញនូវគំនិតសុទិដ្ឋិនិយម និងមានក្ដីរំពឹងថា សកម្មភាពដឹកជញ្ជូនទំនិញចេញ-ចូលកំពង់ផែស្វយ័តភ្នំពេញ នៅតែរក្សាបានកំណើនវិជ្ជមាន ទាំងនៅឆ្នាំ២០២២ និងនៅឆ្នាំ២០២៣។
សូមបញ្ជាក់ថា ជាមធ្យម ប្រាក់ចំណូលកំពង់ផែស្វយ័តភ្នំពេញ មានកំណើនក្នុងរង្វង់ ២០% ជារៀងរាល់ឆ្នាំ ក៏ប៉ុន្តែ ប្រសិនបើ ស្ថានភាពពិភពលោកនៅមិនទាន់មានស្ថិរភាពទេនោះ កំណើនរបស់កំពង់ផែស្វយ័តភ្នំពេញ អាចនឹងសម្រេចបានក្នុងរង្វង់ប្រមាណ ១៥% ប៉ុណ្ណោះ នៅឆ្នាំ២០២២នេះ។ នេះជាការបញ្ជាក់របស់លោក ហ៊ឺ ប៉ាវី ប្រធានអគ្គនាយកកំពង់ផែស្វយ័តភ្នំពេញ៕
