តើមានកត្តាប្រឈមធំៗអ្វីខ្លះ ជំរុញឲ្យធនាគារពិភពលោក បន្ទាបការព្យាករកំណើនសេដ្ឋកិច្ចប្រទេសជិតខាងកម្ពុជា?
ធនាគារពិភពលោក នៅដើមខែមេសានេះ បានចេញរបាយការណ៍ថ្មីចុងក្រោយមួយរបស់ខ្លួន ដោយនៅតែបន្តរក្សាការព្យាករកំណើនសេដ្ឋកិច្ចរបស់កម្ពុជានៅអត្រា ៤,៥% ដដែលសម្រាប់ឆ្នាំ២០២២នេះ ខណៈសេដ្ឋកិច្ចប្រទេសជិតខាងកម្ពុជាចំនួនបី ត្រូវបានធនាគារធនាគារពិភពលោកបន្ទាបការព្យាករទាបជាងមុន។ ពោលគឺ កំណើនសេដ្ឋកិច្ចរបស់ប្រទេសថៃ ត្រូវបានបន្ទាបការព្យាករមកនៅត្រឹមតែ ២,៩%ប៉ុណ្ណោះ ខណៈដែលពីមុនធ្លាប់ព្យាករថានឹងមានកំណើន៣,៩%។ ប្រទេសវៀតណាមវិញ កាលពីខែមករាធ្លាប់បានព្យាករថា មានកំណើន៥,៥% ប៉ុន្ដែ ការព្យាករថ្មីចុងក្រោយនេះរបស់ធនាគារពិភពលោកមកនៅត្រឹមតែ ៥,៣%ប៉ុណ្ណោះ។ ដោយឡែក ប្រទេសឡាវវិញ ធនាគារពិភពលោកទម្លាក់ការព្យាករកំណើនសេដ្ឋកិច្ចមកនៅត្រឹមតែ ៣,៨% ខណដែលការព្យាករពីមុនថា មានដល់ ៤,៥%។
ឥឡូវយើងផ្ដើមនិយាយលម្អិតពីសេដ្ឋកិច្ចរបស់ប្រទេសថៃមុនគេ! បើតាមសេដ្ឋវិទូធនាគារពិភពលោកប្រចាំប្រទេសថៃ អ្នកស្រី Warunthorn Puthong បាននិយាយថា ការទម្លាក់ការព្យាករកំណើនសេដ្ឋកិច្ចថៃមកនៅត្រឹម ២,៩%នៅឆ្នាំ២០២២នេះ គឺដោយសារតែកត្តាហានិភ័យខាងក្រៅ ដូចជាសង្គ្រាមរុស្ស៊ី និងអ៊ុយក្រែន និង វិបត្តិកូវីដ ១៩ ដែលបានធ្វើឱ្យតម្លៃថាមពល និង អតិផរណាក្នុងស្រុកកើនឡើង ធ្វើឲ្យជំរុញការចំណាយកើនខ្ពស់ និងប៉ះពាល់ដល់ការប្រើប្រាស់ឯកជននៅក្នុងប្រទេស។ សេដ្ឋវិទូធនាគារពិភពលោករូបនេះ បានបន្ថែមថា ប្រសិនបើឥទ្ធិពលនៃសង្គ្រាមនៅអ៊ុយក្រែនកាន់តែធ្ងន់ធ្ងរសម្រាប់ប្រទេសថៃ សេដ្ឋកិច្ចអាចនឹងកើនត្រឹមតែ ២,៦% ប៉ុណ្ណោះ។
យ៉ាងណាម៉េញ ធនាគារពិភពលោកជឿជាក់ថា សេដ្ឋកិច្ចថៃកំពុងស្ថិតនៅលើផ្លូវឆ្ពោះទៅរកការស្ទុះងើបឡើងវិញនៅឆ្នាំនេះ។ កត្តាវិជ្ជមានរួមមានការបើកប្រទេសឡើងវិញ និងការបន្ធូរបន្ថយការរឹតបន្តឹងជំងឺរាតត្បាត ដើម្បីបើកទទួលភ្ញៀវទេសចរណ៍ឡើងវិញជាដើម។
អត្ថបទគួរអាន
ងាកចេញពីប្រទេសថៃ យើងបន្ដចាប់អារម្មណ៍ទៅលើសេដ្ឋកិច្ចវៀតណាមវិញម្ដង។ ធនាគារពិភពលោកបានកាត់បន្ថយការព្យាករណ៍កំណើន សម្រាប់ប្រទេសវៀតណាមក្នុងឆ្នាំនេះមកត្រឹម ៥,៣% ដោយសារការកើនឡើងនៃការឆ្លងមេរោគកូវីដ ១៩ កាន់តែខ្លាំងនៅក្នុងត្រីមាសទី ១ នៅឆ្នាំនេះ និងការធ្លាក់ចុះសេដ្ឋកិច្ចនៅក្នុងទីផ្សារនាំចេញសំខាន់ៗរបស់ខ្លួន។ នេះបើតាមការចុះផ្សាយសារព័ត៌មាន VN Express។
គួរកត់សម្គាល់ថា នេះជាលើកទីពីរហើយ ដែលធនាគារទម្លាក់ការព្យាករកំណើនសេដ្ឋកិច្ចវៀតណាមនៅឆ្នាំ២០២២នេះ។ កាលពីខែតុលាឆ្នាំមុន ប្រទេសនេះត្រូវបានរំពឹងថានឹងមានអត្រាកំណើន ៦,៥% ប៉ុន្ដែនៅខែមករាក៏បានបន្ទាបការព្យាករមកនៅត្រឹម ៥,៥% ហើយនៅខែមេសានេះ ធនាគារពិភពលោក ក៏បានបន្ទាបការព្យការសេដ្ឋកិច្ចវៀតណាមមកនៅត្រឹម ៥,៣% ប៉ុណ្ណោះ។ ទោះយ៉ាងណា ធនាគារពិភពលោក គូសបញ្ជាក់ថា នៅក្នុងសេណារីយ៉ូ មានការបន្ធូរបន្ថយការរឹតបន្តឹងការចល័តក្នុងស្រុក និងអន្តរជាតិកាន់តែប្រសើរឡើង នោះ កំណើនសេដ្ឋកិច្ចវៀតណាមអាចឡើងដល់ ៦,៥% នៅឆ្នាំ២០២២។
ដោយឡែក ចំពោះសេដ្ឋកិច្ចរបស់ប្រទេសឡាវវិញ ត្រូវបានព្យាករថា នឹងមានកំណើនតែ ៣,៨% នៅឆ្នាំ ២០២២ ធ្លាក់ចុះពីអត្រាកំណើន ៤,៥% ដែលធនាគារពិភពលោកបានព្យាករណ៍កាលពីខែតុលាឆ្នាំមុន។ នេះបើតាមការចុះផ្សាយសារព័ត៌មាន Vientianme Time។
នៅក្នុងរបាយការណ៍ បច្ចុប្បន្នភាពសេដ្ឋកិច្ចអាស៊ីបូព៌ា និងប៉ាស៊ីហ្វិករបស់ធនាគារពិភពលោក បានសង្កត់ធ្ងន់ថា វិបត្តិអ៊ុយក្រែនបានគំរាមកំហែងដល់ការងើបឡើងវិញមិនស្មើគ្នានៃបណ្តាប្រទេសកំពុងអភិវឌ្ឍន៍អាស៊ីបូព៌ា និង ប៉ាស៊ីហ្វិក រួមទាំងប្រទេសឡាវ ដែលបណ្តាលមកពីការរីករាលដាលកូវីដ១៩។
បើទោះបីជាប្រទេសជិតខាងកម្ពុជាទាំងបីនេះ កំពុងមានទំនោរសេដ្ឋកិច្ចកើនយឺតក្ដី ប៉ុន្ដែ ធនាគារពិភពលោកនៅតែរក្សាការព្យាកររបស់ខ្លួនចំពោះកំណើនសេដ្ឋកិច្ចកម្ពុជា នៅឆ្នាំ២០២២ គឺស្ថិតក្នុងរង្វង់ ៤,៥% ដដែល ដូចទៅនឹងការព្យាករនៅអំឡុងខែតុលា ឆ្នាំ២០២១ ដែរ។ ការព្យាករថ្មីចុងក្រោយនេះ ផ្អែកលើការស្ដារសេដ្ឋកិច្ចក្នុងស្រុកល្អប្រសើរ ជាមួយនឹងវិធានការរបស់រាជរដ្ឋាភិបាលក្នុងការលុបចោលការរឹតត្បឹងការធ្វើដំណើរ ខណៈកម្ពុជាមានអត្រាចាក់វ៉ាក់សាំងកូវីដ១៩ខ្ពស់។
គួរជម្រាបថា នៅក្នុងសេណារីយ៉ូទាបជាង ធនាគារពិភពលោកព្យាករថា សេដ្ឋកិច្ចកម្ពុជានឹងសម្រេចបានកំណើនត្រឹមតែ៣,៨% ប៉ុណ្ណោះ នៅឆ្នាំ២០២២។ សេណារីយ៉ូទាបជាងនេះ គឺគេសន្មតថា មានការធ្លាក់ចុះនៃលក្ខខណ្ឌសេដ្ឋកិច្ចក្នុងស្រុក ដោយសារតែអត្រាអតិផរណាកើនឡើងខ្ពស់ ខណៈដែលលក្ខខណ្ឌខាងក្រៅកាន់តែអាក្រក់ ដោយសារតែការធ្លាក់ចុះនៃតម្រូវការខាងក្រៅ៕
អត្ថបទ វ៉ាន់ ស្រីរ័ត្ន
None
