បញ្ហាកង្វះខាតថាមពេល បានបន្ថែមភាពស្មុគស្មាញបន្ថែមទៀត ទៅលើបណ្តារដ្ឋទូទាំងពិភពលោក ដើម្បីពន្លឿនការផ្លាស់ប្តូរទៅរកថាមពល ដែលអាចកកើតឡើងវិញ ហើយដែលមិនបំផ្លាញបរិស្ថាន។
ជាក់ស្តែងនៅប្រទេសចិន និង ឥណ្ឌា ប្រទេសទាំងពីរបានព្យាយាមកាត់បន្ថយការប្រើប្រាស់ថាមពលបានពីធ្យូងថ្ម ដោយសារតែវាឡើងថ្លៃកប់ពពក និងដើម្បីចង់ថែរក្សាបរិស្ថានផងដែរ។ ប្រការនេះបានធ្វើឲ្យតំបន់ជាច្រើននៅក្នុងប្រទេសទាំងនេះ ខ្វះខាតអគ្គិសនីប្រើប្រាស់ ដែល បានបង្ខំចិត្តឲ្យរដ្ឋាភិបាល កាត់ផ្តាច់អគ្គិសនីពីពលរដ្ឋជាច្រើន។
ដោយឡែក នៅអឺរ៉ុបឯណោះវិញ ដោយសារតែតម្រូវការមានច្រើនហួសការផ្គត់ផ្គង់ តម្លៃនៃការទិញលក់ឧស្ម័នធម្មជាតិ បានកើនឡើង ១៣០% ចាប់តាំងពីខែកញ្ញាមក ពោលគឺតម្លៃនៃឧស្ម័នហ្គាសធម្មជាតិ បានហក់ឡើងដល់ ២៣០ដុល្លារក្នុងមួយធុងបារ៉ែល។
ចំណែកនៅតំបន់អាស៊ីបូព៌ា តម្លៃឧស្ម័នធម្មជាតិក៏បានកើនឡើង ៨៥%ផងដែរ ចាប់តាំងពីដើមខែកញ្ញាមក ដែលស្មើនឹងប្រមាណ ២០៤ ដុល្លារក្នុងមួយធុងបារ៉ែល។
អត្ថបទគួរអាន
ក្រៅតែពីកង្វះខាតធ្យូងថ្ម ឧស្ម័នធម្មជាតិឡើងថ្លៃ តម្លៃប្រេងឆៅឯណោះវិញ ក៏នៅតែបន្តកើនឡើងដូចគ្នាដែរ។ សារព័ត៌មានចិន CGTN បានចុះផ្សាយថា នៅពេញមួយសប្តាហ៍មុននេះ តម្លៃប្រេងឆៅសកលបានកើនឡើងប្រហែល ៤% ដោយសារវិបត្តិថាមពលពិភពលោក។ ខណៈដែលប្រេងឆៅនៅសហរដ្ឋអាមេរិក បានកើនឡើងដល់ជាង ៨០ដុល្លារក្នុងមួយធុងបារ៉ែល ជាតម្លៃខ្ពស់បំផុតមួយមិនធ្លាប់មានចាប់ពីឆ្នាំ២០១៤មក។
សូមជម្រាបថា វិបត្តិថាមពលពិភពលោកនេះ នឹងមិនងាយដោះស្រាយបានឆាប់ៗនោះទេ ដោយហេតុថា ថាមពលដើរតួនាទីសំខាន់ ស្ទើរនៅគ្រប់វិស័យ និងគ្រប់ប្រទេសទូទាំងពិភពលោកទៅហើយ ក្នុងដំណើរការស្តារសេដ្ឋកិច្ចឲ្យងើបចេញពីវិបត្តិកូវីដ១៩។ តម្រូវការប្រើប្រាស់កាន់តែច្រើន វិបត្តិខ្វះខាតថាមពល និង ការឡើងថ្លៃ នឹងបន្តកាន់តែយូរ។
ជាក់ស្តែង ប្រទេសចិន ដែលទើបប្រកាសកាត់បន្ថយការប្រើប្រាស់ធ្យូងថ្មកាលពីចុងខែកញ្ញា ដើម្បីឈានទៅសម្រេចបានគោលនយោបាយអព្យាក្រិតកាបូន នៅថ្ងៃសុក្រទី៨ តុលា រដ្ឋាភិបាលក្រុងប៉េកាំង បានចេញបញ្ជាឲ្យក្រុមហ៊ុនធ្វើអាជីវកម្មរ៉ែធ្យូងថ្មជាង ៧០កន្លែងនៅតំបន់ម៉ុងហ្គោលី ធ្វើការបង្កើនផលិតកម្មធ្យូងថ្មឲ្យបានជិត ១០០លានតោន។ បញ្ជានេះធ្លាក់មក ស្របពេលដែលចិនកំពុងជួបបញ្ហាខ្វះភ្លើងអគ្គិសនី និង គ្មានធ្យូងថ្មគ្រប់គ្រាន់៕
None
