សន្ទស្សន៍តម្លៃស្បៀងពិភពលោករបស់ទីភ្នាក់ងារស្បៀងអាហារនិងកសិកម្ម (FAO) របស់អង្គការសហប្រជាជាតិ បានធ្លាក់ចុះនៅក្នុងខែឧសភាដល់កម្រិតទាបបំផុតក្នុងរយៈពេលពីរឆ្នាំ ដោយសារការធ្លាក់ចុះនៃតម្លៃប្រេងបន្លែ ធញ្ញជាតិ និងអាហារ ដែលផលិតពីទឹកដោះគោ ខណៈដែលតម្លៃស្ក និងសាច់ផ្សេងៗឡើងថ្លៃ។ នេះបើតាមសេចក្តីរាយការណ៍របស់រ៉យទ័រ ដែលចុះផ្សាយនៅលើសារព័ត៌មាន Inquirer ។
ទីភ្នាក់ងារនេះបាននិយាយកាលចុងសប្តាហ៍មុនថា សន្ទស្សន៍តម្លៃស្បៀងរបស់អង្គការស្បៀងអាហារនិងកសិកម្មដែលជាអ្នកតាមដានតម្លៃទំនិញជាម្ហូបអាហារនៅលើទីផ្សារទូទាំងពិភពលោក ស្ថិតនៅក្នុងកម្រិតប្រមាណជា ១២៤ ពិន្ទុ ស្របពេលដែលតម្លៃនៅខែមីនាគឺនៅក្នុងកម្រិតប្រហាក់ប្រហែល ១២៨ពិន្ទុ។
កម្រិតនៃតម្លៃស្បៀងដែលបានកត់ត្រានៅក្នុងខែឧសភា គឺជាកម្រិតសន្ទស្សន៍នៃតម្លៃស្បៀងដែលទាបបំផុតចាប់តាំងពីខែមេសា ឆ្នាំ២០២១ ហើយប្រសិនបើធៀបនឹងពេលដែលតម្លៃស្បៀងស្ទុះឡើងខ្លាំងបំផុត កាលពីខែមីនា ឆ្នាំ២០២២ ឃើញថា តម្លៃនេះគឺក្រោមតម្លៃដែលគេបានកត់ត្រា ប្រមាណជា ២២ ភាគរយ ចាប់តាំងពីរុស្ស៊ីបានបើកការលុកលុយអ៊ុយក្រែន ។
សន្ទស្សន៍តម្លៃធញ្ញជាតិរបស់អង្គការស្បៀងអាហារនិងកសិកម្មបានធ្លាក់ចុះជិត ៥ ភាគរយ ក្នុងខែឧសភា ធៀបនឹងខែមេសា ដោយសារប្រភពនៃការផ្គត់ផ្គង់មានច្រើន និងការបន្តអនុវត្តគំនិតផ្តួចផ្តើមនាំចេញគ្រាប់ធញ្ញជាតិតាមសមុទ្រខ្មៅ ដែលរុស្ស៊ីបើកផ្លូវឲ្យនាំចេញស្បៀងពីអ៊ុយក្រែន។
អត្ថបទគួរអាន
អង្គការស្បៀងអាហារនិងកសិកម្មបាននិយាយថា សម្រាប់តម្លៃអង្ករនៅទីផ្សារអន្តរជាតិបានបន្តកើនឡើងក្នុងខែឧសភា ដែលបញ្ហានេះមួយផ្នែកគឺបណ្តាលមកពីការផ្គត់ផ្គង់កាន់តែតឹងរ៉ឹងដោយក្រុមប្រទេសនាំចេញមួយចំនួន។
ទីភ្នាក់ងារនេះបាននិយាយថា សន្ទស្សន៍តម្លៃប្រេងបន្លែបានធ្លាក់ចុះជិត ៩ ភាគរយ ដែលឆ្លុះបញ្ចាំងពីភាពខ្សោយនៃការផ្គត់ផ្គង់និងតម្រូវការប្រេងបន្លែ ខណៈដែលតម្លៃទឹកដោះគោក្នុងពិភពលោកបានធ្លាក់ចុះជាង ៣ ភាគរយ ចំពេលមានការកើនឡើងតាមរដូវកាលនៃទិន្នផលទឹកដោះគោនៅអឌ្ឍគោលខាងជើង។ ប៉ុន្តែផ្ទុយទៅវិញ តម្លៃស្ករបានបង្ហាញពីការកើនឡើង ៥,៥ ភាគរយ ពីខែមេសា ពោលគឺវាបានឡើង ៤ ដងជាប់ៗគ្នា ដោយសារការព្រួយបារម្ភអំពីបាតុភូតអាកាសធាតុអេលនីណូ និងហានិភ័យនៃការផ្គត់ផ្គង់សកល។
នៅក្នុងរបាយការណ៍ដាច់ដោយឡែកមួយស្តីពីការផ្គត់ផ្គង់និងតម្រូវការធញ្ញជាតិ, អង្គការស្បៀងអាហារនិងកសិកម្ម បានព្យាករណ៍ថា ផលិតកម្មធញ្ញជាតិលើពិភពលោកនៅឆ្នាំនេះមានចំនួន ៣ ពាន់ប៊ីលានតោន កើនឡើង ១ ភាគរយ ហើយស្តុកធញ្ញជាតិសកលក្នុងរដូវកាលនៃឆ្នាំ២០២៣ និងឆ្នាំ២០២៤ ត្រូវបានព្យាករណ៍ថានឹងកើនឡើងជិត ២ ភាគរយ ពោលគឺដល់ចំនួនប្រមាណជា ៨៧៣ លានតោន៕
