ក្រុមហ៊ុន Samsung បានចេញសេចក្ដីប្រកាសពីការផ្អាកលក់ផលិតផលទៅឱ្យរុស្ស៊ី នៅថ្ងៃសៅរ៍នេះ បន្ទាប់ពីក្រុមហ៊ុន Apple របស់អាមេរិកបានធ្វើដូចគ្នានេះដែរ កាលពីដើមសប្ដាហ៍ ។
សារព័ត៌មានអាមេរិក The New York Times ផ្សាយថា មែនទែនទៅ រុស្ស៊ីគឺជាទីផ្សារទូរសព្ទស្មាតហ្វូនតូចមួយប៉ុណ្ណោះចំពោះក្រុមហ៊ុនបច្ចេកវិទ្យាយក្សៗនៅលើពិភពលោក ដោយសារតែការលក់នៅក្នុងរុស្ស៊ី មានប្រហែលត្រឹមតែ ៣% ប៉ុណ្ណោះនៃការលក់ស្មាតហ្វូនសរុបនៅទូទាំងពិភពលោក ។
ប៉ុន្តែ វិធានការរបស់ក្រុមហ៊ុន Apple និង Samsung នេះ គឺជានិមិត្តរូប ដែលនឹងធ្វើឱ្យប្រជាជនរុស្ស៊ីដឹងថា រដ្ឋាភិបាលរបស់ពួកគេរងការរិះគន់ចំពោះអ្វីដែលពិភពលោកថ្កោលទោសថា ជាការឈ្លានពានរបស់រុស្ស៊ីទៅលើប្រទេសអ៊ុយក្រែន ។
ទោះជាយ៉ាងនេះក្ដី ប្រជាជនរុស្ស៊ីនៅតែអាចទិញទូរសព្ទស្មាតហ្វូនពីក្រុមហ៊ុនចិន ដូចជា Xiaomi ជាដើម បានដដែល ៕
