ក្រុមហ៊ុនទូរសព្ទចិន Xiaomi បញ្ចេញរថយន្តអគ្គិសនីដំបូង ជាមួយមហិច្ឆតាចង់ក្លាយជាក្រុមហ៊ុនផលិតរថយន្តកំពូល១របស់ពិភពលោក

ក្រុមហ៊ុន Xiaomi កាលពីថ្ងៃព្រហស្បតិ៍ សប្ដាហ៍នេះ បានបញ្ចេញរថយន្តប្រភេទស៊ីដាន់ម៉ូឌែល SU7 របស់ខ្លួន២ថ្ងៃបន្ទាប់ពីក្រុមហ៊ុន Huawei បានបញ្ចេញរថយន្តប្រភេទ SUV ម៉ូឌែល អាយតូ អឹម៩ (Aito M9) របស់ខ្លួន។

មហាសេដ្ឋី ឡី ជុន (Lei Jun) នាយកប្រតិបត្តិក្រុមហ៊ុន Xiaomi បានអះអាងថា រថយន្តម៉ូឌែល SU7 របស់ខ្លួនត្រូវបានបំពាក់ដោយម៉ូទ័រអគ្គិសនីកម្លាំងខ្លាំង ដែលផ្ដល់សមត្ថភាពបង្កើនល្បឿនលឿនជាងរថយន្តអគ្គិសនី (EV) របស់ក្រុមហ៊ុនអាល្លឺម៉ង់ Porsche និងក្រុមហ៊ុនអាម៉េរិក Tesla ទៅទៀត។

ក្រុមហ៊ុនយក្ស Xiaomi និងក្រុមហ៊ុន Huawei បានសាងកេរ្តិ៍ឈ្មោះល្បីរន្ទឺរួចមកហើយក្នុងនាមជាក្រុមហ៊ុនផលិតទូរសព្ទស្មាតហ្វូន និងគ្រឿងអេឡិចត្រូនិកផ្សេងៗទៀត ប៉ុន្តែក្នុងរយៈពេលប៉ុន្មានឆ្នាំចុងក្រោយនេះ ក្រុមហ៊ុនទាំងនេះបានបង្ហាញមហិច្ឆតាធំចង់ហក់ចូលប្រកួតប្រជែងក្នុងឧស្សាហកម្មរថយន្ត​។

កាលពីឆ្នាំ២០២១ ក្រុមហ៊ុន Xiaomi បានប្រកាសថា ខ្លួននឹងបោះទុនវិនិយោគក្នុងទំហំទឹកប្រាក់១០ពាន់លានដុល្លារក្នុងរយៈពេល១ទសវត្សរ៍ក្រោយ ដើម្បីផលិតរថយន្តអគ្គិសនីឆ្លាតវៃ។

ថ្លែងក្នុងព្រឹត្តិការណ៍បញ្ចេញម៉ូឌែលរថយន្ត SU7 កាលពីថ្ងៃព្រហស្បតិ៍ សប្ដាហ៍នេះ មហាសេដ្ឋី ឡី ជុន (Lei Jun) នាយកប្រតិបត្តិក្រុមហ៊ុន Xiaomi បានលើកឡើងថា ក្រុមហ៊ុនរបស់លោកកំពុងឈានចូលក្នុងទសវត្សរ៍ថ្មី ហើយសង្ឃឹមថា នឹងក្លាយជាក្រុមហ៊ុនមួយក្នុងចំណោមក្រុមហ៊ុនផលិតរថយន្តកំពូលទាំង៥ របស់ពិភពលោកក្នុងរយៈពេលពី១៥ឆ្នាំទៅ២០ឆ្នាំខាងមុខ។

លោកបានគូសបញ្ជាក់ថា នេះគឺជាចំណុចចាប់ផ្ដើមថ្មីមួយសម្រាប់ក្រុមហ៊ុន Xiaomi ហើយលោកជឿជាក់​ថា នៅថ្ងៃណាមួយនាពេលអនាគតគេនឹងឃើញមានរថយន្ត Xiaomi បើកបរលើគ្រប់ផ្លូវថ្នល់នៅទូទាំងពិភពលោក៕​

ដោយ: តែម សុខុម