#វិស័យពាណិជ្ជកម្ម

សហរដ្ឋអាម៉េរិក បានសម្រេចបញ្ចុះអត្រាពន្ធគយបដិការលើទំនិញនាំចូលពីកម្ពុជា មកនៅត្រឹម ១៩% ដែលជាកម្រិតមួយទាបជាងប្រទេសដៃគូប្រកួតប្រជែងមួយចំនួនដូចជាវៀតណាម ឡាវ មីយ៉ាន់ម៉ា ស្រីលង្ការ និងបង់ក្លាដែស ជាដើម។ ទោះបីជាអត្រាពន្ធគយបដិការថ្មីនេះជាកម្រិតល្អប្រសើរមួយសម្រាប់កម្ពុជាយ៉ាងណាក្តី តែក្រុមអ្នកជំនាញបានវាយតម្លៃថា គំនាបពន្ធគយនេះទំនងជាអាចធ្វើឱ្យប៉ះពាល់ដល់ការបញ្ជាទិញ និងការនាំចេញទំនិញមួយចំនួនរបស់កម្ពុជា ទៅកាន់ទីផ្សារសហរដ្ឋអាម៉េរិក។