កម្ពុជានឹងធ្វើជាប្រធានក្នុងកិច្ចប្រជុំកំពូលអាស៊ានឆ្នាំ២០២២បន្តពីប្រទេសប្រុយណេ

ក្នុងនាមជាប្រធានក្នុងកិច្ចប្រជុំកំពូលអាស៊ាននៅឆ្នាំ២០២២ សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា ក៏បានបង្ហាញនូវការប្តេជ្ញាចិត្តមួយចំនួនផងដែររបស់កម្ពុជា ក្នុងនាមជាម្ចាស់ផ្ទះនៃកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធនៅឆ្នាំក្រោយនេះ។ បន្ថែមពីនេះ សម្តេចតេជោ ហ៊ុន សែន ក៏បានប្តេជ្ញាធ្វើឱ្យកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ នៅឆ្នាំក្រោយ ទទួលបានជោគជ័យយ៉ាងត្រចះត្រចង់ថែមទៀតផង។

សម្តេច តេជោ ហ៊ុន សែន បានសរសេរនៅលើហ្វេសប៊ុកផេកផ្លូវការរបស់សម្តេច នៅក្រោយកិច្ចប្រជុំកំពូលអាស៊ាននៅប្រុយណេត្រូវបានបញ្ចប់ថា ការប្រជុំលើកទី៣៨និងលើកទី៣៩ត្រូវបានបិទបញ្ចប់ជាមួយនឹងការទទួលជាប្រធានប្តូរវេនអាស៊ានរបស់កម្ពុជាសម្រាប់ឆ្នាំ២០២២។

សម្តេចតេជោ ហ៊ុន សែន បន្ថែមថា ក្នុងនាមនាយករដ្ឋមន្ត្រីកម្ពុជាមួយរូប សម្តេចបានកាន់ញញួរប្រធានអាស៊ានរហូត៣ដងហើយ។

សូមបញ្ជាក់ថា ក្នុងកិច្ចប្រជុំកំពូលអាស៊ានចំនួន ៣ថ្ងៃកន្លងមកនេះ កម្ពុជារួមជាមួយអាស៊ាន និងប្រទេសផ្សេងទៀតមានកិច្ចប្រជុំដល់ទៅចំនួន ១១ឯណោះ។ កិច្ចប្រជុំកំពូលអាស៊ានត្រូវបានប្រារព្ធធ្វើឡើងជារៀងរាល់ឆ្នាំ ដើម្បីដោះស្រាយបញ្ហា នយោបាយ អាកាសធាតុ សង្គម វប្បធម៌ និងជំងឺឆ្លង ផ្សេងៗ៕