ក្នុងសេចក្តីថ្លែងការណ៍ដែលផ្ញើតាមអ៊ីម៉េល លោក ហ៊ីរ៉ូណូរី ស៊ូហ្សុគី ដែលជាទីប្រឹក្សាស្ថានទូតជប៉ុន បាននិយាយថា ដំណើរទស្សនកិច្ច ២ថ្ងៃរបស់លោក អីវ៉ាវ ហូរី រដ្ឋមន្រ្តីការបរទេសរងជប៉ុន គឺដើម្បីពិភាក្សាជាមួយកម្ពុជាដើម្បីពង្រឹងបន្ថែមទៀតនូវទំនាក់ទំនងយុទ្ធសាស្ត្រ។
ទីប្រឹក្សាទូតជប៉ុន ហ៊ីរ៉ូណូរី ស៊ូហ្សុគី បាននិយាយថា «គាត់ (លោក អីវ៉ាវ ហូរី) ក៏បានស្នើសុំឱ្យមានកិច្ចខិតខំប្រឹងប្រែងបន្ថែមទៀតដើម្បីធ្វើឱ្យប្រសើរឡើងនូវបរិយាកាសវិនិយោគនៅក្នុងប្រទេសកម្ពុជា ផងដែរ។»
ស្ថានទូតមិនបានបញ្ជាក់លម្អិតថាខ្លួនចង់បានភាពប្រសើរលើទិដ្ឋភាពជាក់លាក់អ្វីខ្លះនោះទេ។
មន្ត្រីទីប្រឹក្សាស្ថានទូតជប៉ុនដដែល បាននិយាយថា ជប៉ុននឹងបង្កើនជំនួយដើម្បីជួយកម្ពុជាឱ្យក្លាយជាប្រទេសដែលមានប្រាក់ចំណូលខ្ពស់នៅឆ្នាំ២០៣០។
តើអ្នកបានអានអត្ថបទនេះ ឬនៅ?
លោកក៏បានកត់សម្គាល់ផងដែរថា ជប៉ុននឹងបង្កើតការិយាល័យកុងស៊ុលនៅខេត្តសៀមរាប នៅឆ្នាំក្រោយ។
ទាក់ទងនឹងស្ថានភាពនយោបាយនៅកម្ពុជា លោក អីវ៉ាវ ហូរី បានសម្តែងនូវការរំពឹងទុកថា ការបោះឆ្នោតជាតិលើកក្រោយ នឹងត្រូវបានធ្វើឡើងដោយសេរី និងយុត្តិធម៌ដោយកត់សម្គាល់ថា ជប៉ុននឹងបន្តផ្តល់ជំនួយកំណែទម្រង់ការបោះឆ្នោត ដល់កម្ពុជា។
លោក ហ៊ីរ៉ូណូរី ស៊ូហ្សុគី បាននិយាយថា «ថ្វីបើមានការព្រួយបារម្ភអំពីភាពតានតឹងផ្នែកនយោបាយនាពេលថ្មីៗនេះក៏ដោយ ក៏លោករំពឹងថា ការបោះឆ្នោតទូទៅនឹងប្រព្រឹត្តទៅតាមរបៀបដែលសហគមន៍អន្តរជាតិនឹងស្វាគមន៍។»
យោងតាមតួលេខផ្លូវការ ពាណិជ្ជកម្មរវាងកម្ពុជានិងជប៉ុនក្នុងឆ្នាំ២០១៦ មានតម្លៃជាទឹកប្រាក់សរុប ១,៣ពាន់លានដុល្លារ។
ទោះបីជាប្រទេសចិននាំមុខការវិនិយោគនៅក្នុងកម្ពុជាក៏ដោយ ជប៉ុនគឺជាអ្នកដើរតួនាទីសំខាន់មួយដែរ ដោយប្រទេសជឿនលឿនមួយនេះគឺជាវិនិយោគិនធំបំផុតទីបីនៅក្នុងប្រទេសកម្ពុជា។
តើអ្នកបានអានអត្ថបទនេះឬនៅ?
យោងតាមតួលេខផ្លូវការ ការវិនិយោគរបស់ជប៉ុននៅកម្ពុជាមានតម្លៃប្រមាណ ៨០០លានដុល្លារកាលពីឆ្នាំមុន។
ចាប់តាំងពីឆ្នាំ១៩៩២ ជប៉ុនជាម្ចាស់ជំនួយដ៏ធំបំផុតរបស់កម្ពុជាផងដែរ ដែលបានផ្តល់ជំនួយអភិវឌ្ឍន៍ជាផ្លូវការជាង ២ពាន់លានដុល្លារ។
ក្រសួងការបរទេសកម្ពុជា បាននិយាយក្នុងសេចក្តីថ្លែងការណ៍ក្រោយជំនួបជាមួយលោក អីវ៉ាវ ហូរី ថា ការចោទប្រកាន់មកលើរដ្ឋាភិបាលដោយមជ្ឈដ្ឋានមួយចំនួនលើករណីកាសែត ឌឹ ខេមបូឌា ដេលី អង្គការ NDI និងករណីលោក កឹម សុខា ប្រធានគណបក្សប្រឆាំងនោះ គឺជារឿង”អយុត្តិធម៌។”
ក្នុងជំនួប កម្ពុជាក៏បានអរគុណដល់ជប៉ុនចំពោះការផ្តល់ជំនួយក្នុងរយៈពេលកន្លងមក ហើយក៏បានវាយតម្លៃខ្ពស់ចំពោះការកើនឡើងយ៉ាងខ្លាំងនូវវិនិយោគទុនជប៉ុននៅកម្ពុជា ផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
