ឆ្នាំ២០២០ កម្ពុជារំពឹងរកចំណូលបាន៥ពាន់លានដុល្លារពីទេសចរណ៍

ក្នុងឆ្នាំ២០២០ កម្ពុជាគ្រោងទទួលភ្ញៀវទេសចរអន្តរជាតិប្រមាណ ៧លាននាក់ ជាមួយនឹងចំណូលចាក់បញ្ចូលទៅក្នុងសេដ្ឋកិច្ចជាតិប្រមាណ ៥ពាន់លានដុល្លារអាមេរិក។ នេះបើយោងតាមការព្យាការរបស់ក្រសួងទេសចរណ៍។

ភ្ញៀវទេសចរទាំងក្នុងស្រុក ទាំងបរទេសប្រមូលផ្ដុំគ្នាមើលថ្ងៃរះនៅបរិវេណប្រាសាទអង្គរវត្ត ខេត្តសៀមរាប។

អ្វីដែលកម្ពុជារំពឹងទុកខ្ពស់បំផុតពីការរកចំណូលក្នុងវិស័យទេសចរណ៍ គឺទាក់ទាញភ្ញៀវទេសចរមកពីប្រទេសចិន។ រដ្ឋាភិបាលកម្ពុជាបាននិងកំពុងខិតខំរកយុទ្ធសាស្ត្រក្នុងការទាក់ទាញភ្ញៀវទេសចរអន្តរជាតិ ពិសេសគឺចិនតែម្តង។

ជាក់ស្តែង នៅក្នុងឆមាសទី១ នៃឆ្នាំ២០១៧នេះ ទេសចរចិនដណ្តើមបានតំណែងលេខ១ ដែលច្រានទេសចរវៀតណាមមកនៅតំណែងលេខ២វិញ ហើយទេសចរឡាវដណ្តើមចំណាត់ថ្នាក់លេខ៣ ដោយរុញច្រានទេសចរកូរ៉េទៅលេខ៤។ ពោលគឺទេសចរចិនខ្ពស់ជាងគេក្នុងចំណោមភ្ញៀវទេសចរអន្តរជាតិទាំងអស់ដែលបានមកទស្សនាកម្ពុជា។

កាលពីឆ្នាំ២០១៦ កម្ពុជាទទួលបានចំណូលពីវិស័យទេសចរណ៍ជូនថវិកាជាតិ ជាង៣ពាន់លានដុល្លារអាមេរិក ស្មើនឹង ១៣% នៃផលិតផលក្នុងស្រុកសរុប ដែលមានភ្ញៀវទេសចរអន្តរជាតិសរុប ៥លាននាក់។ ហើយបង្កើតការងារផ្ទាល់ប្រមាណ ៦២ម៉ឺននាក់ ស្មើនឹង១៣% នៃកម្លាំងពលកម្មសរុប ព្រមទាំងការងារដោយប្រយោលរាប់សិបម៉ឺននាក់ទៀត។ នេះបើយោងតាមរបាយការណ៍ពីក្រសួងទេសចរណ៍។

វិស័យឧស្សាហកម្មគ្មានផ្សែងរបស់កម្ពុជា ត្រូវបានចាត់ទុកជាមាសបៃតង និងជាការនាំចេញនៅនឹងកន្លែង។ វិស័យនេះចូលរួមអភិវឌ្ឍសេដ្ឋកិច្ចនិងសង្គមតាមរយៈការបង្កើតប្រាក់ចំណូលជូនជាតិ បង្កើតការងារ ជំរុញការវិនិយោគ និងចូលរួមកាត់បន្ថយភាពក្រីក្ររបស់ប្រជាពលរដ្ឋ។

វិស័យទេសចរណ៍កម្ពុជាក៏បានចូលរួមចំណែកលើកកម្ពស់ថែរក្សានិងអភិរក្សសម្បត្តិ វប្បធម៌ និងធម្មជាតិរបស់ប្រទេស ចូលរួមកាត់បន្ថយការកើនឡើងនូវកម្ដៅភពផែនដី និងជាកាតាលីករមួយដ៏សំខាន់ក្នុងការជំរុញសាកលភាវូបនីយកម្ម និងសមាហរណកម្មតំបន់ផងដែរ។

យោងតាមអង្គការទេសចរណ៍ពិភពលោក វិស័យទេសចរណ៍មានការរីកចម្រើនយ៉ាងខ្លាំងក្នុងតំបន់អាស៊ាន។ នៅឆ្នាំ២០១៦ ការមកដល់នៃទេសចរអន្តរជាតិក្នុងតំបន់អាស៊ាន មានចំនួន ១១៦លាននាក់ កើនឡើង ៦,៥%។ ទេសចរផ្ទៃក្នុងអាស៊ាន មានចំនួន ៥១លាននាក់ ត្រូវជា ៤៦% នៃទេសចរអន្តរជាតិសរុបមកទស្សនាតំបន់អាស៊ាន ដោយមានកំណើន ៤%។

ទេសចរណ៍អាស៊ានបានបង្កើតការងារផ្ទាល់ប្រមាណ ១២លាននាក់ និងមិនផ្ទាល់ ប្រមាណ ៣០លាននាក់ និងបានបង្កើតចំណូលជូនជាតិប្រមាណ ១២% នៃផលិតផលក្នុងស្រុកសរុប។

ជាចក្ខុវិស័យឆ្នាំ២០២០ អាស៊ាននឹងទទួលបានទេសចរអន្តរជាតិប្រមាណ ១២៣លាននាក់។

បើគិតត្រឹមឆ្នាំ២០១៥ វិស័យទេសចរណ៍បានបង្កើតការងារប្រមាណ ២៥០លាននាក់ ពោលក្នុងចំណោមការងារចំនួន១១ មានការងារ ១ ជាការងារក្នុងវិស័យទេសចរណ៍ និងបង្កើតចំណូលសរុបប្រមាណ ៧,៣ ទ្រីលានដុល្លារអាមេរិក ស្មើនឹង ១០% នៃផលិតផលក្នុងស្រុកសរុប។

នៅក្នុងពិភពលោក ចំណូលពីវិស័យទេសចរណ៍ស្មើនឹង ៣០% នៃការនាំចេញផ្នែកសេវាកម្ម និង ៧% នៃការនាំចេញសរុប ស្ថិតក្នុងលំដាប់លេខ៣ បន្ទាប់ពីការនាំចេញផលិតផលប្រេងឥន្ទនៈ និងផលិតផលគីមី៕

None