រាជរដ្ឋាភិបាលកម្ពុជា តាមរយៈក្រសួងសេដ្ឋកិច្ចនិងហិរញ្ញវត្ថុ នឹងបើកកិច្ចប្រជុំមួយ នៅថ្ងៃទី១៤ សីហា ឆ្នាំ២០១៧ ដើម្បីផ្សព្វផ្សាយដល់អ្នកពាក់ព័ន្ធទាំងអស់ អំពីកិច្ចអន្តរាគមន៍របស់រដ្ឋាភិបាល ក្នុងការប្រមូលទិញស្រូវ។ នេះបើយោងតាមលិខិតជូនដំណឹងរបស់ក្រសួងសេដ្ឋកិច្ចនិងហិរញ្ញវត្ថុ ជូនដល់បណ្ដាញផ្សព្វផ្សាយព័ត៌មាន។
កិច្ចប្រជុំស្ដីពីអន្តរាគមន៍របស់រដ្ឋាភិបាលក្នុងការប្រមូលទិញស្រូវនេះ នឹងប្រព្រឹត្តទៅនៅវេលាម៉ោង ៩ព្រឹក នៅទីស្ដីការក្រសួងសេដ្ឋកិច្ចនិងហិរញ្ញវត្ថុ។
គួររំឭកដែរថា ថ្មីៗនេះ រដ្ឋាភិបាលបានប្រកាសបញ្ចេញថវិកាបន្ថែម ១៥លានដុល្លារអាមេរិក សម្រាប់ឲ្យធនាគារអភិវឌ្ឍន៍ជនបទ យកទៅកសាងឡសម្ងួតនិងឃ្លាំងស្តុកស្រូវ។
តើអ្នកបានអានអត្ថបទនេះ ឬនៅ?
ការកសាងឡសម្ងួត និងឃ្លាំងស្តុកស្រូវនេះ ជាជំហានដំបូង នឹងត្រូវអនុវត្តក្នុងខេត្តកំពង់ធំ ព្រៃវែង និងតាកែវ។
ឯកឧត្តម កៅ ថាច អគ្គនាយកធនាគារអភិវឌ្ឍន៍ជនបទ បានមានប្រសាសន៍ថា នេះជាផែនការវិនិយោគបន្តបន្ទាប់របស់រាជរដ្ឋាភិបាល ហើយក៏នឹងអាចពង្រីកទៅតាមតំបន់យុទ្ធសាស្រ្តនៃខេត្តផ្សេងៗទៀតជាច្រើនផងដែរ។
ឯកឧត្តមបន្ថែមថា គិតមកដល់ពេលនេះ ធនាគារអភិវឌ្ឍន៍ជនបទមានកញ្ចប់ថវិកាបម្រុងសម្រាប់សង្គ្រោះវិស័យស្រូវអង្ករសរុប ៥០លានដុល្លារ ក្នុងនោះកញ្ចប់ថវិកាពីរាជរដ្ឋាភិបាលប្រមាណ៤៣លាន និងកញ្ចប់ថវិការបស់ធនាគារអភិវឌ្ឍន៍ជនបទ ៧លាន៕
