ជុំវិញទៅនឹងការបែងចែកភាគលាភរបស់ធនាគារអេស៊ីលីដានេះដែរ អគ្គនាយកក្រុមហ៊ុនផ្សារមូលបត្រកម្ពុជាបញ្ជាក់ថា វានឹងផ្ដល់ទំនុកចិត្តសារជាថ្មីដល់សាធារណៈជន ដែលជាភាគហ៊ុនិកសាធារណៈ ដែលតែងតែរំពឹងពីការបែងចែកភាគលាភនាពេលកន្លងមកនេះ។
តាមសេចក្ដីជូនដំណឹងរបស់ធនាគារអេស៊ីលីដាដដែលនេះ បានឲ្យដឹងទៀតថា ភាគហ៊ុនិកសាធារណៈ ដែលធ្វើការលក់មូលបត្រកម្មសិទ្ធិរបស់ខ្លួននៅថ្ងៃទី ២៩ខែមេសា ឆ្នាំ២០២១ នៅតែទទួលបានភាគលាភដដែល។ ដោយឡែក ចំពោះភាគហ៊ុនិកសាធារណៈ ដែលទិញមូលបត្រកម្មសិទ្ធិ នៅថ្ងៃទី២៩ ខែមេសា ឆ្នាំ២០២១ មិនមានសិទ្ធិទទួលបានភាគលាភនោះទេ។
ការទូទាត់ភាគលាភនេះ បានចាប់ផ្ដើមតាំងពីថ្ងៃទី ១០ ដល់ថ្ងៃទី២១ ខែមិថុនាឆ្នាំ២០២១។
ការប្រកាសបែងចែកភាគលាភរបស់អេស៊ីលីដាសម្រាប់តែវិនិយោគិនសាធារណៈនេះ ធ្វើឡើងនៅចំពេលដែលអ្នកដែលទិញភាគហ៊ុនរបស់ធនាគារនេះ មានការរង់ចាំយ៉ាងអន្ទះសារ ហើយការពន្យារពេលបែងចែកភាគលាភនាពេលកន្លងមកនោះ ក៏ដោយសារតែមានការណែនាំពីសំណាក់ធនាគារជាតិនៃកម្ពុជា ដែលជាអណាព្យាបាលបានអំពាវនាវដល់ធនាគារ និងគ្រឹះស្ថានមីក្រូហិរញ្ញវត្ថុទាំងអស់ ឲ្យផ្អាកការបែងចែងភាគលាភចំពោះប្រាក់ចំណេញនៅឆ្នាំ២០២០ ដល់ភាគទុនិករបស់ខ្លួន ដែលវាជាវិធានការមួយរួមចំណែករក្សាកំណើនរបស់វិស័យធនាគារ និង ហិរញ្ញវត្ថុនៅកម្ពុជា។
អត្ថបទគួរអាន
ជុំវិញការបែងចែកភាគលាភ ៣០% នៃប្រាក់ចំណេញរបស់ធនាគារអេស៊ីលីដា ទៅឲ្យតែភាគហ៊ុនិកសាធារណៈនេះដែរ ត្រូវបានឯកឧត្តម ហុង សុហួរ អគ្គនាយកក្រុមហ៊ុនផ្សារមូលបត្រកម្ពុជា បានពន្យល់ថា កន្លងទៅថ្វីត្បិត តែធនាគារជាតិនៃកម្ពុជា បានជូនដំណឹងដល់ធនាគារនិង គ្រឹះស្ថានមីក្រូហិរញ្ញវត្ថុទាំងអស់កុំទាន់ធ្វើការបែងចែកប្រាក់ចំណេញរបស់ខ្លួនក៏ពិតមែន ប៉ុន្តែធនាគារ អេស៊ីលីដា មិនអាចអនុវត្តតាមសេចក្តីជូនដំណឹងទាំងស្រុងនោះទេ ដោយក្នុងនោះ ឯកឧត្តម ហុង សុហួរ បញ្ជាក់ថា ធនាគារ អេស៊ីលីដា បានសម្រេចបែងចែងភាគលាភជូនដល់វិនិយោគិនសាធារណៈរបស់ខ្លួននាពេលនេះ គឺដើម្បីផ្តល់ទំនុកចិត្តដល់សាធារណៈជន ដែលជាភាគហ៊ុនិកសាធារណៈរបស់ខ្លួន ។
បើទោះបីជាធនាគារអេស៊ីលីដា បានប្រកាសពីប្រាក់ចំណេញដល់ទៅជាង១៤០លានដុល្លារនៅឆ្នាំ២០២០ក៏ដោយ ប៉ុន្ដែគេសង្កេតឃើញថា តម្លៃភាគហ៊ុនរបស់អេស៊ីលីដា នៅមួយរយៈពេលចុងក្រោយនេះ គឺមានការធ្លាក់ចុះគួរឲ្យកត់សម្គាល់ ដោយតម្លៃភាគហ៊ុនធនាគារនេះ ធ្លាក់ចុះស្ទើរតែមកដល់តម្លៃបោះផ្សាយ IPO ដំបូងទៅហើយ។
នៅពេលដែលត្រូវបានសួរថា តើតម្លៃភាគហ៊ុនអេស៊ីលីដាអាចនឹងស្ទុះងើបឡើងវិញទេ ក្រោយពីមានការបែងចែកភាគលាភឲ្យវិនិយោគិនសាធារណៈ?
លោកស្រី ម៉ា អមរា អនុប្រធាននាយកប្រតិបត្តិធនាគារអេស៊ីលីដា បានបញ្ជាក់ថា ជាទូទៅទីផ្សារភាគហ៊ុនតែងតែមានបម្រែបម្រួល ប៉ុន្តែធនាគារ ក៏ដូចវិស័យធនាគារទាំងមូលនៅតែមានស្ថានភាពរឹងមាំល្អដដែល ។ លោកស្រី ម៉ា អមរា បន្ថែមថា តម្លៃភាគហ៊ុនឡើងចុះរបស់ធនាគារអេស៊ីលីដា នាពេលបច្ចុប្បន្នអាស្រ័យលើការផ្គត់ផ្គង់ និង តម្រូវនៅលើទីផ្សារ។
ធនាគារអេស៊ីលីដា បានសម្រេចគោះជួងបោះផ្សាយលក់មូលបត្រកម្មសិទ្ធិរបស់ខ្លួនជាផ្លូវការលើកដំបូងនៅលើផ្សារមូលបត្រកម្ពុជាកាលពីខែឧសភាឆ្នាំ២០២០ ដោយតម្លៃភាគហ៊ុនរបស់ធនាគារត្រូវបានកំណត់ដោយនិយ័តករមូលបត្រកម្ពុជាក្នុងតម្លៃ ១៦.២០០រៀលក្នុងមួយភាគហ៊ុន។
ក្រោយពីបោះផ្សាយលក់ភាគហ៊ុនជាផ្លូវការគេសង្កេតឃើញថាតម្លៃភាគហ៊ុនអេស៊ីលីដាបានចាប់ផ្ដើមឡើងថ្លៃជាបន្ដបន្ទាប់រហូតដល់ទៅជាង២ម៉ឺនរៀលក្នុងមួយហ៊ុន ប៉ុន្ដែនៅមួយរយៈចុងក្រោយនេះ តម្លៃភាគហ៊ុនរបស់អាស៊ីលីដាបានធ្លាក់ចុះស្ទើរតែស្មើតម្លៃបោះផ្សាយលក់ដំបូងទៅហើយ ជាក់ស្តែងគិតត្រឹមថ្ងៃទី១៦ មិថុនា ម្សិលមិញ តម្លៃភាគហ៊ុនអេស៊ីលីដា ធ្លាក់មកដល់ តម្លៃ ១៦២២០រៀល ជាមួយនឹងទំហំនៃជួញដូរភាគហ៊ុនជាង ២ម៉ឺន ២ពាន់ភាគហ៊ុន និង ទឹកប្រាក់សរុបជាង ៣៦០លានរៀល។
ទាក់ទងនឹងការវិនិយោគក្នុងផ្សារមូលបត្រកម្ពុជាវិញ អគ្គនាយកក្រុមហ៊ុនផ្សារមូលបត្រកម្ពុជាឯកឧត្តម ហុង សុហួរ បានឲ្យដឹងថា ទោះបីជាមានការរីករាលដាលខ្លាំងនៃជំងឺកូវីដ១៩នៅក្នុងអំឡុងត្រីមាសទី១នៃឆ្នាំនេះក្តី ក៏សកម្មភាពរបស់ផ្សារភាគហ៊ុនកម្ពុជាមិនមានការប៉ះពាល់អ្វីឡើយ ប៉ុន្តែការអូសបន្លាយនៃព្រឹត្តិការណ៍សហគមន៍២០កុម្ភៈ ក៏អាចនឹងមានផលប៉ះពាល់ដល់ចំនួនក្រុមហ៊ុន ដែលគ្រោងនឹងចុះបញ្ជីនៅឆ្នាំនេះដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
