នៅប៉ុន្មានឆ្នាំចុងក្រោយនេះ វិស័យទេសចរណ៍បានដើរតួនាទីដ៏សំខាន់ក្នុងការជំរុញនិងលើកកម្ពស់ដល់កំណើនសេដ្ឋកិច្ចកម្ពុជា ខណៈដែលវិស័យមួយនេះត្រូវបានចាត់ទុកថា ជាវិស័យអាទិភាពមួយ ឬហៅថា “មាសបៃតង” របស់កម្ពុជា ក្នុងការចូលរួមចំណែកដល់ការអភិវឌ្ឍសេដ្ឋកិច្ច សង្គម និងការការពារបរិស្ថាន។
រាជរដ្ឋាភិបាលកម្ពុជាបាននិងកំពុងដុតដៃដុតជើងយ៉ាងខ្លាំង ក្នុងការសម្រួចយុទ្ធសាស្ត្រនិងចក្ខុវិស័យទេសចរណ៍ឲ្យកាន់តែស្រួចស្រាល់ជាងមុន សំដៅធ្វើយ៉ាងណាស្រូបយកភ្ញៀវទេសចរបរទេស ឲ្យចូលមកកម្សាន្ដកម្ពុជាកាន់តែច្រើនឡើង។ ក្នុងនោះ ការស្រូបយកទេសចរចិនកំពុងក្លាយជាមុខព្រួញមួយសម្រាប់រាជរដ្ឋាភិបាលកម្ពុជា ដើម្បីរៀបចំនូវយុទ្ធសាស្ត្រក្នុងការទាក់ទាញឲ្យភ្ញៀវទេសចរចិនចូលមកទស្សនាកម្សាន្ដនៅកម្ពុជាឲ្យបាន២លាននាក់នៅឆ្នាំ២០២០។ ខណៈដែលទេសចរចិន គឺជាទីផ្សារទេសចរណ៍ដ៏ធំសម្រាប់កម្ពុជា ក៏ដូចជាបណ្ដាប្រទេសនៅទូទាំងពិភពលោកផងដែរ។
ថ្លែងនៅក្នុងវេទិកា China Ready ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍បានលើកឡើងថា ភ្ញៀវទេសចរចិនគឺជាទីផ្សារទេចរណ៍ដ៏ធំមួយ ដែលប្រទេសនៅទូទាំងពិភពលោក ជ្រួលជ្រើមនិងត្រៀមចាប់យក ខណៈដែលនៅឆ្នាំ២០៣០ កំណើនទេសចរចិនដែលធ្វើដំណើរទៅក្រៅប្រទេស អាចកើនឡើងដល់ជាង ៥០០លាននាក់។
តើអ្នកបានអានអត្ថបទនេះ ឬនៅ?
កំណើននៃភ្ញៀវទេសចរចិនក៏បានផ្ដល់នូវឱកាសការងារសម្រាប់ប្រជាជនមានការកើនឡើងផងដែរ ដោយក្នុងនោះ បុគ្គលិកជំនាញដែលចេះភាសាចិននឹងមានតម្រូវការកើនខ្លាំង។ បើតាមការអះអាងពី ឯកឧត្តម ថោង ខុន ភ្ញៀវទេសចរបរទេសដែលមកកម្សាន្ដនៅកម្ពុជា មានប្រមាណជាង ៧០% មកពីប្រទេសក្នុងតំបន់អាស៊ី និងជាង ១០%ទៀត គឺមកពីទីផ្សារអឺរ៉ុប។ ក្នុងនោះ ទេសចរចិន គឺជាទីផ្សារដ៏ធំជាងគេរបស់កម្ពុជា។
ឯកឧត្តមបន្តទៀតថា សម្រាប់ភ្ញៀវទេសចរបរទេសម្នាក់ដែលធ្វើដំណើរកម្សាន្ដមកកម្ពុជាម្ដង អាចចំណាយជាមធ្យមប្រមាណ ៧០០ដុល្លារ។ យ៉ាងណាក៏ដោយ ឯកឧត្តមបានគូសបញ្ជាក់ថា ដើម្បីអាចទាក់ទាញភ្ញៀវទេសចរអន្តរជាតិឲ្យចូលមកទស្សនាកម្ពុជាបាន ចាំបាច់ត្រូវមានការត្រៀមខ្លួន និងយុទ្ធសាស្ត្រឲ្យបានត្រឹមត្រូវ ហើយបច្ចុប្បន្ន កម្ពុជាកំពុងតែស្ថិតក្នុងដំណើរឆ្ពោះទៅរកភាពជោគជ័យដ៏ត្រឹមត្រូវ។
គួរបញ្ជាក់ថា ក្នុងរយៈពេល៨ខែឆ្នាំនេះ កម្ពុជាទទួលបានភ្ញៀវទេសចរបរទេសប្រមាណជាង ៣លាន ៥សែននាក់ កើនឡើងជិត ១២% ធៀបនឹងគ្រាដូចគ្នាកាលពីឆ្នាំ២០១៦ ក្នុងនោះ ភ្ញៀវទេសចរណ៍ចិនមានប្រមាណជាង ៧៤ម៉ឺននាក់ មានកំណើនជាង ៤៤% និងរំពឹងថា ទេសចរចិននឹងកើនឡើងដល់ ១លាននាក់នៅឆ្នាំនេះ និងលើស២លាននាក់នៅឆ្នាំ២០២០។ ហើយបើគិតពេញ១ ឆ្នាំ២០១៦ កម្ពុជាទទួលបានភ្ញៀវទេសចរបរទេសប្រមាណជាង ៥លាននាក់ កើនឡើង ៥% និងបានផ្ដល់ប្រាក់ចំណូលប្រមាណ ៣ពាន់ ៤រយលានដុល្លារ ស្មើនឹង ១៣% នៃផលិតផលក្នុងស្រុកសរុប ជាមួយនឹងការផ្ដល់ការងារក្នុងវិស័យនេះសម្រាប់ប្រជាជនប្រមាណ ៦២ម៉ឺននាក់៕
