ក្រុមហ៊ុនឈីបយក្សតៃវ៉ាន់ TSMC គ្រោងពង្រីករោងចក្រនៅជប៉ុន និងអឺរ៉ុប ទោះជាតម្រូវការឈីបសាកលធ្លាក់ចុះ
ក្រុមហ៊ុនឈីបធំបំផុតក្នុងពិភពលោករបស់តៃវ៉ាន់ TSMC បានប្រកាសឱ្យដឹងថ្មីៗនេះថា ខ្លួនកំពុងពិចារណាសង់រោងចក្រទី២ នៅក្នុងប្រទេសជប៉ុន ហើយក៏កំពុ…
គិតតាំងពីចាប់ផ្ដើមដំណើរការសកម្មភាពសង្គម និងមនុស្សធម៌របស់ខ្លួន តាំងពីឆ្នាំ២០១៨មក អង្គការមូលនិធិអេស៊ីលីដា-ចារឌីនសម្រាប់ការអប់រំ បានចំណាយថវិកាអស់ប្រមាណ ៥៧ម៉ឺនដុល្លារហើយ សម្រាប់ការសាងសង់អគារសិក្សាបានចំនួន ៨ខ្នង នៅតាមតំបន់ដាច់ស្រយាល នៅក្នុងខេត្តចំនួន ៥ រួមមាន មណ្ឌលគិរី រតនគិរី ឧត្តរមានជ័យ ព្រះវិហារ និងស្ទឹងត្រែង។ បច្ចុប្បន្ន អគារសិក្សាចំនួន ៨ខ្នង ដែលបានសាងសង់រួចរាល់ និងបានប្រគល់ជូនសហគមន៍ប្រើប្រាស់ កំពុងមានសិស្សានុសិស្សសិក្សាសរុបជាង១ពាន់នាក់។
ថ្លែងក្នុងពិធីសម្ពោធ និងដាក់ឲ្យដំណើរការ អគារសិក្សាបឋមសិក្សាកាំងចាមនាពេលថ្មីៗនេះ បណ្ឌិត ព្រំ វិសុទ្ធ ប្រធានមូលនិធិអេស៊ីលីដា-ចារឌីនសម្រាប់ការអប់រំ បានលើកឡើងថា អង្គការមូលនិធិអេស៊ីលីដា-ចារឌីន ត្រូវបានបង្កើតឡើងក្នុងគោលបំណង ជួយឧបត្ថម្ភដល់កុមារដែលនៅតាមទីជនបទ ឬតាមតំបន់ដាច់ស្រយាល និងតំបន់ដែលមានសភាពក្រលំបាក និងមិនមានលទ្ធភាពទទួលបានការអប់រំថ្នាក់បឋមសិក្សា និងអនុវិទ្យាល័យ អាចទទួលបានការអប់រំ និងបន្តការសិក្សាបាន ។ លើសពីនេះ លើកស្ទួយវិស័យអប់រំក្នុងមូលដ្ឋាននៅតាមទីជនបទ ឬតាមតំបន់ដាច់ស្រយាល និងតំបន់ដែលមានសភាពក្រលំបាកនៅកម្ពុជា តាមរយៈការកសាងអគារសិក្សា ផ្តល់ឱ្យមានគ្រូបង្រៀន សម្ភារៈ និងហេដ្ឋារចនាសម្ព័ន្ធអប់រំសមរម្យ។
លោកព្រំ វិសុទ្ធ បន្ថែមថា នៅឆ្នាំ២០២៣ អង្គការសប្បុរសធម៌មួយនេះ ក៏កំពុងដេញថ្លៃសាងសង់អគារបឋមសិក្សាចំនួន៣ខ្នងបន្ថែមទៀត ដោយមួយខ្នងនៅខេត្តព្រះវិហារ និង២ខ្នងនៅខេត្តឧត្តរមានជ័យ។
ថ្លែងនៅក្នុងពិធីសម្ពោធ និងដាក់ឲ្យប្រើប្រាស់ជាផ្លូវការនូវអគារសិក្សាថ្មី នៃសាលាបឋមសិក្សាកាំងចាម ឃុំកាំងចាម ស្រុកថាឡាបរិវ៉ាត់ ខេត្តស្ទឹងត្រែង ឯកឧត្តម យឹម ផែន អភិបាលរងខេត្តស្ទឹងត្រែងបានគូសបញ្ជាក់ថា អគារសិក្សាប្រកបដោយគុណភាព ផាសុកភាព និងស្រស់ស្អាតនេះ ពិតជាមានតម្លៃបំផុត សម្រាប់ ក្មួយៗសិស្សានុសិស្សក្នុងស្រុកថាឡាបរិវ៉ាត់ ធ្វើជាទីកន្លែង និងថ្នាលសម្រាប់ក្រេបយក និងបណ្តុះចំណេះវិជ្ជាកម្រិតមូលដ្ឋាន ដើម្បីអភិវឌ្ឍអនាគតដ៏ប្រសើររបស់ខ្លួន ។ ឯកឧត្តមបន្ថែមថា សកម្មភាពមនុស្សធម៌ របស់អង្គការមូលនិធិអេស៊ីលីដា-ចារឌីនសម្រាប់ការអប់រំ ពិតជាបានបញ្ជាក់ពីការចូលរួមចំណែកយ៉ាងសកម្មរបស់អង្គការនេះ ក្នុងកិច្ចការងារសង្គម មនុស្សធម៌ និងអភិឌ្ឍន៍ធនធានមនុស្ស ដែលជាទ្រព្យដ៏មានតម្លៃបំផុតក្នុងការអភិឌ្ឍសង្គមជាតិ ស្របតាមយុទ្ធសាស្រ្តចតុកោណតំណាក់កាលទី៤របស់រាជរដ្ឋាភិបាលកម្ពុជា ជាពិសេសកម្មវិធីកំណែទម្រង់គុណភាពវិស័យអប់រំរបស់ក្រសួងអប់រំ យុវជន និងកីឡា ដែលកំពុងត្រូវបានយកចិត្តទុកដាក់យ៉ាងខ្លាំងពីក្រសួង ក៏ដូចប្រមុខរាជរដ្ឋាភិបាលកម្ពុជានាពេលបច្ចុប្បន្ននេះ ។
លោក PETER BEYNON តំណាងស្ថាបនិកនៃអង្គការមូលនិធិអេស៊ីលីដា-ចារឌីនសម្រាប់ការអប់រំ លើកឡើងដែរថា អង្គការមូលនិធិអេស៊ីលីដា-ចារឌីនសម្រាប់ការអប់រំ នឹងបន្តសាងសង់អគារសិក្សាចំនួន ០២ ឬ ០៣ ខ្នង ក្នុងមួយឆ្នាំ នៅក្នុងភូមិសាស្រ្តគោលដៅរបស់ខ្លួន ។ លោក PETER ជឿជាក់ថា ការផ្តល់ការអប់រំកម្រិតមូលដ្ឋាននេះ នឹងជួយកសាងនិងលើកកម្ពស់គុណភាពជីវិតរបស់កុមារទាំងអស់ ព្រមទាំងចូលរួមអភិវឌ្ឍគ្រឹះធនធានមនុស្ស ដើម្បីធ្វើឲ្យប្រសើឡើងនូវជីវភាពរស់នៅរបស់ពួកគេខ្លួនឯង គ្រួសាររបស់ពួកគេ និងសហគមន៍របស់ពួកគេ ។
អង្គការមូលនិធិអេស៊ីលីដា-ចារឌីនសម្រាប់ការអប់រំជាអង្គការក្រៅរដ្ឋាភិបាលក្នុងស្រុកមួយ ដែលបានបង្កើតឡើងដោយធនាគារ អេស៊ីលីដា ភីអិលស៊ី និងក្រុមហ៊ុន ចារឌីន ម៉េថឹសិន ដែលបានចុះបញ្ជីនៅក្រសួងមហាផ្ទៃនៅថ្ងៃទី០៤ ខែឧសភា ឆ្នាំ២០១៧ និងបានចុះបញ្ជីជាបរធនបាលកិច្ចសង្គមនៅនិយ័តករបរធនបាលកិច្ចកម្ពុជា នៅថ្ងៃទី០៦ ខែមករា ឆ្នាំ២០២៣ ។
ចាប់តាំងពីចាប់ដំណើរការសកម្មភាពមនុស្សធម៌របស់ខ្លួនមក អង្គការអង្គការមូលនិធិអេស៊ីលីដា-ចារឌីនសម្រាប់ការអប់រំ ទទួលបានចំណូលពីការប្រាក់ចំនួន ២១០.២៧១ ដុល្លារសហរដ្ឋអាមេរិក និងចំណូលពីសប្បុរសជនចំនួន ៣២៤.២៣៥ ដុល្លារ និងចំណាយសាងសង់សាលា និងចំណាយផ្សេងៗអស់ចំនួន ៥៨០.២៧៣ ដុល្លារសហរដ្ឋអាមេរិក ។ បច្ចុប្បន្ន អង្គការនេះ មានមូលនិធិនៅក្នុងធនាគារចំនួន ៩៤៥.៩៥០ ដុល្លារសហរដ្ឋអាមេរិក ៕
