ធនាគារអភិវឌ្ឍន៍អាស៊ី នាពេលថ្មីៗនេះ បានព្យាករសេដ្ឋកិច្ចវៀតណាម ថា នឹងនៅរក្សាបានកំណើនត្រឹមតែ ៤,៨% ប៉ុណ្ណោះ ខណៈដែលកាលពី២ឆ្នាំចុងក្រោយមកនេះ សេដ្ឋកិច្ចវៀតណាមមានកំណើន ៧%។ សម្រាប់ក្នុងត្រីមាសទី១ នៅឆ្នាំនេះ សេដ្ឋកិច្ចវៀតណាម ត្រូវបានប៉ាន់ថា មានការថយចុះវិស័យជាច្រើន ដូចជា កម្មន្ដសាល លក់រាយ និងការនាំចេញនាំចូលជាដើម។
វៀតណាមមានអតិផរណាជាមធ្យម នៅក្នុងត្រីមាសទី១នេះ កើនឡើងខ្ពស់ជាង ៤ឆ្នាំកន្លងមក ដែលមាន៥,៦% ហើយអាចនឹងមានដល់ ៣,៣% សម្រាប់រយៈពេលពេញមួយឆ្នាំ២០២០នេះ ប៉ុន្ដែ បើសិនជាតម្លៃសាច់ជ្រូកកើនឡើងទៀតនោះ សម្ពាធអតិផរណាក៏អាចនឹងកើនឡើងថែមទៀតផងដែរ។ នេះបើតាមរបាយការណ៍របស់ ADB។
អត្ថបទទាក់ទង!
ទោះយ៉ាងណា ធនាគារ ADB បានអះអាងថា ដ្បិតតែកំណើនសេដ្ឋកិច្ចវៀតណាមឆ្នាំនេះ អាចនឹងមានទាបជាងមុនក៏ដោយ ប៉ុន្ដែវាត្រូវបានគេរំពឹងថា នឹងនៅតែខ្ពស់ជាងកំណើនសេដ្ឋកិច្ចនៃប្រទេសឯទៀតនៅតំបន់អាស៊ី ដែលប្រទេសទាំងនោះមានកំណើនជាមធ្យមត្រឹមតែ ២,២%ប៉ុណ្ណោះ។ តួយ៉ាងសេដ្ឋកិច្ច ចិន ត្រូវបាន ADB ព្យាករថា នឹងមានកំណើនតែ ២,៣% នៅឆ្នាំនេះ ខណៈដែលឥណ្ឌានឹងមាន ៤% និងសិង្ហបុរីមាន ០,២%។ ដោយឡែក សម្រាប់កម្ពុជាយើងវិញ ADB ព្យាករថា នៅឆ្នាំនេះ នឹងរក្សាបានកំណើន ២,៣% ម៉ាឡេស៊ីអាចនឹងមាន ០,៥% ខណៈដែលថៃវិញ គឺមានដាំក្បាលចុះខ្លាំងមាន ដក (-) ៤,៨% ។
ប៉ុន្ដែ ប្រសិនបើបញ្ហាមេរោគ Covid-19 ត្រូវបានគ្រប់គ្រងបាន នៅក្នុងពាក់កណ្ដាលឆ្នាំដំបូងនៃឆ្នាំនេះ កំណើនសេដ្ឋកិច្ចវៀតណាម អាចនឹងកើនឡើងវិញដល់ ៦,៨% នៅឆ្នាំ២០២១។ នេះបើតាមរបាយការណ៍របស់ ADB។
ដោយឡែក សម្រាប់ធនាគារពិភពលោក នាពេលថ្មីៗនេះដែរ ក៏បានព្យាករកំណើនសេដ្ឋកិច្ចវៀតណាមដែរថា នឹងមាន ៤,៩% ខណៈដែលស្ថាប័នស្រាវជ្រាវទីផ្សារ Fitch Solutions ព្យាករថា នឹងមាន ២,៨%។
នៅក្នុងត្រីមាសទី១នេះ កំណើនសេដ្ឋកិច្ចវៀតណាមមានត្រឹមតែ ៣,៨% ប៉ុណ្ណោះ ដែលវាជាកំណើនមួយទាបបំផុតក្នុងរយៈពេល មួយទសវត្សរ៍ចុងក្រោយនេះ ស្របពេលដែលប្រទេសនេះ បានដាក់ចេញវិធានការណ៍ជាច្រើនក្នុងការប្រយុទ្ធប្រឆាំង Covid-19 ដូចជាការលុបចោលជើងហោះហើរ, តម្រូវឲ្យអាជីវកម្មមិនសូវសំខាន់មួយចំនួនបិទទ្វារ និងបិទទីកន្លែងទេសចរជនបរទេសជាដើម៕
None
