ក្រុមប្រទេសរីកចម្រើនខ្លាំងទាំង ២០ G20 បានត្រឹមតែប្រកាសសន្យា តែគ្មានភាពតាំងចិត្តច្បាស់លាស់ គោរពធ្វើទៅតាមការសន្យា ក្នុងកិច្ចព្រមព្រៀងទីក្រុងប៉ារីស ស្តីពីអាកាសធាតុនោះទេ ហើយក៏ពុំមានដាក់ចេញវិធានការណ៍ណាមួយជាក់ស្តែងទាល់តែសោះ។ នេះបើតាមការចុះផ្សាយដោយសារព័ត៌មានអន្តរជាតិធំៗជាច្រើន។
សន្និសីទអង្គការសហប្រជាជាតិស្តីពីអាកាសធាតុ នៅឆ្នាំនេះកំពុងធ្វើឲ្យគេមានសង្ឃឹមកាន់តែតិចតួចទៅៗ ថាការដោះស្រាយវិបត្តិអាកាសធាតុអាចនឹងមានភាពល្អប្រសើរ ជាពិសេសការកាត់បន្ថយកំដៅផែនដីតែម្ដង។ នេះក៏ដោយសារតែ លទ្ធផល ជំនួបកំពូលនៃក្រុមប្រទេស G20 នៅទីក្រុងរ៉ូម មិនបានបង្ហាញពីលទ្ធផលផ្លែផ្កាច្រើននោះដែរ។
ក្រុមប្រទេស G20 បានត្រឹមតែប្រកាសសន្យា តែគ្មានភាពច្បាស់លាស់ ថា នឹងប្រឹងប្រែងគោរពតាមការសន្យា ក្នុងកិច្ចព្រមព្រៀងទីក្រុងប៉ារីស ស្តីពីអាកាសធាតុនោះទេ ហើយក៏ពុំមានដាក់ចេញវិធានការណ៍ណាមួយជាក់ស្តែងទាល់តែសោះ។
តួយ៉ាង ទាក់ទងរឿងធ្យូងថ្ម ដែលជាប្រភពបញ្ចេញឧស្ម័នកាបូនិកខ្លាំងបំផុត ក្រុមប្រទេសG20 បានត្រឹមតែសន្យាថា នឹងឈប់ចំណាយប្រាក់សាងសង់រោងចក្រអគ្គិសនីដើរដោយធ្យូងថ្ម នៅតាមប្រទេសដ៏ទៃ ខណៈពួគគេមិនបាននិយាយពីរោងចក្រនៅក្នុងប្រទេសរបស់ខ្លួនឡើយ។ ប្រការនេះបានសេចក្តីថា ឧស្ម័នពុលដែលភាយចេញពីរោងចក្រផលិតអគ្គិសនីដើរដោយធ្យូងថ្ម នៅតែបន្តមាន។
ភាពអវិជ្ជមានមួយផ្សេងទៀតគឺ ប្រទេសអ្នកបញ្ចេញឧស្ម័នកាបូនិកធំៗ និងច្រើនជាងគេ ដូចជាចិន និងសហរដ្ឋអាមេរិកជាដើម មិនបានបង្ហាញផែនការថ្មីណាមួយនោះទេ ក្នុងកិច្ចខិតខំប្រឹងប្រែងទប់ស្កាត់វិបត្តិអាកាសធាតុពិភពលោកនេះ ដោយគេគ្រាន់តែបានសម្អាងថា គេនឹងចាប់ផ្តើមបញ្ចេញសកម្មភាពពីពេលនេះតទៅ។អត្ថបទគួរអាន
ជាក់ស្តែង ប្រធានាធិបតីចិន លោកស៊ី ជីនពីង ដែលមិនបានទៅចូលរួមប្រជុំផ្ទាល់ បានគូសបញ្ជាក់ស្រដៀងគ្នានឹងប្រធានាធិបតីអាមេរិក ចូ បៃឌិន ដែលមានវត្តមានក្នុងកិច្ចប្រជុំថា៖ «កុំបានតែសន្យា ដល់ពេលដែលយើងត្រូវបញ្ចេញសកម្មភាពពិតប្រាកដហើយ»។
ប្រទេសធំៗទាំងអស់នៃសន្និសីទអង្គការសហប្រជាជាតិស្តីពីអាកាសធាតុ ហាក់មិនមានការស្រុះស្រួលគ្នា ក្នុងការដោះស្រាយវិបត្តិអាកាសធាតុទាល់តែសោះ ដោយសង្កេតឃើញថា ប្រទេសមួយចាំមើលបំណាំប្រទេសមួយទៀត និងបានរុញដាក់គ្នាទៅវិញទៅមក ឲ្យបញ្ចេញសកម្មភាព។ បើប្រទេសមួយមិនធ្វើ ប្រទេសមួយទៀតក៏មិនធ្វើដូចគ្នា។ ប្រការនេះហើយ ទើបបានជាមកទល់នឹងពេលនេះ វិបត្តិអាកាសធាតុ មិនត្រូវបានដោះស្រាយជាដុំកំភួនអ្វីសោះ ខណៈផែនដីនៅបន្តឡើងកំដៅដដែល។
សូមបញ្ជាក់ថា របាយការណ៍ពីក្រុមអ្នកជំនាញឧតុនិយមរបស់អង្គការសហប្រជាជាតិ បានឲ្យដឹងថា តួលេខក្នុងពេលបច្ចុប្បន្ន ផែនដីរបស់យើងនឹងឡើងកំដៅប្រមាណ ២,៧អង្សាសេ ទៀតពីពេលនេះ ដល់ឆ្នាំ២០៥០ ដែលជាកំណើនសីតុណ្ហភាពមធ្យមខ្ពស់បំផុតមួយរបស់ផែនដី៕None
