កាលពីថ្ងៃទី១៨ ខែមីនា ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានសរសេរលិខិតមួយច្បាប់ ជូនទៅកាន់សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា ដើម្បីសុំគោលការណ៍ក្នុងការកាត់បន្ថយការនាំចូលត្រីពីក្រៅប្រទេស។ ការស្នើនេះ ធ្វើឡើងក្នុងគោលបំណងដើម្បីជំរុញការប្រើប្រាស់ផលិតផលត្រីនៅកម្ពុជា ដែលកំពុងជួបបញ្ហាខ្វះទីផ្សារ។ នេះបើយោងតាមលិខិតមួយរបស់ក្រសួងកសិកម្ម។
តាមរយៈលិខិតដដែលនេះ រដ្ឋមន្ត្រីក្រសួងកសិកម្ម បានលើកឡើងថា៖«ដើម្បីជួយដោះស្រាយបញ្ហាដែលបាននិងកំពុងកើតមានចំពោះវារីវប្បករក្នុងស្រុក ក្រសួងកសិកម្ម រុក្ខាប្រមាញ់ និងនេសាទ សូមគោរពស្នើសុំសម្តេចតេជោ សុំដាក់លក្ខខណ្ឌដល់អាជីវករ ដែលមានបំណងនាំចូលផល ផលិតផលជលផល ត្រូវចូលរួមប្រមូលទិញផលវារីវប្បកម្ម ដែលកំពុងផលិតបាន និងជន់ជោរនៅលើទីផ្សារក្នុងស្រុកពីវារីវប្បករចំនួន៥០%និងអនុញ្ញាតឲ្យនាំចូលចំនួន៥០%»។
អត្ថបទទាក់ទង!
ឯកឧត្តម វេង សាខុន កត់សម្គាល់ឃើញថា ក្រោយក្រសួងកសិកម្មដាក់ចេញនូវយុទ្ធសាស្ត្រក្នុងការជំរុញវិស័យវារីវប្បកម្មប្រកបដោយប្រសិទ្ធិភាពកាលពីអំឡុងខែកក្កដា ឆ្នាំ២០២០ ការចិញ្ចឹមត្រីនៅកម្ពុជាមានការផុសផុលជាខ្លាំង និងជំរុញឲ្យផលវារីវប្បកម្មនៅឆ្នាំនេះ មានការកើនឡើងប្រមាណ៣០% បើធៀបនឹងឆ្នាំកន្លងទៅ ដែលជួយឲ្យផលិតផលត្រីកម្ពុជាអាចផ្គត់ផ្គង់ទីផ្សារបានមួយកម្រិតទៀត។
ឯកឧត្តមបានបន្ថែមថា៖«ផលត្រីស្តុកក្នុងស្រុករបស់វារីវប្បករក៏មានការជន់ជោរ ជួបបញ្ហាទីផ្សារ ក៏ដូចជាពិបាកប្រកួតប្រជែងជាមួយផលិតផលជលផលនាំចូល ដោយសារថ្លៃដើមផលិត ពិសេសថ្លៃផលិតចំណីត្រី បានធ្វើឲ្យវារីវប្បករជួបការលំបាកក្នុងការបង្កើនការវិនិយោគលើផ្នែកវារីវប្បកម្ម»។ យ៉ាងណាក៏ដោយចុះ ការស្នើសុំនេះ មិនទាន់មានការឆ្លើយតបពី សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅឡើយទេរហូតមកពេលនេះ។
បើតាមរបាយការណ៍របស់សមាគមវារីវប្បកម្មកម្ពុជាកាលពីដើមខែមីនានេះបានឲ្យដឹងថា កម្ពុជាមានទិន្នផលត្រីដែលល្មមចាប់ជាង៩ពាន់តោន។ ក្នុងនោះ ភាគច្រើនជាត្រីប្រា ត្រីពោរ, ត្រីឆ្តោ និងត្រីអណ្តែងជាដើម៕
None
