បច្ចុប្បន្នកម្ពុជា នៅតែពឹងផ្អែកវៀតណាមខ្លាំង សម្រាប់ការនាំចេញផលិតផលម្រេច និងផលិតកម្មកសិកម្មដទៃទៀត។ ទាក់ទិនបញ្ហានេះ ប្រធានសហព័ន្ធម្រេច និងគ្រឿងទេសកម្ពុជា លោក ម៉ាក់ នី យល់ថា កម្ពុជា គួរតែពង្រីកទីផ្សារកសិកម្មបន្ថែម មិនត្រូវពឹងផ្អែកតែលើទីផ្សារវៀតណាមនោះទេ។
បើតាមលោក ម៉ាក់ នី បានបញ្ជាក់ប្រាប់សារព័ត៌មានខេមបូណូមីស ថា ផ្លេតហ្វម ដែលខាងសហព័ន្ធម្រេច និងគ្រឿងទេសកម្ពុជា បានធ្វើសម្រាប់ជំរុញការនាំចេញម្រេច និងកសិផលខ្មែរដទៃទៀតនោះ គឺជាលក្ខណៈអនឡាញ ដោយផ្ដោតសំខាន់លើទីផ្សារប្រទេសមជ្ឈឹមបូព៌ា និងអាហ្វ្រិកខាងជើង។ លោក ម៉ាក់ នី បន្ថែមថា ការដាក់លក់ផលិតផលកសិកម្មនៅតាមអនឡាញនេះ នឹងជួយបើកឱកាសទីផ្សារផលិតផលកសិកម្មកម្ពុជា ព្រោះមជ្ឈឹមបូព៌ា និងអាហ្វ្រិកខាងជើង ជាប្រទេសដែលមានតម្រូវការច្រើន។
អត្ថបទទាក់ទង
យ៉ាងណាក៏ដោយ ប្រធានសហព័ន្ធម្រេច និងគ្រឿងទេសកម្ពុជា រូបនេះ បញ្ជាក់ថា ដំណើរការនេះ ទើបតែចាប់ផ្ដើមក៏ពិតមែន តែលោកមានក្ដីរំពឹងខ្ពស់ ក្នុងការលើកកម្ពស់ផលិតផលកសិកម្មខ្មែរ។ លោក ម៉ាក់ នី បញ្ជាក់ថា ផលិតផលកសិកម្ម ដែលសហព័ន្ធគ្រោងដាក់លក់លើអនឡាញ មានផលិតកម្មកសិកម្មសរីរាង្គ និងសុវត្ថិភាព ជាច្រើនមុខ មិនមែនមានតែផលិតផលម្រេច នោះទេ។ ដោយឡែក ចំពោះផលិតផលម្រេច ដែលគ្រោងនឹងដាក់លក់សម្រាប់នាំចេញទៅមជ្ឈឹមបូព៌ា និងអាហ្វ្រិកខាងជើង គឺជាផលិតផលម្រេចទូទៅ មិនមែនសំដៅតែលើម្រេចប្រភេទ GI នោះឡើយ។
បើតាមលោក សហព័ន្ធម្រេច និងគ្រឿងទេសកម្ពុជា វិបត្តិកូវីដ-១៩ បានធ្វើឱ្យតម្លៃម្រេច ធ្លាក់ចុះមួយរយៈមែន ប៉ុន្ដែរហូតបច្ចុប្បន្ននេះ តម្លៃម្រេចហាក់ប្រសើរឡើងវិញហើយ។ ម្រេចឆ្នាំនេះ មានតម្លៃរហូត ១ម៉ឺន៥ពាន់រៀល ក្នុងមួយគីឡូក្រាម ខណៈឆ្នាំមុន ម្រេចមានតម្លៃត្រឹមតែ ១ម៉ឺនរៀល ក្នុងមួយគីឡូក្រាម ប៉ុណ្ណោះ។
យោងតាមរបាយការណ៍នាំចេញផលិតផលកសិកម្មរបស់ក្រសួងកសិកម្ម រុក្ខាប្រមាញ់ និងនេសាទ នៅត្រីមាសទី១ ឆ្នាំ២០២១ កម្ពុជា បាននាំចេញម្រេច សរុបជាង ១ម៉ឺន៤ពាន់តោន ទៅកាន់ទីផ្សារអន្តរជាតិ។ ក្នុងនោះ ប្រទេសវៀតណាម ជាទីផ្សារធំជាងគេ គឺមានជាង៩០%ទៅហើយ៕
អត្ថបទ៖ ខន ណារី
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
