បន្ទាប់ពីបានកាន់តំណែងជាងមួយឆ្នាំមកនេះ រដ្ឋការរបស់លោក ចូ បៃដិន ប្រធានាធិបតីអាមេរិកបានរងការរិះគន់ពីគណបក្សសាធារណរដ្ឋ និងអ្នកផ្សេងទៀតចំពោះការខ្វះយុទ្ធសាស្ត្រផ្លូវការសម្រាប់ការដោះស្រាយ និងទប់ទល់ជាមួយប្រទេសចិន ដែលជាមហាអំណាចសេដ្ឋកិច្ចទីពីររបស់ពិភពលោក និងជាគូប្រជែងយុទ្ធសាស្ត្រដ៏សំខាន់របស់ទីក្រុងវ៉ាស៊ីនតោនទាំងផ្នែកនយោបាយការទូត និងសេដ្ឋកិច្ចពាណិជ្ជកម្មផងដែរ។
ប៉ុន្តែពេលនេះលោក ប្លីងខិន បាននិយាយកាលពីថ្ងៃទី ២៦ មេសាថា លោកនឹងប្រកាសលម្អិតនៅក្នុងពេលប៉ុន្មានសប្តាហ៍ខាងមុខទៀតនេះ អំពីយុទ្ធសាស្ត្រសន្តិសុខជាតិអាមេរិក ដែលគេទន្ទឹងរង់ចាំជាយូរមកហើយនោះ ដើម្បីដោះស្រាយទប់ទល់ជាមួយការរះត្រដែតឡើងនៃឥទ្ធិពលរបស់ប្រទេសចិន។
លោក ប្លីងខិន បាននិយាយនៅក្នុងសវនាការរបស់គណៈកម្មាធិការទំនាក់ទំនងបរទេសនៅព្រឹទ្ធសភាអាមេរិកថា លោកនឹងឆ្លៀតឱកាសណាមួយ ដែលលោកគិតថាអាច នៅក្នុងពេលប៉ុន្មានសប្តាហ៍ខាងមុខឆាប់ៗនេះ ដើម្បីនិយាយជាសាធារណៈ និងលម្អិតមួយចំនួនអំពីយុទ្ធសាស្ត្រសន្ដិសុខជាតិរបស់អាមេរិកនេះ។
រដ្ឋការលោកចូ បៃឌិន ធ្លាប់បានប្រកាសពីយុទ្ធសាស្ត្រសម្រាប់តំបន់ឥណ្ឌូ-ប៉ាស៊ីហ្វិកនៅក្នុងខែកុម្ភៈ ដែលខ្លួនបានប្តេជ្ញាថា នឹងផ្តល់ធនធានការទូត និងសន្តិសុខបន្ថែមទៀតទៅកាន់ឥណ្ឌូ-ប៉ាស៊ីហ្វិក នេះ ដើម្បីទប់ទល់នឹងអ្វីដែលខ្លួនមើលឃើញថា ជាការប្រឹងប្រែងរបស់ចិនក្នុងការបង្កើតឥទ្ធិពលនៅក្នុងតំបន់។
រដ្ឋការរបស់លោកចូ បៃដិន បាននិយាយថា ខ្លួនកំពុងធ្វើការលើយុទ្ធសាស្ត្រដាច់ដោយឡែកមួយទៀត សម្រាប់ប្រទេសចិន ប៉ុន្តែបានប្រឈមនឹងបញ្ហារំខានសំខាន់ៗមួយចំនួន ដោយសារតែការលុកលុយរបស់រុស្ស៊ីលើប្រទេសអ៊ុយក្រែន។
អត្ថបទ៖ សុខ ជា
អត្ថបទគួរអាន
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
