រដ្ឋាភិបាលម៉ាឡេស៊ីបានអះអាងនៅក្នុងសារព័ត៌មានជប៉ុន Nikkei ថា បច្ចុប្បន្ននិយ័តករប្រចាំម៉ាឡេស៊ីបានយល់ព្រមលើសំណើររបស់ AirAsia ដើម្បីទិញយកអាជីវកម្មរបស់ក្រុមហ៊ុន Gojekហើយ ប៉ុន្តែគេមិនទាន់ដឹងទេថា ការព្រមព្រៀងគ្នាចុងក្រោយនឹងប្រកាសនាពេលណា ឬមួយអាចកើតឡើងក្នុងពេលឆាប់ៗនេះក៏មិនដឹង ដោយក្រុមហ៊ុនគ្រាន់តែបានបង្ហើបថា ក្រុមហ៊ុនទាំងពីរកំពុងចរចាបញ្ចប់លើកិច្ចព្រមព្រៀង និងលក្ខខណ្ឌផ្សេងៗ។
យ៉ាងណាមិញ បើតាមប្រភពជិតស្និទ្ធនឹងការចរចារវាងក្រុមហ៊ុនទាំងពីរបានឲ្យដឹងថាក្រុមហ៊ុន Gojek នឹងកាន់កាប់ភាគហ៊ុនមួយចំនួនក្នុងអាជីវកម្មរបស់ AirAsia ជាថ្នូរនឹងអាជីវកម្មរបស់ Gojek ដែលកំពុងប្រតិបត្តិការយ៉ាងរលូនក្នុងប្រទេសថៃ។
ទោះយ៉ាងណា នៅមិនទាន់មានការបង្ហើបឲ្យដឹងនៅឡើយទេថា តើតម្លៃនៃការទិញលក់អាជីវកម្មនេះ នឹងមានក្នុងទំហំទឹកប្រាក់ប៉ុន្មាន0x017d7 ហើយជាថ្នូរការលក់នេះ តើក្រុមហ៊ុន Gojek នឹងទទួលបានការកាន់ភាគហ៊ុនចំនួនប៉ុន្មាននៅក្នុងក្រុមហ៊ុន AirAsia ក៏នៅមិនទាន់ដឹងដូចគ្នាដែរ។
អត្ថបទគួរអាន
គួរបញ្ជាក់ថា ក្រុមហ៊ុនអាកាសចរណ៍ AirAsia មិនត្រឹមតែរកស៊ីក្នុងវិស័យដឹកជញ្ជូនផ្លូវអាកាសនោះទេ ប៉ុន្តែ ក្រុមហ៊ុនរបស់បុរសដែលពូកែខាងធ្វើជំនួញលោក តូនី ហ្វឺណាន់ដេស (Tony Fernandes) រូបនេះ ក៏មានមហិច្ឆតាចង់បង្កើតកម្មវិធីទូរស័ព្ទពហុមុខងារ ដែលស្រដៀងនឹង កម្មវិធី Gojek ឬ កម្មវិធី Grab ជាដើម ក្នុងគោលដៅដើម្បីប្រកួតប្រជែងក្នុងទីផ្សារអាជីវកម្មឌីជីថលក្នុងតំបន់។
សូមបញ្ជាក់ថា ក្រុមហ៊ុន Gojek គឺជាក្រុមហ៊ុនផ្តល់សេវាកម្មពហុតំរូវការ ដូចជាការបង់ប្រាក់តាមប្រព័ន្ធឌីជីថល ការទិញទំនិញអនឡាញ និងដឹកជញ្ជូនទំនិញជាដើម។ ក្រុមហ៊ុននេះ មានមូលដ្ឋាននៅក្រុងហ្សាកាតា ប្រទេសឥណ្ឌូនេស៊ី ហើយត្រូវបានបង្កើតឡើងនៅឆ្នាំ២០១០។ Gojek ចូលមកកាន់ទីផ្សាររបស់ថៃដំបូងនៅឆ្នាំ ២០១៩ ដែលបច្ចុប្បន្នក្រុមហ៊ុនមួយនេះក៏បានដើរតួនាទីសំខាន់ក្នុងការដឹកជញ្ជូនម្ហូបអាហារសម្រាប់ពលរដ្ឋថៃអំឡុងពេលកូវីដ-១៩ ក្រោមកម្មវិធីទូរស័ព្ទឈ្មោះថា GoFood ហើយអាជីវកម្មដឹកជញ្ជូនអាហាររបស់ក្រុមហ៊ុននេះ មានចំណែក៧% ក្នុងទីផ្សារដឹកជញ្ជូនម្ហូបអាហារក្នុងប្រទេសថៃ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
