ក្រុមហ៊ុនលក់​យន្ដហោះ Airbus សម្លឹងឃើញឱកាស​ទីផ្សារនៅកម្ពុជា

លោក ខនន័រ ប៊ូអត អ្នកវិភាគ​ជាន់ខ្ពស់​ទីផ្សារផលិតផល​កិច្ចការអតិថិជន របស់​ក្រុមហ៊ុន​ផលិតយន្ដហោះ Airbus បាន​លើកឡើង​នាពេល​ថ្មីៗនេះថា ក្រុមហ៊ុន​លោកបាន​ចាប់អារម្មណ៍​ចំពោះ​ទីផ្សារ​លក់យន្ដហោះ​ប្រភេទថ្មី Airbus A220 នៅកម្ពុជា គឺដោយសារតែ មើលឃើញ​ពី​ឱកាសទីផ្សារ នៃ​​វិស័យអាកាសចរណ៍​កម្ពុជា​ កំពុង​មានភាពរីកចម្រើនគួរឲ្យចាប់អារម្មណ៍ ហើយអ្វីដែលពិសេសនោះ គឺ​កម្ពុជា​នៅមានតម្រូវការ​យន្ដហោះ ប្រភេទ​Airbus ខ្នាត​តូច សម្រាប់​ការហោះហើរ ទៅកាន់ទិសដៅ​ផ្សេងៗទាំងទិសដៅជិត និងឆ្ងាយ។ 

លោក ខនន័រ បានគូសបញ្ជាក់ទៀតថា តាមទិន្នន័យដែល​លោកទទួលបាន នៅកម្ពុជា មាន​ក្រុមហ៊ុន​អាកាសចរណ៍​ក្នងស្រុកជាច្រើន បាន​ប្រើប្រាស់​យន្ដហោះ​របស់ក្រុមហ៊ុន​ Airbus ប្រភេទ A320 ចំនួន​២៧ គ្រឿងរួចហើយ ហើយលោកមានក្ដីរំពឹងខ្ពស់​ចំពោះ ការលក់​យន្ដហោះ​ Airbus A220 ដែលជាស៊េរីថ្មី របស់ក្រុមហ៊ុន​នៅក្នុងទីផ្សារកម្ពុជា។ ក្រុមហ៊ុន Airbus បានព្យាករណ៍ថា
នឹងមានការរីក​ចម្រើនខ្ពស់​នៅក្នុងទីផ្សា​រដឹកជញ្ជូន​តាមផ្លូវអាកាស​នៅក្នុងប្រទេសកម្ពុជា ខណៈដែលការ​ដឹកជញ្ជូន​អ្នកដំណើរ​ក៏ត្រូវបានរំពឹងថា មានអត្រា​កំណើន​ច្រើនជាង៧% ក្នុងមួយឆ្នាំសម្រាប់រយៈពេល ២០ ឆ្នាំខាងមុខ។

លោក ខនន័រ បាន​គូសបញ្ជាក់ទៀតថា សម្រាប់យន្ដហោះ Airbus A220 ថ្មីនេះ ផលិតនៅក្នុងប្រទេស​កាណាដា ដែលដាក់លក់​នៅកម្ពុជា ក៏ដូចជា​នៅតំបន់អាស៊ីប៉ាស៊ីហ្វិកផងដែរនោះ មានតម្លៃប្រមាណ​ ៨០ ទៅ ៩០ លាន​ដុល្លារអាមេរិក ក្នុងមួយគ្រៀង ដែលអាយុកាលប្រើប្រាស់​ជាមធ្យម​របស់វា គឺមាន​រយៈពេល ៣០ឆ្នាំ។

បើតាម ក្រុមហ៊ុន​អាកាសយានដ្ឋាន​កម្ពុជា​បាន​ឲ្យដឹងថា កាលពី​ឆ្នាំ២០១៨ ចំនួន​អ្នកធ្វើដំណើរ​ដែលបាន​ធ្វើដំណើរ​ឆ្លងកាត់​អាកាសយានដ្ឋាន​ទាំង៣ របស់កម្ពុជា​មានចំនយន ១០លាន ៥សែននាក់ ដែលបាន​ធ្វើដំណើរ​ក្នុងទិសដៅជាង​៥៥ ទិសដៅផ្សេងៗគ្នា ជាមួយនឹង​ជើងហោះហើរ​ទៀងទាត់ ៧០០ ជើង ក្នុងមួយសប្ដាហ៍៕