ក្រុមហ៊ុនអាលីបាបា បានប្រកាសពីការខាតបង់សុទ្ធរបស់ខ្លួននៅក្នុងត្រីមាសទី១នៅឆ្នាំ២០២១នេះ ប្រមាណជាង៨៣០លានដុល្លារអាមេរិក ខណៈដែលប្រាក់ចំណូលក្រុមហ៊ុននេះ មានជាង២៩ពាន់លានដុល្លារអាមេរិក មានកំណើន៦៤% ដោយបានជំរុញដោយការទិញយកក្រុមហ៊ុនផ្សារទំនើបធំមួយកាលពីឆ្នាំមុន។ បើទោះបីជាប្រាក់ចំណូលកើន តែក្រុមហ៊ុននេះ នៅតែមានការខាតបង់។ ខាងបង់គឺបន្ទាប់ពីក្រុមហ៊ុននេះ ត្រូវសងប្រាក់ពិន័យដល់ទៅជិត៣ពាន់លានដុល្លារទៅឲ្យរដ្ឋចិន ដោយសារតែរដ្ឋចិនបានចោទក្រុមហ៊ុននេះថា បានល្មើសនឹងច្បាប់ប្រឆាំងនឹងការរកស៊ីផ្ដាច់មុខ។
នាយកប្រតិបត្តិក្រុមហ៊ុនអាលីបាបា លោក ដាញែល ហ្សាង បាននិយាយថា នៅក្នុងឆ្នាំសារពើពន្ធកន្លងទោនេះ ក្រុមហ៊ុនអាលីបាបា បានហែលឆ្លងនូវបញ្ហាប្រឈមជាច្រើន រួមទាំងការរាតត្បាតនៃកូវីដ-១៩ ការកើនឡើងខ្លាំងនៃការប្រកួតប្រជែង និងការស៊ើបអង្កេតទាក់ទងនឹងការប្រឆាំងការរកស៊ីផ្ដាច់មុខពីសំណាក់រដ្ឋាភិបាលចិនជាដើម។
អត្ថបទទាក់ទង!
បើតាមលោក ហ្សាង ក្រុមហ៊ុនបានយល់ព្រមបង់ការផាកពិន័យពីសំណាក់រដ្ឋាភិបាលចិននេះ ដោយភាពស្មោះត្រង់បំផុត និងប្ដេជ្ញាចិត្តនឹងមិនឲ្យមានបញ្ហានេះកើនឡើងទៅថ្ងៃមុខទៀតនោះឡើយ។
ក្រោយពីការប្រកាសការខាតបង់នៅត្រីមាសទី១ ភាគហ៊ុនអាលីបាបាក៏បានធ្លាក់ចុះជិត៥% ផងដែរ។
បើទោះបីជានៅត្រីមាសទី១ឆ្នាំនេះ អាលីបាបា មានការខាតបង់ តែក្រុមហ៊ុននេះ នៅតែជឿជាក់ថានៅឆ្នាំក្រោយនេះ ក្រុមហ៊ុននឹងមានប្រាក់ចំណូលខ្ពស់ឡើងវិញ ពិសេសចំណូលពីសេវាផ្ទុកទិន្នន័យ Alibaba Could របស់ខ្លួន។
សូមបញ្ជាក់ថា នៅមួយរយៈកន្លងមកនេះ រដ្ឋាភិបាលចិនបានដាក់ការរឹតត្បិតខ្លាំងមែនទែន ទៅលើក្រុមហ៊ុនបច្ចេកវិទ្យាយក្សៗរបស់ខ្លួន ដោយក្នុងនោះ ក្រុមហ៊ុនអាលីបាបា រួមទាំងលោក Jack Ma ដែលជាម្ចាស់ក្រុមហ៊ុននេះ ក៏កំពុងរងនឹងសម្ពាធកាន់តែខ្លាំងឡើងដែរ៕
None
