លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បានកត់សម្គាល់ឃើញថា ទោះបី ការផ្គត់ផ្គង់ទំនិញរបស់កម្ពុជា ទៅកាន់ទីផ្សារគោលដៅមួយចំនួន ហាក់នៅមានកម្រិតនៅឡើយក៏ដោយ ប៉ុន្ដែកម្ពុជានៅតែមានក្ដីរំពឹងចំពោះទីផ្សារអាម៉េរិក និងសហភាពអឺរ៉ុប ពិសេសផលិតផលសម្លៀកបំពាក់ ស្បែកជើង និងកាបូបធ្វើដំណើរជាដើម។ ជាក់ស្ដែង តួលេខេពីក្រសួងពាណិជ្ជកម្ម នៅឆ្នាំ២០២២ កម្ពុជា បាននាំចេញផលិតផលកាត់ដេរទាំងអស់ ក្នុងទំហំទឹកប្រាក់សរុបជាង ១២ពាន់លានដុល្លារ ទៅកាន់ទីផ្សារអន្តរជាតិ។
ដោយឡែក ចំពោះទីផ្សារអាស៊ានវិញ បើតាមបណ្ឌិត ហុង វណ្ណៈ អះអាងថា ទោះបីនៅក្បែរខាងប្រទេសកម្ពុជា ក៏ពិតមែន តែតម្រូវការពីការតំបន់អាស៊ានលើទំនិញកម្ពុជា នៅមានទំហំតូចនៅឡើយ ដោយតំបន់អាស៊ាន មានតម្រូវការភាគច្រើនជាផលិតផលកសិកម្មមិនទាន់កែច្នៃ។
អត្ថបទគួរអាន
ដ្បិតថា ការនាំចេញរបស់កម្ពុជា ទៅកាន់ទីផ្សារមួយចំនួន ដូចជាទីផ្សារចិន មានការធ្លាក់ចុះក្ដី ប៉ុន្ដែ លោកបណ្ឌិត ហុង វណ្ណៈ យល់ឃើញថា នៅក្នុងឆ្នាំ២០២២ ការធ្វើពាណិជ្ជកម្មរបស់កម្ពុជា ជាមួយបណ្ដាទីផ្សារអន្តរជាតិជារួម នៅមានលក្ខណៈល្អប្រសើរ ខណៈកម្ពុជា កំពុងស្ថិតក្នុងដំណាក់កាលរៀបចំឲ្យមានកំណែទម្រង់ និងធ្វើពិពិធកម្មលើវិស័យពាណិជ្ជកម្ម លើច្បាប់នៃការវិនិយោគ ហេដ្ឋារចនាសម្ព័ន្ធ ជាដើម។ តាមរយៈបរិការណ៍នេះ កម្ពុជានឹងអាចទាក់ទាញទីផ្សារថ្មីៗ បន្ថែមទៀត ជាពិសេសជំរុញកំណើននៃការនាំចេញ ពង្រីកខ្សែច្រវ៉ាក់ផលិតកម្មក្នុងស្រុក ដើម្បីជំរុញកំណើនសេដ្ឋកិច្ចជាតិ។
សូមបញ្ជាក់ថា នៅក្នុងឆ្នាំ២០២២ ទំហំពាណិជ្ជកម្មកម្ពុជា-អាម៉េរិក មានទំហំសរុបជាង ៩ពាន់លានដុល្លារ បានកើនឡើង ១៩% បើធៀបនឹងឆ្នាំ២០២១។ ក្នុងនោះ កម្ពុជាបាននាំចេញទំនិញទៅកាន់ទីផ្សារសហរដ្ឋអាម៉េរិក ក្នុងទំហំទឹកប្រាក់ជិត ៩ពាន់លានដុល្លារ។ រីឯការនាំចេញទៅទីផ្សារអឺរ៉ុបវិញ មានក្នុងទំហំទឹកប្រាក់ ៤ពាន់លានដុល្លារ ខណៈការនាំចេញទៅតំបន់អាស៊ានវិញ មានទំហំទឹកប្រាក់ជាង ៣ពាន់លានដុល្លារ។ នេះបើយោងតាមរបាយការណ៍បូកសរុបលទ្ធផលការងារពាណិជ្ជកម្មឆ្នាំ២០២២ និងទិសដៅការងារពាណិជ្ជកម្មពាណិជ្ជកម្មឆ្នាំ២០២៣ របស់ក្រសួងពាណិជ្ជកម្មកម្ពុជា៕
