នៅក្នុងសេចក្ដីថ្លែងការណ៍រួមគ្នាមួយ របស់ស្ថាប័នសារព័ត៌មានអេឡិចត្រូនិកទាំង៥ខាងលើនេះ បានឲ្យដឹងថា ការឈានដល់ការសម្រេចចុះហត្ថលេខារួមគ្នានេះ គឺដោយសារតែ សង្កេតឃើញថា មានស្ថាប័នព័ត៌មានមួយចំនួន និងក្រុមម្ចាស់គេហទំព័រនានា នៅតែបន្តចម្លង និងយកអត្ថបទព័ត៌មាន ព្រមទាំងរូបថតផងដែរ (លួច) ទៅផ្សាយបន្តលើគេហទំព័ររបស់ខ្លួន ដោយពុំបានការសុំការអនុញ្ញាតពីម្ចាស់ដើមជាមុននោះឡើយ។
បន្ថែមពីនេះ ក្រុមសារព័ត៌មានអេឡិចត្រូនិកល្បីៗទាំង៥នេះ ក៏បានអំពាវនាវដល់ក្រុមហ៊ុនស្របច្បាប់ និងមានវិជ្ជាជីរៈ ពិចារណា ឲ្យបានម៉ត់ចត់ នៅពេលជ្រើសរើសការផ្សាយផលិតផល ឬសេវាកម្ម នៅលើគេហទំព័រណាមួយ ដើម្បីចៀសវាងនូវការសហប្រតិបត្តិការប៉ះចំ គេហទំព័រព័ត៌មាន ដែលមិនគោរពវិជ្ជាជីវៈព័ត៌មាន និងចាំតែលួចចម្លងស្នាដៃ និងបញ្ញារបស់អ្នកដទៃ។
អត្ថបទទាក់ទង!
ក្រុមសារព័ត៌មានអេឡិចត្រូនិកទាំង៥ដដែលនេះ បានចាត់ទុកថា រាល់ទម្រង់លួចចម្លងស្នាដៃ គឺជាទង្វើផ្ទុយនឹងច្បាប់កម្មសិទ្ធិបញ្ញានៃព្រះរាជាណាចក្រកម្ពុជា ហើយថា ការលួចចម្លងស្នាដៃ ឬលួចកម្មសិទ្ធិបញ្ញានេះ គឺជាទង្វើក្បត់ឧត្តមគតិ និងសតិសម្បជញ្ញៈវិជ្ជាជីវៈ។
តំណាងសារព័ត៌មានអេឡិចត្រូនិក ខេមបូណូមីស បានបង្ហាញនូវជំនឿជាក់ថា តាមរយៈសេចក្ដីថ្លែងការណ៍ គឺជាការបង្ហាញនូវគោលជំហរមួយ ក្នុងការលើកស្ទួយ និងការពារដល់ស្នាដៃនិពន្ធរបស់អ្នកសារព័ត៌មានវិជ្ជាជីវៈ និងលើកកម្ពស់នូវកិន្យានុភាពវិស័យសារព័ត៌មាននៅកម្ពុជាផងដែរ។ មិនតែប៉ុណ្ណោះ សេចក្ដីថ្លែងការណ៍នេះ ក៏អាចចាត់ទុកថា គឺជាគ្រឿងដាស់សតិមួយ ដល់ក្រុមគេហទំព័រព័ត៌មាន ដែលចាំតែលួចស្នាដៃពីអ្នកដទៃ និងយកទៅកែកុនបន្តិចបន្ដួច រួចធ្វើជាស្នាដៃរបស់ខ្លួននោះ នឹងភ្ញាក់ខ្លួន និងចាប់ផ្ដើមផលិតព័ត៌មានតាមប្រព័ន្ធអេឡិចត្រូនិកនេះប្រកបដោយវិជ្ជាជីវៈ និងមានសេចក្ដីថ្លៃថ្នូរឡើងវិញ៕
None
